2 Samuel 14:1-33
14 Joab iokichpil Zeruyá kimatik ke tekiuaj semi kinekia kiitas Absalón.
2 Yejua ika Joab kintitanik seki takamej maj yakan Tecoa maj kitemotij se siuatsin akin semi tamatkej. Uan Joab kiluij nejon siuatsin: “Xikchiua kemej yeskia tikchokilijtok aksa* akin momikilij. Ximotalili tasal tein se motalilia keman semi se tayokoxtok uan amo ximoojxili aceite. Xikchiua kemej yeskia uejkaujya tikchokilijtok aksa akin momikilij.
3 Satepan xiouj xikitati tekiuaj uan xikilui nochi tein nimitsiluiti”. Uan Joab kiluij tein monekia kijtos.
4 Siuatsin akin kayot Tecoa kiitato tekiuaj, motankuaketsak, moixpiloj hasta talpan uan kitataujtij: “¡Xinechpaleui noteko!”.
5 Tekiuaj kitajtanij:* “¿Toni mitspanoua?”. Siuatsin kiluij: “¡Niteikneltij! Notakatsin momikilij uan nimokauak noselti.
6 Nikinpiaya ome nookichpipiluan. Sayoj ke keman yejuan yetoyaj ixtauat, peuak moteuiaj uan kemej amo akin kintsakuilij, se nookichpil kimiktij iikniuj.
7 Uan axkan nochin nochankauan nechixnamikij uan nechiluiaj: ‘¡Xiktemakti mookichpil para maj tikmiktikan! Maski yejua kikauiliskiaj nochi tein iaxka itat, maj taxtaua porin kimiktij iikniuj’. Kinekij kimiktiskej nookichpil maski sayoj yejua mokaua. Komo kimiktiaj, kiixpoloskej itokay notakatsin uan amo mokauasok nion se iokichpil nikan taltikpak”.
8 Uan tekiuaj kiluij siuatsin: “Xiouj mochan uan nejua nikitas maj mitspaleuikan”.
9 Siuatsin akin kayot Tecoa kiluij tekiuaj: “Notekiuaj, maj amo mitstajtakoltikan tejua nion mochankauan* tein kichiuak nokoneuj, ta maj titaxtauakan nejua uan ichankauan nopaj”.
10 Tekiuaj kiluij: “Komo aksa oksepa mitsiluia teisa, xikilui maj nechitaki uan tikitas ke amo kemanok mitskuejmolos”.
11 Uan siuatsin kijtoj: “Nimitstataujtia notekiuaj, ximotenkaua itokaykopa* toDios Jehová ke amo kimiktiskej nokoneuj. Komo akin kinamiki momakepas kimiktia nokoneuj okachi nitajyouis”. Tekiuaj kiluij: “Nimitsyekiluia itokaykopa Jehová akin nochipa yoltok ke amo teyi kichiuiliskej mokoneuj”.
12 Siuatsin kiluij: “Noteko, nikneki nimitsiluisok teisa”. Tekiuaj kinankilij: “Xinechilui”.
13 Siuatsin kijtoj: “Noteko ¿keyej tikchiuak tein kintajyouiltia israelitas? Tejua timotajtakolmakatok porin tiktokak* mokoneuj uan amo tikauani maj mokepa.
14 Tinochin timikij uan timochiuaj kemej at tein se kimimiloua* uan amo ueli oksepa se kisentilia. Sayoj ke Dios amo kineki maj aksa miki, ta kiita tein kuali tein kinextiaj akin kintokakej porin kineki kinpaleuis maj mokepakan.
15 Notekiuaj, niualaj nimitsiluiko nejin porin nechmojmoujtijkej. Yejua ika nikijtoj: ‘Xinechkauakan maj nitajto iuan tekiuaj. Xa nechkakis uan kichiuas tein niktajtanisneki.
16 Tekiuaj xa nechkakis uan xa kinekis nechpaleuis, uan xa no kinekis kipaleuis nokoneuj akin mokauaok. Ijkon, takat akin kineki momakepas amo techkuilis tein Dios techtayokolij’.
17 Yejua ika nimitsiluij: ‘Notekiuaj, nimitstataujtia xinechilui tein nechyolseuis’, porin tejuatsin tikmati toni kuali uan toni amo kuali, ijkon kemej se iángel toTajtsin Dios. Maj toDios Jehová nochipa mitspaleui”.
18 Tekiuaj kiluij siuatsin: “Nimitstajtaniti teisa uan nikneki xinechyekilui”. Siuatsin kinankilij: “¿Toni tikneki maj nimitsilui notekiuaj?”.
19 Tekiuaj kitajtanij siuatsin: “¿Joab mitsiluij xinechiluiki nochi nejin?”. Siuatsin kinankilij: “Kemaj notekiuaj, yejua nechualtitanik. Joab nechiluij toni maj nikchiua uan no nechiluij toni maj nimitsilui.
20 Motekitikauj Joab ijkon kichiuak porin kineki mitspaleuis xikpata kemej titanemilia. Sayoj ke tejuatsin semi titamatkej ijkon kemej se iángel toTajtsin Dios, uan tikmati nochi tein mochiujtok nikan Israel”.
21 Satepan, tekiuaj kiluij Joab: “Nikchiuas tein tikneki. Xiouj xikuiti nokoneuj Absalón”.
22 Joab niman motankuaketsak uan moixpiloj hasta talpan uan peuak kiueyitalia tekiuaj. Uan Joab kiluij tekiuaj: “Noteko, axkan nikmati ke mitsyolpaktia tein nikchiua, porin tikchiuak tein nimitstajtanij”.
23 Satepan Joab moketsak uan yajki Guesur. Kikuito Absalón uan kiuikak Jerusalén.
24 Sayoj ke tekiuaj kijtoj: “Maj youi ichan. Amo uelis nechitakiuj”. Yejua ika Absalón yajki ichan uan amo yaya kiitati tekiuaj.
25 Absalón kiueyitaliayaj itech nochi xolal Israel porin semi kuakualtsin katka uan amo moajsia okse takat kemej yejua. Amo kipiaya nion teyi tein amo kuali, ta desde itsontekon hasta imetsuan amo teyi kipolouaya.
26 Itamian xiuit monekia motekilis itson porin semi kikuaetiliaya. Keman kitekiliayaj, itson etik katka kemej ome kilo uan tajko,* ijkon kemej tatamachiuayaj* akin nemiaj ichan tekiuaj.
27 Absalón kinpiak eyi okichpipil uan se siuapil akin monotsaya Tamar. Nejin siuapil semi kuakualtsin katka.
28 Uan Absalón nemik ompa Jerusalén ome xiuit, sayoj ke amo yaya kiitati tekiuaj.
29 Yejua ika Absalón tanauatij maj kinotsatij Joab porin kinekia maj kitajtouiti iixpan tekiuaj, sayoj ke Joab amo kinekik kiitatiuj. Absalón oksepa tanauatij maj kinotsatij Joab, sayoj ke yejua amo kinekik yas.
30 Satepan Absalón kiniluij itakeualuan: “Ital Joab yetok tanakastan de notal, uan kitoktok tepitsin cebada. Xiakan xiktikuiltitij”. Uan itakeualuan Absalón kitikuiltitoj ital Joab.
31 Yejua ika, Joab kiitato Absalón uan kiluij: “¿Keyej motakeualuan kitikuiltijkej notal?”.
32 Absalón kinankilij Joab: “Nejua nitanauatij maj mitsiluitij nejin: ‘Xiuiki, porin nikneki xikiluiti tekiuaj: “Okachi kuali maj nimokauani Guesur. Nenkaj nechkuitoj. Notekiuaj, xinechkaua maj nimitsitati uan komo teisa nikchiuak, xinechmikti”’”.
33 Joab kiitato tekiuaj uan kiluij nochi tein kiluijka Absalón. Yejua ika, tekiuaj tanauatij maj kinotsatij Absalón. Keman Absalón ajsik, motankuaketsak iixpan tekiuaj uan moixpiloj hasta talpan. Satepan tekiuaj kimakak Absalón se beso.
Tajtolmelaualismej
^ Oso “akin”, “akaj”.
^ Oso “kitajtoltij”.
^ Itech hebreo, “motaixyekanalis”.
^ Itech hebreo, “xikelnamiki”.
^ Oso “tikeualtij”.
^ Oso “kitoyaua”.
^ Itech hebreo, “200 siclos”. Xikonita B14.
^ Nejin xa katka se tet tein ika tatamachiuayaj uan kitaliayaj ichan tekiuaj.
