2 Samuel 15:1-37
15 Satepan, Absalón tanauatij maj kichijchiuilikan se carro uan mointemolij caballos. No kinixtalij 50 takamej para maj tsikuintiakan iixpan carro.
2 Absalón kualkan meuaya uan yaya moketsati itech ojti tein ajsia ueyi xolal. Keman se takat yaya kiitati tekiuaj para maj kipaleui maj kiyektali se kuejmol, Absalón kitsakuiliaya uan kitajtaniaya:* “¿Kani tikayot?”. Uan takat kiluiaya ke pouia itech semej uejueyi kalyetonij israelitas.
3 Absalón kiluiaya: “Kuali yetok tein tikneki, sayoj ke nion se itekitikauj tekiuaj uelis mitskakis uan mitspaleuis”.
4 Uan Absalón no kijtouaya: “Komo nejua nechixtaliskiaj kemej juez, nochin akin kipiaskiaj se kuejmol oso moteteluiliskiaj, ueliskiaj nechitakiuij uan nejua nikinpaleuiskia”.
5 Keman se takat yaya motankuaketsati iixpan, Absalón kimatilanaya, kiketsaya uan kimakaya se beso.
6 Absalón kinchiuiliaya nejin nochin israelitas akin yayaj kiitatij tekiuaj para maj kinpaleui. Kemej israelitas kiuelitayaj tein kichiuaya Absalón, peuak kitojtokaj.*
7 Naui xiuit* satepan, Absalón kiluij tekiuaj: “Nimitstataujtia xinechkaua maj niouj Hebrón para nikchiuas tein nimotenkauak iuan Jehová.
8 Keman ninemia Guesur ompa Siria, nimotenkauak nejin: ‘Komo Jehová nechpaleuia maj nimokepa Jerusalén, nias nikueyichiuatiuj* Jehová’”.
9 Tekiuaj kiluij: “Kualtsin xiouj”. Uan Absalón yajki Hebrón.
10 Absalón kinichtakatitanik seki takamej maj yakan kinitatij uejueyi kalyetonij israelitas uan kinnauatij maj kichiuakan nejin: “Keman nankikakiskej ke kipitsaj kuaomit, xiktematiltikan nejin: ‘¡Absalón kiixtalijkej kemej tekiuaj ompa Hebrón!’”.
11 Absalón kinyoleuak 200 takamej akin nemiaj Jerusalén maj iuan yanij Hebrón. Yejuan iuan yajkej, sayoj ke amo kimatiaj toni yaya kichiuati Absalón.
12 Uan keman Absalón kimaktilijtoya Dios in tapialmej, tanauatij maj kinotsatij Ahitofel. Ahitofel katka kayot Guiló uan David kiixejekoltiaya tein yaya kichiuati. Tein Absalón kichiujtoya para mochiuas tekiuaj kuali yajtoya uan okachi momiakiliayaj akin kipaleuiayaj.
13 Se tonal, se takat kiluito David: “Israelitas kipaleuijtokej Absalón para maj mochiua tekiuaj”.
14 David niman kiniluij nochi itakeualuan akin iuan yetoyaj ompa Jerusalén: “¡Maj niman tikcholuikan Absalón, porin komo nikan techajsiki amo uelisok ticholoskej! ¡Ximoijsiuilikan, porin komo techajsiki techmiktis ika imachete tein ojkan tenej* uan no kinmiktis akin nemij itech ueyi xolal!”.
15 Itakeualuan tekiuaj kinankilijkej: “Tikchiuaskej nochi tein tikijtos totekiuaj”.
16 Uan tekiuaj yajki uan nochin akin nemiaj ichan iuan yajkej. Sayoj ke tekiuaj kinkaujteuak ichan majtakti isiuauan* para maj tajpiakan.
17 Tekiuaj yajki uan akin iuan yayaj kitojtokatiayaj uan moketsatoj Bet-Merhac.
18 Nochin akin yayaj iuan tekiuaj panotiajkej iixpan. Uan David kiitaya maj amo akin mokauani. Panotiajkej iixpan nochin itakeualuan uan soldados akin kiyekpiayaj tekiuaj.* No panotiajkej 600 takamej akin nemiaj Gat uan kitojtokayaj David.
19 Uan tekiuaj kiitak Ittái akin kayot Gat uan kiluij: “¿Keyej tikneki nouan tias? Ximokepa uan xikpaleui yankuik tekiuaj. Ipa amo nikan tikayot uan amo ueli timokepaok moxolal.
20 Nejua amo nikmati kani niajtinemis uan tejua yankuixtok tiejkok. Yejua ika amo kinamiki xinechtojtokatinemi. Ximokepa uan xikinuika takamej akin mouan uitsej. ¡Maj Jehová nochipa mitstasojta uan maj nochipa mitspaleui!”.
21 Sayoj ke Ittái kiluij tekiuaj: “¡Nimitsyekiluia itokaykopa Jehová, Dios akin nochipa yoltok, uan no nimitsyekiluia tejuatsin notekiuaj ke kampa tias no ompa nias. Mouan nietos maski uelis nechmiktiskej!”.
22 Yejua ika David kiluij Ittái: “Kuali yetok, tiouij”. Uan Ittái uan takamej akin iuan yayaj panokej iniuan ininchankauan.
23 Nochin akin ompaka nemiaj semi chikauak chokayaj keman panotiayaj akin iuan yayaj tekiuaj. Tekiuaj ijkatoya tanakastan den tal tamanis* tein moixmati kemej Cedrón, uan nochin akin iuan yayaj kipanauijtiayaj tal tamanis uan kikuikej ojti tein ajsi taluakyan.
24 Tiopixkat Sadoc no iuan yaya David uan nochin levitas no iuan yajkej. Yejuan kiuikayaj tatiochiualkaxon* tein iaxka toTajtsin Dios. Levitas moketskej uan talpan kitalijkej tatiochiualkaxon. Uan tiopixkat Abiatar ompa yetoya hasta keman nochin akin kiskej de Jerusalén kitamipanauijkej tal tamanis Cedrón.
25 Sayoj ke tekiuaj kiluij Sadoc: “Ximokepa Jerusalén uan xikuika tatiochiualkaxon tein iaxka toTajtsin Dios. Komo tein nikchiua kiyolpaktia Jehová, yejua nechpaleuis maj nimokepa uan maj oksepa nikita tatiochiualkaxon uan kaltsin* kampa kitalijkej.
26 Sayoj ke komo amo kiyolpaktia tein nikchiua, maj nechchiuili tein kiitas ke nechnamiki”.
27 Tekiuaj kiluij tiopixkat Sadoc: “Tejua tikajsikamati tein Dios kineki. Tejua uan Abiatar ximokepakan Jerusalén, uan xikuika mokoneuj Ahimáaz uan Jonatán iokichpil Abiatar.
28 Nejua nimochias tanakastan den taluakyan, kampa ueli se kimetspanauia ueyiat Jordán. Ompa nietos hasta keman nanechmatiltiskej toni panotok itech ueyi xolal”.
29 Yejua ika Sadoc uan Abiatar mokepkej Jerusalén uan kiuikakej tatiochiualkaxon tein iaxka toTajtsin Dios uan ompa mokaujkej.
30 David chokatiaya keman pankistiaya Olivojtepet. Metsxipetstik* yaya uan kuapiktiaya.* Uan nochin akin yayaj iuan no kuapiktiayaj uan chokatiayaj keman pankistiayaj.
31 Uan kiluitoj David: “Ahitofel no kipaleuijtok Absalón para maj mitsixpata”. Keman David kikakik nejon, kijtoj: “¡Jehová, nimitstataujtia maj Ahitofel tayolmajxiti kemej aksa* akin amo kuatamati!”.
32 David ajsik tepekuapan kampa israelitas yayaj kiueyichiuatij Dios, uan ompa kichixtoya Husái akin arkita. Husái kitsayanka itasal uan mokuatemilijka tal.
33 Sayoj ke David kiluij: “Komo nouan tiouj, amo uelis tinechpaleuis.
34 Okachi tinechpaleuis komo timokepa Jerusalén uan tikiluia Absalón ‘Nejua nimotekitikauj notekiuaj. Maski achto niktekitiliaya mopaj, axkan tejua nimitstekitilis’. Uan keman Ahitofel teisa kiyolmajxitis uelis tinechpaleuis para maj Absalón amo kichiua tein kiluis.
35 Ompa no mokaujkej tiopixkamej Sadoc uan Abiatar. Yejuan xikinilui nochi tein tikakis ichan tekiuaj.
36 Uan no mokaujkej ininkoneuan, Ahimáaz iokichpil Sadoc uan Jonatán iokichpil Abiatar. Maj yejuan nechiluikij nochi tein nankikakiskej”.
37 Yejua ika Husái akin kuali mouikaya iuan David, kalakik Jerusalén keman Absalón ajsitiaya.
Tajtolmelaualismej
^ Oso “kitajtoltiaya”.
^ Oso “kitoktiliaj”.
^ Oso xa “40 xiujmej”. Xa 40 xiujmej desde keman David kijitakej para maj mochiua tekiuaj, kemej kijtoua 1Sa 16:13.
^ Itech hebreo, “niktekitilis”.
^ Oso “iespada”.
^ Xikonita tajtol okse siuatsin.
^ Itech hebreo, “keretitas uan peletitas”.
^ Oso “takomol”.
^ Xikonita tatiochiualkaxon.
^ Nejin kaltsin chijchiujtoya ika tasal.
^ Oso “Metsxitatstik”.
^ Oso “kuatakentiaya”.
^ Oso “akin”, “akaj”.
