2 Samuel 16:1-23
16 Keman David pantemotiayaya den tepet monamikito iuan Zibá, itekitikauj Mefibóset. Yejua ompa kichixtoya uan kiuikilij ome burros tein kinmamaltij ome ciento pantsitsin, se ciento taxkaltsitsin tein chijchiujtoyaj ika pasas, se ciento taxkaltsitsin tein chijchiujtoyaj ika higos uan dátiles* uan se ueyi komit tein kipiaya vino.
2 Tekiuaj kitajtanij* Zibá: “¿Keyej tikualkuik nochi nejin?”. Zibá kinankilij: “Burros nikinualkuik para maj ininpanko yakan ichankauan tekiuaj, pantsin uan taxkaltsitsin tein chijchiujtok ika higos uan dátiles nikualkuik para maj takuakan motekitikauan. Uan vino nikualkuik para maj tayikan akin siouiskej keman nanyajtoskej taluakyan”.
3 Uan tekiuaj kitajtanij: “¿Uan kani yetok Mefibóset iixuiuj* moteko?”. Zibá kinankilij: “Mokauak ompa Jerusalén porin moluij: ‘Kemej noueyitat* katka tekiuaj, axkan israelitas nejua nechixtaliskej kemej tekiuaj’”.
4 Tekiuaj kiluij Zibá: “Nochi tein kipia Mefibóset moaxka yeski desde axkan”. Uan Zibá motankuaketsak uan kiluij: “Nimitsueyitalia uan nimitstasojkamatilia notekiuaj. Nochipa nikchiuas tein mitsyolpaktia”.
5 Keman tekiuaj David ajsik Bahurim kinamikito se takat akin katka ichankauj Saúl. Nejin takat monotsaya Simeí iokichpil Guerá. Yejua semi chikauak kiuijuikaltiaya* David.
6 Simeí peuak kitetema* David uan nochin akin iuan yetoyaj. Kintetemak itakeualuan uan isoldados akin kuali tateuiayaj akin yetoyaj iyekmakopa uan iopochmakopa.
7 Simeí kiluiaya nejin keman kiuijuikaltiaya: “¿Toni tikchiua nikan? ¡Xiouj! Tejua miakej tikinmiktiani uan amo tikualtia.
8 Jehová mitstaxtaualtijtok porin tikinmiktij ichankauan Saúl akin tikajchiuak kemej tekiuaj para tejua timoixtalis. Yejua ika Jehová kiixtalij maj mokoneuj Absalón taixyekana. ¡Axkan titaxtaujtok porin miakej tikinmiktij!”.
9 Uan Abisái iokichpil Zeruyá kiluij tekiuaj: “Nejin takat kemej yeskia se itskuinmiket, ¿toni chiujkej para maj mitsuijuikaltijto notekiuaj? Xinechkaua maj nikechkotona”.
10 Sayoj ke tekiuaj kinankilij: “¿Keyej namokalakiaj namejuan ikoneuan Zeruyá? Xikauakan maj nechuijuikalti, porin yejua Jehová kiluij: ‘¡Xikuijuikalti David!’. Yejua ika amo akin uelis kitakaualtis komo Dios kiluijtok maj kichiua”.
11 David no kiluij Abisái uan nochin itakeualuan: “Xikauakan maj nechuijuikalti. Komo Absalón akin nokoneuj kineki nechmiktis, okachi taixejekol maj kineki nechmiktis se takat akin poui iniuan ichankauan Benjamín. ¡Xikauakan maj nechuijuikalti porin Jehová kinauatij maj kichiua!
12 Xa Jehová kiitas ke semi nitajyouijtok uan xa Jehová nechtatiochiuis uan amo kikauas maj nechpano tein kijtojtok Simeí”.
13 David uan nochin akin iuan yayaj kisentokakej nejnenkej uan Simeí kintojtokatiaya* tepekuapan. Yejua kiuijuikaltijtiaya David, kitetentiaya* uan kipantepeuilijtiaya miak talnex.
14 Tekiuaj uan nochin akin kitojtokakej ajsikej kampa yayaj. Yejuan semi sioujtoyaj, yejua ika ompa moseuijkej.
15 Uan Absalón uan nochin israelitas akin kipaleuiayaj ajsikej Jerusalén. Ahitofel no iuan yaya.
16 Keman Husái akin arkita akin kuali mouikaya iuan David kiitato Absalón, peuak kiluia: “¡Maj Dios nochipa kitiochiua totekiuaj! ¡Maj Dios nochipa kitiochiua totekiuaj!”.
17 Yejua ika Absalón kitajtanij Husái: “¿Ijkon tiknextilia motasojikniuj ke tiktasojta? ¿Keyej amo iuan tiajki motasojikniuj?”.
18 Husái kinankilij Absalón: “Ipa amo niaskia iuan, porin nejua nikpaleuia akin Jehová kijitak, uan akin kijitakej nejin takamej akin mouan yetokej uan nochin okseki israelitas. Nejua mouan nimokauas.
19 Tejua tiiokichpil notasojikniuj, yejua ika oksepa nimitsyekiluia ke amo niktekitilis okse ta tejua nimitstekitilis. Ijkon kemej niktekitilij mopaj, no ijkon nimitstekitilis tejua”.
20 Satepan, Absalón kiluij Ahitofel: “Xinechilui toni maj tikchiuakan”.
21 Ahitofel kiluij Absalón: “Ximoteka iniuan isiuauan* mopaj, akin kinkaujteuak para maj tajpiakan kalijtik. Keman israelitas kimatiskej ke tikchiuak nejin uan ke amo tiktakachiuak* mopaj, okachi kinekiskej mitspaleuiskej”.
22 Yejua ika kitalilijkej Absalón se kaltsin* kalkuako* uan ompa motekak iniuan isiuauan itat. Uan nochin israelitas kiitakej tein kichiuak.
23 Itech nejon tonalmej, tein Ahitofel tayolmajxitiaya kiitayaj kemej yeskia Dios tayolmajxitiaya.* Yejua ika David uan Absalón kikakiaj nochi tein Ahitofel kijtouaya.
Tajtolmelaualismej
^ Nejin takilot motemaka itech se kouit tein tamati kemej palmajkouit.
^ Oso “kitajtoltij”.
^ Itech hebreo, “ikoneuj”.
^ Itech hebreo, “nopaj”.
^ Oso “kitejtelchiuaya”, “kijijtouaya”.
^ Oso “kitepoxonia”, “kimojmota ika tet”.
^ Oso “kintoktilijtiaya”.
^ Oso “kitepoxonijtiaya”, “kimojmottiaya ika tet”.
^ Xikonita tajtol okse siuatsin.
^ Oso “amo tikpoujkaitak”.
^ Nejin kaltsin chijchiujtoya ika tasal.
^ Oso “kaltipan”, “kalpani”.
^ Oso “kitajtaniayaj (kitajtoltiayaj)”.
