2 Samuel 2:1-32
2 Satepan, David kitajtanij* Jehová: “¿Maj nipankisa semej uejueyi xolalmej tein yetokej Judá?”. Jehová kiluij: “Kemaj, xipankisa”. Yejua ika David oksepa kitajtanij: “¿Kani maj niouj?”. Yejua kinankilij: “Xiouj Hebrón”.
2 Yejua ika David pankisak Hebrón uan kinuikak isiuauan. Se monotsaya Ahinoam akin kayot Jezreel uan okse monotsaya Abigaíl akin katka isiuatsin Nabal akin kayot Carmelo. Sayoj ke Nabal momikilijkaya.
3 Takamej akin kipaleuiayaj David no yajkej uan kinuikakej ininchankauan. Nochin mokaltalijkej itech uejueyi xolalmej tein yetokej ompa Hebrón.
4 Satepan, seki takamej akin pouiaj iniuan ikoneuan Judá kiitatoj David uan kikuatekilijkej aceite para maj yejua kinixyekana nochin ikoneuan Judá.
Nejon takamej kiluijkej David: “Keman mikik Saúl, takamej akin nemij Jabés-Galaad kitokkej”.
5 Yejua ika David kintitanik seki takamej maj kinitatij akin nemiaj Jabés-Galaad uan maj kiniluitij: “Maj Jehová namechtatiochiui porin nankitokkej namoteko Saúl, ijkon nankinextilijkej ke semi nankitasojtayaj.
6 Maj Jehová nochipa namechnextili ke namechtasojta. Nejua no namechnextilis ke namechtasojta porin nankitokkej Saúl.
7 Namoteko Saúl amo nemiok uan akin pouij iniuan ikoneuan Judá nechixtalijkej kemej inintekiuaj. Yejua ika namechiluia xiyolchikaujkej uan amo ximouikan”.
8 Sayoj ke Abner,* akin kinixyekanaya isoldados Saúl kiuikak Is-Bóset hasta Mahanaim, oksekopa den ueyiat Jordán. Is-Bóset katka iokichpil Saúl.
9 Abner kiixtalij Is-Bóset kemej tekiuaj para maj kinixyekana asuritas uan akin nemiaj Galaad uan Jezreel. Is-Bóset no tekiuajtiskia kampa kintaxejxelouilijkaj ikoneuan Efraín uan Benjamín, uan nochi talmej tein moajsiaj Israel.
10 Is-Bóset iokichpil Saúl, kipiaya 40 xiujmej keman kiixtalijkej kemej tekiuaj ompa Israel, uan tekiuajtik ome xiuit. Sayoj ke akin pouiaj iniuan ikoneuan Judá kipaleuijkej David porin yejua katka inintekiuaj.
11 David kinixyekanak akin pouiaj iniuan ikoneuan Judá chikome xiuit uan chikuasen metsti. Yejua nemia Hebrón uan desde ompa tekiuajtia.
12 Abner uan isoldados Is-Bóset yetoyaj Mahanaim. Satepan kiskej uan yajkej Gabaón. Abner katka iokichpil Ner uan Is-Bóset katka iokichpil Saúl.
13 Joab iokichpil Zeruyá uan isoldados David akin yetoyaj Hebrón no yajkej Gabaón. Yejuan moajsitoj iuan Abner uan isoldados Is-Bóset kampa yetoya se ueyi talkoyok kampa kisentiliayaj at. Sekin motalijkej sekopa den ueyi talkoyok uan oksekin oksekopa.
14 Uan Abner kiluij Joab: “Maj soldados moketsakan uan maj moteuikan* toixpan”. Joab kinankilij: “Maj moteuikan”.
15 Yejua ika, soldados moketsatoj tatajko. Katkaj 12 isoldados Is-Bóset akin pouiaj iniuan ikoneuan Benjamín uan 12 isoldados David.
16 Nochin soldados peuak moteuiaj. Sejse soldado kikuik imachete tein ojkan tenej* uan kielchikiujtokilij akin iuan moteuijtoya uan nochin momijmiktijkej. Yejua ika, kampa moteuijkej tatokaytijkej Helcat-Hazurim* uan yetok ompa Gabaón.
17 Nejon tonal semi momijmiktijkej. Isoldados David kitankej Abner uan soldados israelitas.
18 Ompa yetoyaj ikoneuan Zeruyá: Joab, Abisái uan Asahel. Asahel ijsiujka motalouaya kemej se masat.
19 Uan Asahel motaloj para kitokateuas Abner, uan kitokatiaya kampa yeski yaya.
20 Keman Abner moixkepak, kitajtanij: “¿Tejua Asahel?”. Asahel kinankilij: “Kemaj, nejua”.
21 Abner kiluij: “Xinechkauaya. Xikitskiti semej soldados uan xikuili nochi tein kipia”. Sayoj ke Asahel kisentokak kitokatiajki.
22 Yejua ika Abner oksepa kiluij Asahel: “Xinechkauaya, amo nikneki nimitsmiktis. Porin komo nimitsmiktia amo uelisok nikixitas mokniuj Joab”.
23 Sayoj ke Asahel amo kikakik, yejua ika Abner kipoxtokilij ilanza* uan nalkisato ipanko. Asahel uetsito uan mikik. Uan nochin akin panouayaj kampa uetstoya Asahel moketsayaj para kiitaskej.
24 Uan Joab uan Abisái motalojkej para kitokatiaskej Abner. Keman tapoyauik, ajsikej tepetsin Amá tein yetok taixpan de Guíah. Nejin tepetsin yetok itech ojti tein ajsi taluakyan tein poui Gabaón.
25 Uan soldados akin pouiaj iniuan ikoneuan Benjamín mosentilijkej iikan Abner. Uan nochin moketsatoj ikuapan se tepetsin.
26 Abner kitsajtsilij Joab: “Xikinilui mosoldados maj amo kintokatiakanok ininikniuan. ¿Xe tikneki maj tiksentokakan timomijmiktikan ika tomachete tein ojkan tenej? ¿Xe amo tikita ke nejin kichiuas maj okachi timotauelitakan?”.
27 Uan Joab kijtoj: “Nimitsyekiluia itokaykopa toTajtsin Dios akin nochipa yoltok ke komo amo teyi tikijtoskia, soldados kisentokaskiaj kintokatiaskiaj ininikniuan hasta mosta kualkan”.
28 Yejua ika Joab kipitsak kuaomit uan isoldados amo motalojkejok para kintokatiaskej soldados israelitas. Uan ijkuak amo moteuijkejok.
29 Abner uan isoldados nejnenkej nochi youal. Panokej Arabá uan kipanauijkej ueyiat Jordán. Satepan nejnenkej ataujkopa* uan ajsikej Mahanaim.
30 Joab kinsentilij isoldados David keman amo kitokatiajkejok Abner. Uan keman kinpoujkej kiitakej ke momikilijkaj 19 isoldados David uan no momikilijka Asahel.
31 Sayoj ke isoldados David kintankaj soldados akin pouiaj iniuan ikoneuan Benjamín uan oksekin isoldados Abner. Sennochia momikilijkej 360.
32 Joab uan isoldados kiuikakej Asahel uan kitokkej ompa Belén kampa kitokkaj itat. Satepan nejnenkej nochi youal uan ajsikej Hebrón keman tanestiayaya.
Tajtolmelaualismej
^ Oso “kitajtoltij”.
^ Itech hebreo, “Abner ikoneuj Ner”.
^ Oso “motatanikan”.
^ Oso “iespada”.
^ Tokayit tein kijtosneki ‘tal kampa momijmiktijkej ika cuchillos tein chijchiujtoyaj ika tet’.
^ Nejin katka se kouit tein ueyak tein itempan kipiaya se tepos tein puntajyej.
^ Oso xa “kipanauijkej nochi Bitrón”.
