2 Samuel 20:1-26
20 Se takat akin monotsaya Seba peuak takuejmolchiua. Yejua katka iokichpil Bicrí uan pouia iniuan ikoneuan Benjamín. Seba kipitsak kuaomit uan kijtoj: “¡Nokniuan israelitas! Tejuan amo tipouij iniuan ichankauan David. Iokichpil Jesé amo teyi techmakas. ¡Tiouij oksepa tikinueyichiuatij totatadiosuan!”.*
2 Uan nochin takamej israelitas kikaujteujkej tekiuaj David uan kitojtokakej* Seba iokichpil Bicrí. Sayoj ke takamej akin nemiaj Judá amo kikaujkej inintekiuaj uan iuan yajkej desde ueyiat Jordán hasta Jerusalén.
3 Keman David cholojteuak, kinkaujteuak majtakti isiuauan* maj tajpiakan ichan. Keman mokepak, kinkauato nejon majtakti siuamej itech okse kali uan kinnauatij seki soldados maj tajpiakan ompa. Tanauatiaya maj kinuikilikan tein kikuaskej sayoj ke amo keman motekakok iniuan. Ompa yetoyaj hasta keman momikilijkej. Maski inintakatsin yoltoyaok, yejuan nemiaj kemej yeskia momikilijkaya inintakatsin.
4 Satepan tekiuaj kiluij Amasá: “Xikinnauatiti nochin takamej akin nemij Judá maj uipta ualakan nechitakij uan tejua no xiuiki”.
5 Uan Amasá yajki kinitato takamej akin nemiaj Judá, sayoj ke amo ajsik uiptika kemej kinauatijka tekiuaj.
6 Yejua ika David kiluij Abisái: “Seba iokichpil Bicrí xa okachi techkuejmolkalakis ke Absalón. Yejua ika xikinuika nosoldados uan xiktemoti, porin uelis mokalakitiuj itech semej xolalmej kampa kuali tatsaktok uan amo tikajsiskejok”.
7 Uan soldados akin kinixyekanaya Joab, soldados akin kiyekpiayaj tekiuaj* uan soldados akin kuali tateuiayaj kitojtokateujkej.* Kisteujkej de Jerusalén para kitemotiuij Seba iokichpil Bicrí.
8 Amasá kinnamikito keman ajsitoyajya kampa yetok se ueyi tet ompa Gabaón. Joab aktiaya itasal tein ika tateuiaya uan motajkoilpilijka* imachete tein ojkan tenej.* Keman Joab kiajsito Amasá, kikauak maj uetsi imachete.
9 Joab kiluij Amasá: “¿Kuali tietok noknitsin?”. Satepan kitentsonkitskij Amasá ika iyekmay uan kichiuak kemej yeskia yaya kimakati se beso.
10 Amasá amo kiitak ke Joab maaktoya imachete. Keman Joab okachi motokij, kipoxtokilij Amasá imachete. Amasá kuitaxkolkisak* uan nochi pachanito talpan. Sayoj sepa kipoxtokilij porin kiitak ke miktoyaya. Satepan, Joab uan iikniuj Abisái kitemotoj Seba iokichpil Bicrí.
11 Semej isoldados Joab moketsak kampa uetstoya Amasá uan peuak kijtoua: “¡Nochin akin nankinpaleuiaj Joab uan David, xiktojtokakan Joab!”.
12 Uan Amasá motetekuinojtoya* itech iesyo tatajko ojti. Keman nejon soldado kiitak ke nochin moketsayaj kampa uetstoya Amasá, kixoxolatsak uan kikauato ojtenoj. No kipankentij se tasal porin kiitak ke nochin akin ompaka panouayaj moketsayaj para kiitaskej.
13 Satepan ke kiajchiuak, nochin soldados iuan yajkej Joab kitemotoj Seba iokichpil Bicrí.
14 Seba panotiajki kampa nemiaj nochin uejueyi kalyetonij israelitas uan ajsik Abel-Bet-Maacá. Uan ichankauan Bicrí kitojtokakej Seba hasta ueyi xolal uan no iuan kalakitoj.
15 Joab uan isoldados ajsitoj Abel-Bet-Maacá. Nejon ueyi xolal kiyoualojtoya se ueyi tepamit. Yejua ika kitamiyoualojkej ueyi xolal para kinteuiskej akin ompa nemiaj uan kimontontenkej tal para kitamotaskej tepamit. Uan okseki soldados peujkej tachkuaj itsintan ueyi tepamit para maj uetsi.
16 Uan se siuatsin akin semi tamatkej akin yetoya itech ueyi xolal, peuak kintsajtsilia isoldados Joab: “¡Xinechkakikan! ¡Xinechkakikan! Xikiluikan Joab maj uiki porin nikneki iuan nitajtos”.
17 Joab motokij para kikakis uan siuatsin kitajtanij:* “¿Tejua tiJoab?”. Joab kinankilij: “Kemaj, nejua”. Siuatsin kiluij: “Noteko, nimitstataujtia xinechkaki”. Joab kiluij: “¿Toni tikneki tinechiluis?”.
18 Siuatsin kijtoj: “Ne uejkauj miakej kijtouayaj ke komo aksa* kineki kiyektalis se kuejmol, ‘maj kinilui akin nemij ueyi xolal Abel maj kiyolmajxitikan’.
19 Nejua nikintajtouia nochin akin nemij Israel, akin amo takuejmolchiuaj uan tatakamatij. Tejua tikneki tikixpolos se ueyi xolal tein motelixmati nikan Israel. ¿Keyej tikinixpolosneki akin pouij itech ixolal* Jehová?”.
20 Joab kinankilij: “Nejua amo keman nikixpoloskia ueyi xolal.
21 Amo nikneki nikixpolos, ta niktemojtok se takat akin monotsa Seba iokichpil Bicrí akin kiixnamikik tekiuaj David. Yejua nemia kampa tepeyoj kampa kintaxejxelouilijkej ikoneuan Efraín. Xikixtikan nejon takat uan amo namechkuejmolosok”. Uan siuatsin kiluij Joab: “¡Timitsajkotamotiliskej itsontekon!”.
22 Siuatsin akin semi tamatkej yajki kinnojnotsato akin nemiaj itech ueyi xolal. Yejua ika yejuan kikechkotonkej Seba iokichpil Bicrí uan itsontekon kiajkotamotilijkej Joab. Satepan Joab kipitsak kuaomit uan isoldados yajkej ininchan. Uan Joab yajki Jerusalén kampa yetoya tekiuaj.
23 Joab kinixyekanaya nochin soldados israelitas, uan Benaya iokichpil Jehoiadá kinixyekanaya soldados akin kiyekpiayaj tekiuaj.*
24 Adoram kinixyekanaya akin tekiuaj kinixtalijka maj kitekitilikan uan Jehosafat iokichpil Ahilud kijkuilouaya nochi tein mochiuaya itech altepet.
25 Sevá katka itajkuilojkauj tekiuaj, uan Sadoc uan Abiatar katkaj tiopixkamej.
26 Irá katka se ueyichiujkej* akin kitekitiliaya David. Iuejkaujtat Irá katka Jaír.
Tajtolmelaualismej
^ Oso “totiotsitsin”. Oso xa “Maj timokepakan kampa yetokej tokaltsitsin”.
^ Oso “kitoktilijkej”.
^ Xikonita tajtol okse siuatsin.
^ Itech hebreo, “keretitas uan peletitas”.
^ Nikan xa ika tajtojtok Abisái.
^ Oso “motajkotsikouilijka”.
^ Oso “iespada”.
^ Oso “kisak iijtikyo”.
^ Oso “moxolkeptinemia”.
^ Oso “kitajtoltij”.
^ Oso “akin”, “akaj”.
^ Oso “akin Jehová iaxkauan”.
^ Itech hebreo, “keretitas uan peletitas”.
^ Itech hebreo, “tiopixkat”.
