2 Samuel 21:1-22
21 Keman David katka tekiuaj, israelitas amo kipiakej tein kikuaskej eyi xiuit. Yejua ika David kitajtanij Jehová maj kinpaleui, uan Jehová kinankilij: “Tein namechpanotok inintajtakol Saúl uan ichankauan porin kinmiktijkej gabaonitas”.
2 Yejua ika tekiuaj David tanauatij maj kinnotsatij gabaonitas para iniuan tajtos. (Gabaonitas amo katkaj israelitas, ta katkaj amorreos. Yejuan makiskej porin israelitas motenkaujkej ke amo kinmiktiskiaj. Sayoj ke Saúl kinekia kintamimiktis gabaonitas porin amo kiuelitaya maj yetonij iniuan akin nemiaj Israel uan Judá).
3 David kintajtanij* gabaonitas: “¿Toni uelis tikchiuaskej para xitechtapojpoluikan? ¿Keniuj uelis tamechtaxtauiskej para uelis nankitajtaniskej Jehová maj kintatiochiui akin pouij itech ixolal?”.*
4 Gabaonitas kinankilijkej tekiuaj: “Plata uan oro amo ajsi para tikixtauas tein techchiuilijkej Saúl uan ichankauan. Uan tejuan amo ueli tikmiktiaj nion se israelita”. Tekiuaj David kiniluij: “Xinechiluikan keniuj nankinekij maj namechtaxtaui”.
5 Gabaonitas kiluijkej tekiuaj: “Nejon takat kinmiktij miakej tochankauan uan kinekia techtamimiktis para maj amo tinemikanok nikan Israel.
6 Yejua ika tiknekij xitechinmaktili chikome ikoneuan para maj tikinmiktikan. Tikinpiloskej* ompa Guibeá para maj Jehová kinita, itech ueyi xolal kampa nemia Saúl akin Jehová kiixtalijka maj taixyekana”. Tekiuaj kiniluij: “Namechinmaktilis”.
7 Sayoj ke tekiuaj David kiiknelij Mefibóset akin katka iokichpil Jonatán uan iixuiuj Saúl, porin motenkaujka iuan Jonatán ke kinikneliskia ichankauan. Motenkaujka nejon itokaykopa Jehová.
8 Yejua ika kinijitak Armoní uan Mefibóset ikoneuan Rizpá akin achto katka isiuauj Saúl. Itat Rizpá katka Ayá. No kinijitak makuil ikoneuan Mical* tein kinpiak iuan Adriel. Mical katka isiuapil Saúl uan Adriel iokichpil Barzilái akin nemia Meholá.*
9 Satepan kinmaktilij gabaonitas nejon chikome ichankauan Saúl. Yejuan kinsenmiktijkej uan kinpilojkej itech tepet para maj Jehová kinita. Kinmiktijkej keman israelitas peuaya kitekij cebada.
10 Uan Rizpá iichpoch Ayá kiuikak se ueyi tasal kampa pilkatoyaj ichankauan Saúl uan kisouak itech tet. Nejon tasal motaliliaj keman kichokiliaj aksa* akin momikilij. Rizpá ompa mokauak desde tonalmej keman peuak kitekij cebada hasta tonalmej keman peuak tel chikauak kioui. Rizpá amo kikauaya maj totomej kinkuakan mikemej de tonayan uan de youak amo kikauaya maj motokikan koujtajtapialmej.
11 David kimatik tein kichiuak Rizpá akin katka isiuauj* Saúl uan iichpoch Ayá.
12 Yejua ika, David yajki Jabés-Galaad kikuito iomiyouan Saúl uan iomiyouan Jonatán akin katka iokichpil Saúl. Filisteos kitankaj Saúl ompa Guilboa uan kipilotoj yejua uan Jonatán taixpan den plaza tein yetok Bet-San. Sayoj ke akin taixyekanayaj Jabés-Galaad kinichtakakuitoj Saúl uan Jonatán* kampa kinpilojkaj.
13 David kiualkuik iomiyouan Saúl uan Jonatán* uan no kinkuito ininomiyouan takamej akin gabaonitas kinmiktijkaj.*
14 Satepan kitokkej ininomiyouan Saúl uan Jonatán* ompa Zelá kampa kitokkaj Quis, itat Saúl. Ueyi xolal Zelá yetok itech talmej kampa kintaxejxelouilijkej ikoneuan Benjamín. Keman mochiuak nochi tein tekiuaj tanauatijka, Dios kinkakik israelitas keman kitataujtiayaj maj kintatiochiui.
15 Filisteos uan israelitas oksepa peuak moteuiaj. Yejua ika David temok iniuan isoldados para kinteuis filisteos. Sayoj ke semi siouik keman tateuijtoya.
16 Isbí-Benob semej akin pouia iniuan refaím yaya kimiktitia David. Yejua kipiaya se lanza tein ikuapan chijchiujtoya de cobre uan tein etik katka kemej eyi kilo uan tajko.* No kipiaya se machete tein ojkan tenej* tein yankuik katka.
17 Sayoj ke Abisái iokichpil Zeruyá niman kipaleuito David. Kiteuij filisteo uan kimiktij. Yejua ika isoldados David kiyekiluijkej:* “Amo timitskauaskejok touan xitateuiti, porin komo timiki seuis tauil tein kintauilia israelitas”.*
18 Satepan, israelitas oksepa peuak moteuiaj iniuan filisteos ompa Gob. Ijkuak, Sibecái akin katka kayot Husá* kimiktij Saf akin pouia iniuan refaím.
19 Uan israelitas oksepa moteuijkej iniuan filisteos ompa Gob. Ijkuak, Elhanán iokichpil Jaaré-Oreguim akin kayot Belén kimiktij Goliat akin kayot Gat. Goliat kiuikaya se lanza* tein ikoujyo semi ueyi katka kemej se kouit tein ika tajkitij.
20 Uan israelitas oksepa moteuijkej iniuan filisteos ompa Gat. Itech nejon ueyi xolal nemia se ueyi takat akin no pouia iniuan refaím. Kipiaya chikuasen imajpiluan itech sejse imay uan chikuasen iikxipiluan itech sejse imets. Sennochia kipiaya 12 imajpiluan uan 12 iikxipiluan.
21 Kemej kisentokaya kinixnamikia israelitas, Jonatán iokichpil Simeí kimiktij. Simeí katka iikniuj David.
22 Nejin naui takamej pouiaj iniuan refaím uan nemiaj Gat. David uan isoldados kinmiktijkej nejin naui takamej.
Tajtolmelaualismej
^ Oso “kintajtoltij”.
^ Itech hebreo, “akin moinaxkatilij”.
^ Itech hebreo, “Nochin tikinnextiliskej”. Nejin kijtosneki ke kinmapostekiskiaj uan kinmetspostekiskiaj.
^ Oso xa “Merab”.
^ Nikan xa ika motajtojtok Abel-Meholá.
^ Oso “akin”, “akaj”.
^ Xikonita tajtol okse siuatsin.
^ Itech hebreo, “uan iokichpil Jonatán”.
^ Itech hebreo, “iokichpil Jonatán”.
^ Itech hebreo, “nochin kinnextilijkaj”.
^ Itech hebreo, “iokichpil Jonatán”.
^ Itech hebreo, “300 siclos”. Xikonita B14.
^ Oso “espada”.
^ Itech hebreo, “motenkaujkej iuan”.
^ Nejin kijtosneki ke ixpoliuis akin kinixyekana israelitas.
^ Oso xa “ikoneuj Husá”.
^ Nejin katka se kouit tein ueyak tein itempan kipiaya se tepos tein puntajyej.
