2 Samuel 22:1-51
22 Jehová kipaleuij David para maj Saúl amo teyi kichiuiliani nion oksekin akin kitauelitayaj. Yejua ika nejon tonal kicantarouilij Jehová nejin tatsotson.
2 David kijtoj:
“Jehová kemej yeskia se tepejxit kampa nimomatampauia,
kemej yeskia se ueyi xolal kampa kuali tatsaktok kampa ueli nimotatia.*
Yejua nechmakixtia.
3 NoDios kemej yeskia se ueyi tet kampa ueli nimomatampauia,kemej yeskia se escudo tein ika nimopaleuia.NoDios nechmakixtia* uan nechyekpia. Yejua akin niktemoua para maj nechpaleui.
NoDios nechmakixtia, nechpaleuia para maj amo teyi nechchiuilikan akin nechtauelitaj.
4 Jehová kinamiki maj tikueyitalikan. Nejua niktataujtia maj nechpaleui.Uan yejua nechpaleuia para maj amo teyi nechchiuilikan akin nechtauelitaj.
5 Mikilis nechyoualojtinemia kemej yeskia at tein fiero moajkotatamota itech mar.Miakej takamej akin amo yolkualmej semi nechmoujtijkej.
Yejuan mosentilijkej ijkon kemej at tein tel ueyixtok.
6 Miketekoch* kemej yeskia nechilpijka.*In mikilis kinekia nechkitskis.
7 Keman semi nitajyouijtoya, niktataujtij Jehová maj nechpaleui.Niksentokak niktataujtij noDios,
uan yejua nechkakik desde ichan.Yejua nechkaki keman niktsajtsilia maj nechpaleui.
8 Taltikpak peuak motsetseloua uan moolinia.Iluikak no chikauak motsetseloj.Taltikpak uan iluikak motsetselojkej porin Dios kualanik.
9 Kemej semi kualantoya, iyekatsolko kisaya poktiuan de itenoj kisaya miak tit.*Yejua kikixtiaya miak tekol.
10 Keman Dios temotiaya, mixti no temotiaya hasta talpanuan imetstampa Dios tatileujka.
11 Ualaya ipanko se querubín tein patantiualaya.
Ualaya iajtapalko se ángel.
12 Motatayouayantilij para maj amo moita.Keman kichiuak maj tamitatileui kemej yeskia motatsakuilij ika se kaltsin.*
13 Kemej yejua semi petania, kichiuak maj tekol xota.
14 Jehová kichiuak maj chikauak tatitikuini.Dios akin okachi ueyichiujkej chikauak tsajtsik para maj kikakinij.
15 Kitamotak iflechas uan ijkon kichiuak maj momoyauanij* akin nechtauelitaj.Keman kichiuak maj tatitikuini, yejuan semi momoujtijkej uan amo kimatkejok toni kichiuaskej.
16 Kemej Jehová chikauak tsajtsikuan chikauak kikixtij ejekat de iyekatsol,mar uakik uan mokauak sayoj tal.
17 Desde ne iluikak nechkitskij ika imayuan nechkixtij keman nipankalakik aijtik.
18 Akin nechixnamikiaj uan nechtauelitayaj okachi chikaujkej katkaj.Sayoj ke Dios nechmakixtij para maj amo teyi nechchiuilianij.
19 Yejuan nechixnamikkej keman ipa nitajyouijtoyaya.Sayoj ke Jehová nechpaleuij.
20 Nechuikak kampa amo teyi nechpanoskia.*Nechmakixtij porin kiyolpaktia tein nikchiua.*
21 Jehová nechtatiochiuia porin nikchiua tein kuali yetok.Nechtatiochiuia porin amo nikchiua tein amo kuali.*
22 Nejua nochipa nikchiua tein Jehová tanauatia.Tajtakol komo se kikaua Dios, yejua ika amo nikauani.
23 Nochipa nikelnamiki tanauatilmej tein kiixtalia.Amo nikixpanauis tein tanauatia.
24 Niksentokas nikchiuas tein kuali yetok para maj yejua kiita.Nikyekitas tein nikchiua para amo nimotajtakolmakas.
25 Maj Jehová nechtatiochiui porin nikchiua tein kuali yetok.Maj nechtatiochiui komo kiita ke amo nikchiua tein amo kuali.
26 Tejua nochipa tiktasojtas akin amo mitskauas.Nochipa tikpaleuis* akin kichiua tein kuali yetok.
27 Tejua nochipa tikinpaleuia akin chipaujkanemij,sayoj ke akin xolopij amo tikaua maj mitskajkayaua.*
28 Tikinmakixtia akin yolyemankej,sayoj ke amo tikinyekita akin moueyimatij, uan tikinpinaujtia.
29 Jehová kemej yeskia se candil.Jehová, tejua tinechtauilia keman tayouayan nietok.
30 Kemej nikmati ke tinechpaleuia, ueli nikinteuia miakej tachtekinij.Kemej Dios nechpaleuia, ueli nitejko* itech se ueyi tepamit uan nikpanauia.
31 Semi kuali nochi tein toTajtsin Dios kichiua.Tein Jehová kijtoua chipauak.
Yejua kemej yeskia se escudo kampa ueli mopaleuiaj akin iuan takuaujtamatij.
32 Jehová sayoj yejua Dios.
Sayoj toDios kemej yeskia se ueyi tet kampa ueli timomatampauiaj.
33 NoTajtsin Dios kemej yeskia se ueyi xolal kampa kuali tatsaktok.Nejua ompa ueli nimopaleuia. Yejua kiajchiua tein nechtsakuilia itech ojti kampa ninejnemi.
34 NoDios kichiua maj nimotalo kemej motaloua se masat.Nechpaleuia maj niyekijkato kampa takes.
35 Yejua nechmachtia keniuj nitateuis.Yejua ika ueli nikixtilana se arco* tein chijchiujtok de cobre hasta maj mokelpacho.
36 Tejua tinechmatampauia ika moescudo para maj amo teyi nechpano.Kemej tiyolyemanik tinechueyitalia.
37 Tinechtachipauia kampa ninejnemi,nejon nechpaleuia maj amo nimometsxolaua.*
38 Nimotalos para nikintokatias akin nechixnamikij uan nikinixpolos.Nimokepas hasta keman nikintamimiktis.
39 Nikinixpolos uan nikintsojtsoniksas* para maj amo moketsakanok.Uetsiskej uan ininpan nitaksas.*
40 Keman nitateuis, tinechpaleuis maj nitaxiko.Tinechpaleuis maj nikintani akin nechixnamikij.
41 Tikchiuas maj akin nechtauelitaj nechcholuikan.Nikinixpolos* akin nechtauelitaj.
42 Yejuan tsajtsiskej para maj kinpaleuikan, sayoj ke amo akin kinmakixtis.Hasta kitsajtsiliskej Jehová maj kinpaleui, sayoj ke yejua amo kinnankilis.
43 Nikinkuechos hasta maj mokauakan kemej talnex.Nikinkuechos uan nikintsojtsoniksas* kemej sokit tein onkak ojti.
44 NoDios, tinechtajtouis keman nechijijtoskej akin nemij kampa ninemi.
Tinechyekpias para maj ueli nikinixyekana akin nemij itech miak altepemej.Nechtekitiliskej hasta akin amo nikinixmati.
45 Akin okseko kayomej moixpilokiuij noixpan.Nechtakamatiskej keman kitekakiliskej tein nikchiua.
46 Akin okseko kayomej mojkakalakiskej* uan kisaskej de kampa motatijtoyaj.Yejuan uiuiyokatiualaskej keman nechitakiuij.
47 ¡Jehová yoltok! ¡Maj tikueyitalikan noDios!
¡Yejua se ueyi tet kampa ueli nimomatampauia!
¡Maj tikueyitalikan noDios, ueyi tet tein nechmakixtia!
48 NoTajtsin Dios kintaxtaualtia akin nechtauelitaj.Kichiua maj nechtakamatikan akin nemij itech okseki xolalmej.
49 Nechmakixtia para maj amo teyi nechchiuilikan akin nechtauelitaj.
NoDios, uejkapan tinechtalia para maj amo ueli nechkitskikan akin nechixnamikij.Tinechmakixtia para maj amo nechtajyouilti akin amo yolkuali.
50 Yejua ika Jehová, nimotasojkamatis ininixtenoj akin nemij itech okseki altepemej.Uan nicantaros* para nikueyitalis motokay.
51 Tikchiuani miak taman para tikmakixtis* tekiuaj akin tikixtalij.Tinechijitak nejua David, uan nochipa tinechnextilis ke tinechtasojtauan no tikinnextilis ke tikintasojta nokoneuan”.
Tajtolmelaualismej
^ Oso “nimocholtia”.
^ Oso “Seol”, kampa moseuijtokej mikemej. Xikonita miketekoch.
^ Oso “nechtsikojka”.
^ Oso “tekol”.
^ Nejin kaltsin chijchiujtoya ika tasal.
^ Oso “moxinianij”.
^ Oso “kampa taueyika”.
^ Oso “nechtasojta”.
^ Itech hebreo, “nimachipauak”.
^ Oso “Amo tiksenkauas”.
^ Oso xa “tiknankilia kemej yeskia amo titamati”.
^ Oso “nipankisa”.
^ Oso “tein ika kitamotaj flechas”.
^ Oso “nimometsalaua”.
^ Oso “nikintejteliksas”.
^ Oso “niktalis nomets”.
^ Itech hebreo, “Nikintentsakuas”.
^ Oso “ininpan nitajtaksas (nikintejteliksas)”.
^ Oso “ixtayouaskej”.
^ Oso “nitatsotsonas”.
^ Oso “tikpaleuis maj tatani”.
