2 Samuel 23:1-39
23 David kijtoj nejin achto ke momikiliskia:
“Nejua David niikoneuj Jesé.Nejua akin Dios nechueyitalij.Nejua akin iDios Jacob nechijitak.Nejua nikteluelita nicantaros inintatsotson israelitas.
2 Jehová nechpaleuij ika ichikaualis para maj nikijto tein kinekia.Nejua nikijtoj tein yejua nechiluij.
3 IninDios israelitas kemej yeskia se ueyi tet,se ueyi tet kampa ueli se momatampauia.
IninDios israelitas nechiluij: ‘Komo se tekiuaj yolmelauak,komo kuali taixyekana porin kimojkatoka Dios
4 itaixyekanalis kemej yeskia tonaltsin tein kualkampa tatanextijtiuits,kemej iluikak keman kualtsin takistok,
kemej tanex tein nesiki keman amo kiouiok,kiouit tein kichiua maj kualtsin taxiujyoua’.
5 Dios kiita ke nejua ijkon nitekiuajti uan ke nochankauan no ijkon tekiuajtiskej.
Yejua motenkauani nouan uan iniuan nochankauan ke titekiuajtiskej, uan tein kijtoua amo mopata.Yejua kijtoj toni kichiuati uan nikyekmattok ke ijkon kichiuas.
Sayoj tein motenkauani kichiuas maj semi niyolpaki uan nechpaleuis maj nimomakixti.Yejua ika Dios kichiuas maj nochankauan momiakilikan.
6 Sayoj ke akin mijmikilomej* kinixpoloua.Kinixpoloua kemej kouit tein uitsyoj tein amo ueli se kikitskia.
7 Komo se takat kineki kikitskis,moneki kikitskis ika se tepos uan ika ikouj se lanza*uan moneki kitamichichinos ompa kampa toktok”.
8 David kinpiaya eyi soldados akin kuali tateuiayaj. Se monotsaya Joseb-Basébet akin tahkemonita uan kinixyekanaya okseki ome soldados. Se tonal Joseb-Basébet kinmiktij 800 takamej ika ilanza.
9 Okse isoldado David katka Eleazar. Itat Eleazar katka Dodó iokichpil Ahohí. Eleazar no katka semej soldados akin kuali tateuiayaj akin iuan yetoyaj David keman kinixnamikkej filisteos. Ijkuak, filisteos mosentilijkaj para kinteuiskej israelitas uan soldados israelitas cholojkej.
10 Sayoj ke Eleazar amo choloj, ta peuak kinmiktia filisteos. Kemej uejkauak kikitskijtoya imachete tein ojkan tenej* matakatstiak uan amo uelikok momamejmelauak. Nejon tonal, Jehová kinpaleuij israelitas maj tatanikan. Eleazar kinmiktijtiaya filisteos uan okseki soldados israelitas kinkuilijtiayaj tein kipiayaj.
11 Okse isoldado David katka Samá iokichpil Agué akin hararita. Keman filisteos mosentilijkej ompa Lehí itech se tal kampa kitokkaj lentejas, soldados israelitas kincholuijkej filisteos.
12 Sayoj ke yejua mokauak tatajko de nejon tal uan kinteuij filisteos para maj amo moaxkatilianij. Kinmiktij filisteos uan ijkon Jehová kinmakixtij israelitas.
13 David kinixtalijka 30 takamej para maj kinixyekanakan isoldados, uan eyi de nejon takamej temokej ompa Adulam kiitatoj David keman motatijtoya* itech se tepekoyok. Kiitatoj keman israelitas kisentilijtoyaj trigo. Ijkuak, seki soldados filisteos kitalijkaj ininkaltsitsin* itech tal tamanis* tein moixmati kemej Refaím.
14 David motatijtoya itech tepekoyok uan seki soldados filisteos kitalijkaj ininkaltsitsin ompa Belén.
15 Uan David kielnamikik ke puertajtenoj de Belén yetoya se ueyi talkoyok tein kichijchiujkej para kisentiliskej at. Yejua ika kijtoj: “¡Majkan nitayiskia* tepitsin at den ueyi talkoyok tein yetok Belén!”.
16 Keman eyi soldados akin kuali tateuiayaj kikakkej tein kijtoj David, yajkej kampa filisteos kitalijkaj ininkaltsitsin. Kinteuijtiajkej filisteos hasta ke ajsikej itech ueyi talkoyok tein yetok tanakastan den puerta ompa Belén, kikixtijkej at uan kiuikilijkej David. Sayoj ke David amo kinekik tayis uan kimimiloj* para kimaktilis Jehová.
17 David kijtoj: “¡Jehová, nejua ipa amo nitayiskia in at! Nejin takamej yajkaj nechkuilitoj maski ueliskia kinmiktiskej. Komo nitayiskia, kemej yeskia nitayitoskia ininesyo”. Yejua ika David amo kinekik tayis. Yejua nejon tein kichiujkej eyi isoldados akin kuali tateuiayaj.
18 Abisái akin katka iikniuj Joab kinixyekanaya okseki eyi soldados. Abisái uan Joab katkaj ikoneuan Zeruyá. Abisái kinmiktij 300 takamej ika ilanza uan semi moteixmatiltijka ijkon kemej Joseb-Basébet, Eleazar uan Samá.
19 Abisái okachi moteixmatiltijka ke okseki ome soldados akin yejua kinixyekanaya. Sayoj ke amo semi kiixmatiaj kemej Joseb-Basébet, Eleazar uan Samá.
20 Benaya akin katka iokichpil Jehoiadá semi yolchikauak katka* uan kichiuak miak taman tein se kimojkaita ompa Cabzeel. Kinmiktij nochin ome ikoneuan Ariel akin kayot Moab, uan se tonal keman tasekuetstoya mokalakij itech se ueyi talkoyok kampa kisentiliayaj at uan kimiktij se león.
21 No kimiktij se ueyi takat kayot Egipto. Benaya sayoj kipiaya se kouit, sayoj ke ueyi takat kipiaya se lanza. Maski Benaya maaktoya sayoj se kouit moteuij iuan egipcio, kikuilij ilanza uan ika kimiktij.
22 Yejua nejin tein kichiuak Benaya iokichpil Jehoiadá, uan no semi kiixmatiaj kemej Joseb-Basébet, Eleazar uan Samá.
23 Maski Benaya okachi moteixmatiltijka ke okseki 30 soldados, kitaniaj Joseb-Basébet, Eleazar uan Samá porin yejuan okachi kinixmatiaj. Sayoj ke David kiixtalij Benaya maj kinixyekana soldados akin kiyekpiayaj.
24 Sekin akin pouiaj iniuan 30 isoldados David katkaj Asahel akin katka iikniuj Joab, Elhanán iokichpil Dodó akin katka kayot Belén,
25 Samá uan Elicá akin katkaj kayomej Harod,
26 Hélez akin katka kayot Bet-Pélet,* Irá iokichpil Iqués akin katka kayot Tecoa,
27 Abí-Ézer akin katka kayot Anatot, Mebunái akin katka kayot Husá,*
28 Zalmón iokichpil Ahoá, Maharái akin katka kayot Netofá,
29 Héleb iokichpil Baaná akin katka kayot Netofá, Ittái iokichpil Ribái akin katka kayot Guibeá. Nejin ueyi xolal kinmakakaj ikoneuan Benjamín.
30 Okseki soldados katkaj Benaya akin katka kayot Piratón, Hidái akin katka kayot Gaas kampa yetoyaj seki ataujmej,
31 Abí-Albón akin katka kayot Bet-Arabá, Azmávet akin katka kayot Bahurim,
32 Eliahbá akin katka kayot Saalbim, ikoneuan Jasén, Jonatán,
33 Samá akin katka hararita, Ahiam iokichpil Sarar akin no katka hararita,
34 Elifélet iokichpil Ahasbái akin katka kayot Maacat, Eliam iokichpil Ahitofel akin katka kayot Guiló,
35 Hezró akin katka kayot Carmelo, Paarái akin katka kayot Arab,
36 Igal iokichpil Natán akin katka kayot Zobá, Baní akin katka kayot Gad,
37 Zélec akin katka kayot Ammón uan Naharái akin katka kayot Beerot. (Naharái kimamaliaya Joab tein ika tateuiaya. Joab katka iokichpil Zeruyá).
38 Okseki soldados katkaj Irá uan Gareb akin katkaj itritas
39 uan Urías akin pouia iniuan ichankauan Het. Sennochia katkaj 37 soldados.
Tajtolmelaualismej
^ Oso “akin amo yolkualmej”.
^ Nejin katka se kouit tein ueyak tein itempan kipiaya se tepos tein puntajyej.
^ Oso “iespada”.
^ Oso “mocholtijtoya”.
^ Nejin kaltsitsin chijchiujtoyaj ika tasal.
^ Oso “takomol”.
^ Oso “Niknekiskia nitayis”.
^ Oso “kitoyauak”.
^ Itech hebreo, “ikoneuj se takat akin semi yolchikauak”.
^ Oso “akin paltita”.
^ Oso xa “iokichpil Husá”.
