2 Samuel 24:1-25
24 Jehová oksepa kualanik iniuan israelitas keman aksa* kichiuak maj David tanauati nejin: “Xikinpoua akin nemij Israel uan Judá”.
2 Joab akin kinixyekanaya soldados yetoya iuan tekiuaj David, yejua ika David kiluij: “Xiouj kampa nemij nochin uejueyi kalyetonij israelitas uan xikinpoua para nikmatis kanachimej.* Xipeua xikinpoua akin nemij Dan uan xitamiti Beer-Seba”.
3 Sayoj ke Joab kiluij tekiuaj David: “Maj toDios Jehová miakpa* kinmiakilti israelitas uan maj kichiua xikitaok. Notekiuaj, ¿keyej tikneki tikinpouas israelitas?”.
4 Sayoj ke tekiuaj amo kikakik Joab nion oksekin akin no kinixyekanayaj soldados. Yejua ika Joab uan akin kinixyekanayaj soldados yajkej kinpouatoj israelitas.
5 Kipanauijkej ueyiat Jordán uan kitalijkej ininkaltsitsin* ompa Aroer, tanakastan* den ueyi xolal tein yetok tatenoj den ueyiat.* Satepan yajkej kampa kintaxejxelouilijkaj ikoneuan Gad uan de ompa yajkej Jazer.
6 Satepan yajkej Galaad uan no yajkej Tahtim-Hodsí. De ompa yajkej Dan-Jaán uan tamalakachojkej para yaskej Sidón.
7 Satepan yajkej ueyi xolal Tiro kampa kuali tatsaktoya. No panokej itech nochi uejueyi xolalmej kampa nemiaj heveos uan kampa nemiaj cananeos. Uan tamitoj ompa Beer-Seba, ueyi xolal tein yetok kampa kintaxejxelouilijkaj ikoneuan Judá tein no moixmati kemej Négueb.
8 Joab uan akin kinixyekanayaj soldados yajkej itech nochi xolalmej kampa nemiaj israelitas. Yejuan ajsitoj Jerusalén keman panokaya chiknaui metsti uan 20 tonalmej.
9 Joab kiluito tekiuaj kanachimej israelitas kinijkuilojka. Ompa Israel nemiaj 800 mil takamej akin ueliaj tateuiayaj ika machete tein ojkan tenej* uan ompa Judá nemiaj 500 mil takamej.
10 Sayoj ke keman kintamipoujkej israelitas, David peuak kiyolkuejmoloua tein kichiuak. Yejua ika kiluij Jehová: “Semi nitajtakolchiuak keman nitanauatij maj kinpouakan israelitas. Noteko Jehová, nimitstataujtia xinechtapojpolui porin niknextij ke amo nitamati”.
11 Ijkuak, tanauatijkej* Gad kimatiltiaya David tein Dios kiitaltiaya. Yejua ika, mostika kualkan keman David meuak, Jehová kinojnotsak Gad uan kiluij:
12 “Xiouj xikiluiti David: ‘Yejua nejin tein kijtoua Jehová: “Nimitstatsakuiltiti. Onkak eyi taman tein uelis nimitschiuilis. Xinechilui katiyejua tikneki”’”.
13 Yejua ika Gad kiitato David uan kiluij: “¿Keniuj tikneki maj Dios mitstatsakuilti? ¿Tikneki maj israelitas chikome xiuit amo kipiakan tein kikuaskej? ¿Tikneki tikincholuijtinemis eyi metsti akin mitstauelitaj? ¿Oso tikneki maj eyi tonal israelitas tamikokolispeuakan?* Kuali xiknemili uan xinechilui toni tikneki maj niknankili akin nechualtitanik”.
14 David kinankilij Gad: “Amo nikmati toni nikchiuas, fiero tein panotok. Okachi kuali maj techtatsakuilti Jehová porin yejua semi teiknelia, sayoj ke maj amo nechtatsakuiltikan takamej”.
15 Uan Jehová kichiuak maj kokolispeuanij israelitas akin nemiaj Dan hasta Beer-Seba. Peuak nejon kualkan uan amo motsakuilij hasta keman Dios kiixtalij, uan mikkej 70 mil israelitas.
16 Keman iángel Dios momamelauak para kinixpolos akin nemiaj Jerusalén, Jehová kiniknelij israelitas* porin kichiuak maj kokolispeuakan. Yejua ika kiluij ángel tein kinixpolojtoya israelitas: “¡Ijkon xikauaya, amo xikinmiktiok!”. Iángel Jehová amo uejka yetoya de ital Arauna kampa kichipauayaj trigo. Arauna katka kayot Jebús.
17 Keman David kiitak ángel tein kinixpolojtoya israelitas, kiluij Jehová: “Nejua nitajtakolchiuak, nejua nimopoloj. In israelitas* amo teyi kichiujkej, ta nejua nitanauatij maj kinpouanij. Yejua ika, nimitstataujtia nejua xinechtatsakuilti uan xikintatsakuilti ichankauan nopaj”.
18 Nejon tonal Gad kiitato David uan kiluij: “Xipankisa ital Arauna akin kayot Jebús, uan xikchijchiuili Jehová se altar kampa kichipauaj xinach”.
19 Uan David pankisak ital Arauna ijkon kemej kinauatijka Gad uan ijkon kemej kinauatijka Jehová.
20 Keman tekiuaj uan itakeualuan pankistoyaj, Arauna kinpanitak, niman kinnamikito uan motankuaketsak iixpan tekiuaj uan moixpiloj hasta talpan.
21 Arauna kitajtanij* tekiuaj: “¿Keyej tinechitako noteko?”. David kinankilij: “Nimitskouiliko tal kampa tikchipaua trigo para nikchijchiuilis Jehová se altar uan maj amo kisentokaok techtatsakuilti”.
22 Sayoj ke Arauna kiluij David: “Nimitstayokolia notekiuaj uan xikchiua tein tikixtalijtok tikchiuas.* No nimitsintayokolia kuakuejmej para tikinchichinouilis Dios uan kouit* para titaxotaltis.*
23 Nimitstayokolia* nochi nejin notekiuaj”. Uan Arauna no kijtoj: “Maj toDios Jehová mitstatiochiui”.
24 Sayoj ke tekiuaj kinankilij Arauna: “Amo xinechtayokoli motal, ta maj nimitsixtauili. Amo nikchichinouilis toDios Jehová tapialmej tein amo nikinixtauani”. Yejua ika David kikouilij Arauna ital uan ikuakuejuan uan kiixtauak tajko kilo* plata.
25 Uan David kichijchiuilij Jehová se altar, kichichinouilij tapialmej uan kimaktilij okseki taman para sentakuaskej.* Jehová kikakik David keman kitataujtij maj amo kintatsakuiltiok israelitas. Uan israelitas amo mikkejok.
Tajtolmelaualismej
^ Oso “akin”, “akaj”.
^ Nikan ika motajtoua takamej israelitas akin kiajxitijkajya xiujmej para ueliskia mochiuaskej soldados.
^ Itech hebreo, “se cientojok”.
^ Nejin kaltsitsin chijchiujtoyaj ika tasal.
^ Oso “kampa sur”.
^ Nikan xa ika motajtojtok ueyiat (atauit, ojpanat) Arnón.
^ Oso “espada”.
^ Xikonita tanauatijkej.
^ Oso “tamikokoxkakuikan”.
^ Oso “semi motayokoltij”.
^ Itech hebreo, “Nejin ichkamej (borregos)”.
^ Oso “kitajtoltij”.
^ Itech hebreo, “tein tikitas ke kuali yetok”.
^ Nejin katka kouit tein kinkechtaliliayaj kuakuejmej uan tein kititilatsayaj keman kichipauayaj xinach.
^ Oso “titichiuas”.
^ Itech hebreo, “Arauna kitemaka”.
^ Itech hebreo, “50 siclos”. Xikonita B14.
