2 Samuel 3:1-39
3 Akin kinpaleuiayaj ikoneuan Saúl uan akin kipaleuiayaj David kisentokayaj moteuiayaj. Mojmostaj okachi momiakiliayaj akin kipaleuiayaj David, sayoj ke akin kinpaleuiayaj ikoneuan Saúl tsinkistiayaj.
2 Keman David nemia ompa Hebrón, yolkej nejin ikoneuan: akin tayekanaya monotsaya Amnón uan inan monotsaya Ahinoam akin kayot Jezreel.
3 Okse iokichpil David akin kitojtokaya* Amnón monotsaya Kileab uan inan monotsaya Abigaíl. Abigaíl katka isiuatsin Nabal akin kayot Carmelo, sayoj ke Nabal momikilijkaya. Okse iokichpil David monotsaya Absalón uan inan monotsaya Maacá. Maacá katka iichpoch Talmái akin tekiuajtia Guesur.
4 Okse iokichpil David monotsaya Adonías uan inan monotsaya Haguit. Okse iokichpil monotsaya Sefatías uan inan monotsaya Abital.
5 Uan okse iokichpil David monotsaya Itream uan inan monotsaya Eglá. Yejuan nejin ikoneuan David akin yolkej Hebrón.
6 Akin kinpaleuiayaj ikoneuan Saúl uan akin kipaleuiayaj David kisentokayaj moteuiayaj. Uan Abner kitemoj maj okachi miakej ichankauan Saúl kipaleuianij.
7 Saúl kipiak okse isiuatsin* akin monotsaya Rizpá akin katka iichpoch Ayá. Se tonal, Is-Bóset kiixiluij Abner: “¿Keyej timotekak iuan Rizpá akin katka isiuatsin nopaj?”.
8 Abner tel kualanik keman Is-Bóset kiluij nejon uan kinankilij: “¿Xe tinechita kemej se itskuinti* tein nemi Judá? Nejua nochipa niknextiani ke nikintasojta ikoneuan mopaj Saúl. No niknextiani ke nikintasojta iikniuan uan akin kuali iuan mouikayaj. Uan amo nimitstemaktiani iuan David para maj mitsmikti. Maski ijkon nikchiuani, axkan tinechajuatok porin nimotekak iuan se siuat.
9 Maj Dios semi nechtatsakuilti* komo amo nikpaleuia David para maj mochiua tein Jehová iuan motenkauak.
10 Yejua motenkauak ke ikoneuan Saúl amo tekiuajtiskiajok, ta kiixtaliskia David maj tekiuajti. David kinixyekanaskia akin nemiaj Israel uan Judá, desde Dan hasta Beer-Seba”.
11 Is-Bóset amo teyi kinankilijok Abner porin kimouiliaya.
12 Abner niman kintitanik seki takamej maj kiluitij David: “¿Xe amo nejua nitaixyekana nikan Israel?”. Uan no kiluijkej: “Ximotenkaua nouan ke kuali timouikaskej, uan nimitspaleuis maj mitstojtokakan nochin akin nemij nikan Israel”.
13 David kinankilij: “Kuali yetok, nikchiuas tein tikijtoua. Sayoj nikneki nimitstajtanis se taman. Uelis tinechitakiuj sayoj komo tikualkui Mical, iichpoch Saúl”.
14 Satepan David kintitanik seki takamej maj kiluitij Is-Bóset akin katka iokichpil Saúl: “Xinechmaka nosiuatsin Mical. Nejua uelik iuan nimonamiktij keman nikinmiktij 100 filisteos uan nikuikak tein kinextij* ke nikinmiktijka”.
15 Mical kinamiktijkaj iuan Paltiel iokichpil Lais. Keman David kiluij maj kikepili isiuatsin, Is-Bóset tanauatij maj kikuilitij.
16 Sayoj ke Paltiel kitojtokatiajki uan kichokilijtiajki hasta Bahurim. Yejua ika Abner kiluij: “Ximokepa mochan”. Uan Paltiel mokepak ichan.
17 Abner tanauatijka maj kiniluitij taixyekananij israelitas: “Uejkaujya nankinekij maj David namechixyekana.
18 Uan axkan, xikixtalikan maj mochiua namotekiuaj porin Jehová kiluij David: ‘Nikchiuas maj notekitikauj David kinmakixti nochin israelitas. Yejua kinpaleuis israelitas maj filisteos amo teyi kinchiuilikanok nion oksekin akin kintauelitaj’”.
19 Satepan Abner kinnojnotsato akin pouiaj iniuan ikoneuan Benjamín. No yajki Hebrón kiitato David para kiluis tein motenkaujkaj akin nemiaj Israel uan nochin akin pouiaj iniuan ikoneuan Benjamín.
20 Keman Abner kiitato David ompa Hebrón no iuan yajkej 20 takamej. Uan David kichiuak se tatakualis para Abner uan takamej akin iuan yayaj.
21 Uan Abner kiluij David: “Notekiuaj, xinechkaua maj nikinsentiliti nochin akin nemij Israel para maj motenkauakan ke tejua mitstojtokaskej. Uan sayoj tejua titaixyekanas itech nochi xolal Israel”. David kikauak maj youi uan Abner yajki.
22 Joab uan isoldados David yajkaj tateuitoj keman Abner kiitato David. Keman Abner yajki, yejuan mokeptoyajya uan kiualkuiaj miak taman tein kinkuilijkaj akin kinteuitoj. Abner amo yetoyaok Hebrón porin David kikaujka maj youi.
23 Keman Joab uan nochin soldados ajsikej, aksa* kiluij Joab: “Abner iokichpil Ner kiitako tekiuaj David. Yejua amo teyi kichiuilij uan kikauak maj youi”.
24 Yejua ika Joab kiitato tekiuaj uan kiluij: “Abner mitsitako uan amo teyi tikchiuilij, ta tikauak maj youi. ¿Keyej amo teyi tikchiuilij?
25 ¿Xe amo tikixmati Abner iokichpil Ner? Yejua ualaj mitskajkayauako. Kinekia kimatis toni tikchiujtok uan toni tiknemilijtok tikchiuas”.
26 Satepan Joab yajki uan kintitanik seki takamej maj kitemotij Abner. Yejuan kiajsitoj ompa Sirá kampa yetok se ueyi talkoyok tein kichijchiujkaj para kisentiliskej at uan Abner iniuan mokepak. Sayoj ke David amo kimatik tein Joab kichiuak.
27 Keman Abner ajsik Hebrón, Joab kiluij maj kalaki itech ueyi xolal para iuan tajtos kampa amo akin kinkakiskia. Sayoj ke keman ompa yetoyajya, kipoxtokilij imachete tein ojkan tenej* uan Abner mikik. Yejua kimiktij porin Abner kimiktijka Asahel, akin katka iikniuj Joab.
28 Keman David kimatik tein Joab kichiujka, kijtoj: “Jehová kimati ke nejua uan akin nikinixyekana amo titapaleuijkej keman kimiktijkej Abner iokichpil Ner.
29 Maj nochipa kitatsakuiltikan Joab uan nochin ichankauan itat. Maj semej takamej akin ichankauj kipia lepra oso okse taman kokolis,* oso maj amo ueli nejnemi,* oso maj kimiktikan ika machete tein ojkan tenej oso maj amo kipia tein kikuas”.
30 Keman moteuijkej ompa Gabaón, Abner kimiktij Asahel ininikniuj Joab uan Abisái. Yejua ika yejuan kimiktijkej Abner.
31 David kiluij Joab uan takamej akin iuan yetoyaj: “Xiktsayanakan namotasal, ximotalilikan tasal tein teajuayotia uan xikchokilikan Abner”. Uan tekiuaj David no kintojtokatiaya akin kimamajtiayaj Abner para kitokaskej.
32 Kitokkej Abner ompa Hebrón uan tekiuaj David peuak chikauak kichokilia ompa. Uan nochin israelitas no peuak chokaj.
33 Tekiuaj David kicantarouilij Abner nejin tatsotson:
“Amo kinamikia kimiktiskej Abner ijkon kemej kimiktijkej.
34 Amo timaijilpitoya*nion timetsijilpitoya* ika cadenas.*
Mitsmiktijkej kemej akin kiichtakauiaj temiktianij”.
Keman tamicantaroj, nochin oksepa peuak chokaj.
35 Keman tonayanok katka, nochin kiitatoj David para kitataujtiskej maj takua, sayoj ke David kijtoj: “¡Maj Dios semi nechtatsakuilti komo nikua pantsin oso okse taman achto ke tapoyauis!”.
36 Nochin kikakkej tein kijtoj uan kiuelitakej. Nochi tein kichiuaya tekiuaj David kiuelitayaj.
37 Nejon tonal, nochin akin nemiaj Judá uan Israel kimatkej ke tekiuaj David amo tapaleuij maj kimiktianij Abner iokichpil Ner.
38 Uan tekiuaj kiniluij itakeualuan: “Nejin tonal mikik se taixyekankej akin semi ueyichiujkej katka.
39 Maski nechixtalijkej kemej tekiuaj, nikmachilia ke amo nichikauak para nikinixnamikis ikoneuan Zeruyá. Nejin takamej semi amo yolkualmej. Maj Jehová kitatsakuilti akin kichiua tein amo kuali”.
Tajtolmelaualismej
^ Oso “kitoktiliaya”.
^ Xikonita tajtol okse siuatsin.
^ Itech hebreo, “itsontekon se itskuinti”.
^ Itech hebreo, “semi kitatsakuilti Abner”.
^ Oso “tsikitsin ininnakayo filisteos kampa kinextia ke takamej”.
^ Oso “akin”, “akaj”.
^ Oso “iespada”.
^ Oso “kokoxkayot”. Nikan ika motajtoua se takat akin mokokoua porin temaloua kampa moxixa (motapiasoua).
^ Nikan ika motajtoua se takat akin amo ueli youi tateuiti uan sayoj ueli kichiua tekit tein kichiua se siuat.
^ Oso “Amo timatsijtsikaujtoya”.
^ Oso “nion timetstsijtsikaujtoya”.
^ Itech hebreo, “cobre”.
