2 Samuel 5:1-25
5 Panok tiempo uan nochin uejueyi kalyetonij israelitas ualajkej Hebrón kiitakoj David uan kiluijkej: “Tejua titopariente,* yejua ika tiualajkej timitsitakoj.
2 Keman Saúl tekiuajtitoya, ipa tejua tikinixyekanaya soldados israelitas keman yayaj tateuitij. Uan Jehová mitsiluij: ‘Tejua tikinyekpias israelitas akin pouij itech noxolal uan tikinixyekanas’”.
3 Nochin taixyekananij israelitas ualajkej Hebrón kiitakoj tekiuaj David. David kiniluij ke yejua yeskia inintekiuaj uan Jehová kikaktoya tein kijtoj. Satepan kikuatekilijkej aceite uan kiixtalijkej kemej inintekiuaj israelitas.
4 David kipiaya 30 xiujmej keman kiixtalijkej kemej tekiuaj, uan taixyekanak 40 xiujmej.
5 Keman yetoya Hebrón kinixyekanak ikoneuan Judá chikome xiuit uan chikuasen metsti. Uan ompa Jerusalén kinixyekanak 33 xiujmej ikoneuan Judá uan nochin okseki uejueyi kalyetonij.
6 Tekiuaj David uan isoldados yajkej Jerusalén kinteuitoj jebuseos akin ompa nemiaj. Sayoj ke jebuseos kikejkelojkej David uan kiluijkej: “¡Amo keman timoaxkatilis nejin ueyi xolal! Hasta koxojmej uan akin amo ueli tachiaj mitstokaskej”.* Jebuseos moluiayaj ke David amo keman ueliskia mokuilis ininueyi xolal.
7 Sayoj ke David moaxkatilij ueyi xolal Sion kampa kuali tatsaktoya, tein axkan moixmati kemej ueyi xolal tein iaxka David.
8 Nejon tonal David kijtoj: “Maj soldados akin kinteuitij jebuseos nalpanokan kampa moojtia at. Maj ompa panokan para kinmiktiskej ‘koxojmej uan akin amo tachiaj’, akin nikintauelita”. Yejua ika nochin peuak kijtouaj desde ijkuak: “Koxojmej uan akin amo tachiaj amo keman kalakiskej kalijtik”.
9 David mokaltalij itech nejon ueyi xolal kampa kuali tatsaktoya, tein kitokaytijkej* ueyi xolal tein iaxka David. No kichijchiuak uejueyi tepamit uan uejueyi kalmej itech nochi ueyi xolal hasta tepetsin tein moixmati kemej Miló.*
10 David mochiuak se tekiuaj akin semi ueyichiujkej uan Jehová, Dios akin kinixyekana iangeluan nochipa kipaleuiaya.
11 Hiram akin tekiuajtia Tiro kintitanik seki takamej maj kiitatij David. No kititanilij cedrojkouit uan kintitanik koujxijximanij uan kalchiuanij para kichijchiuaskej uejueyi tepamit. Yejuan peuak kichijchiuiliaj David se ueyi kali.
12 Uan David kiajsikamatik ke Jehová kiixtalijkaya maj nochipa yejua tekiuajti itech xolal Israel, uan ke kintatiochiuijtoya israelitas akin kinixyekanaya. Dios kichiuak nejon para kinpaleuis israelitas.
13 Keman David kisak de Hebrón uan mokaltalij Jerusalén monamiktij iniuan okseki siuamej.* No mochiujkej isiuauan seki siuamej akin kitekitiliayaj. Iniuan kinpiak okseki iokichpipiluan uan isiuapipiluan.
14 Ikoneuan David akin yolkej Jerusalén monotsayaj Samúa, Sobab, Natán, Salomón,
15 Ibhar, Elisúa, Néfeg, Jafía,
16 Elisamá, Eliadá uan Elifélet.
17 Keman filisteos kimatkej ke israelitas kiixtalijkaj David kemej tekiuaj itech xolal Israel, pankiskej para kiteuiskej. Keman David kimatik, yajki* kampa amo teyi kichiuiliskiaj.
18 Filisteos ajsikej itech tal tamanis* tein moixmati kemej Refaím uan moxejxelojkej para tateuiskej.
19 David kitajtanij* Jehová: “¿Maj nipankisa nikinteuiti filisteos? ¿Tinechpaleuis maj nikintani?”. Jehová kinankilij: “Kemaj, xipankisa xikinteuiti filisteos uan nimitspaleuis xikintani”.
20 Yejua ika David yajki Baal-Perazim para kinteuis filisteos uan kintanik. Uan David kijtoj: “Jehová kintanik akin nechtauelitaj, kemej se tepamit tein xitini porin at kikuitikisa”. Yejua ika ompa tatokaytij Baal-Perazim.*
21 Filisteos ompa kinkaujteujkej inintatadiosuan,* uan David uan isoldados kinuikakej para kinixpoloskej.
22 Satepan filisteos oksepa pankiskej para kinteuiskej israelitas uan moxejxelojkej itech tal tamanis tein moixmati kemej Refaím.
23 David oksepa kitajtanij Jehová toni maj kichiua, sayoj ke yejua kinankilij: “Amo xipankisa para tikinixnamiktias, ta xitayoualoti kampa yetokej koujmej bacá* para tikinteuis desde ompa.
24 Uan keman tikakis ke ininkuapan koujmej bacá mokaki kemej yeskia miak soldados tajtaksatiuitsej,* ijkuak peua xikinteui soldados filisteos porin nejua Jehová nimitsyekantias para tikintanis”.
25 Uan David kichiuak nochi tein Jehová kinauatij. Kinteuijtiajki filisteos desde Gueba hasta Guézer uan kintanik.
Tajtolmelaualismej
^ Itech hebreo, “titoomiyo uan titonakayo”.
^ Oso “mitseualtiskej”.
^ Oso xa “yejua kitokaytij”.
^ Nejin tajtol hebreo xa kijtosneki se tepetsin tein kichijchiujkej keman kimontontenkej miak tal.
^ Xikonita tajtol okse siuatsin.
^ Itech hebreo, “temok”.
^ Oso “takomol”.
^ Oso “kitajtoltij”.
^ Tokayit tein kijtosneki ‘akin tatapojtiuj’.
^ Oso “inintiotsitsin”.
^ Oso “bekja”.
^ Oso “tateliksatiuitsej”, “tatsoniksatiuitsej”.
