2 Samuel 7:1-29
7 Keman tekiuaj David yetoyaya ichan uan kualtsin nemiaya porin Jehová kichiujka maj amo kiixnamikikanok akin kitauelitayaj,
2 kiluij tanauatijkej* Natán: “Nejua kualtsin ninemi itech se kali tein chijchiujtok ika cedrojkouit, sayoj ke tatiochiualkaxon* tein iaxka toTajtsin Dios yetok itech se kaltsin”.*
3 Natán kinankilij tekiuaj: “Xikchiua tein tiknemilijtok porin Jehová mitspaleuia”.
4 Sayoj ke nejon youak Jehová kinojnotsak Natán uan kiluij:
5 “Xiouj xikiluiti notekitikauj David: ‘Yejua nejin tein kijtoua Jehová: “¿Tiknemilia ke tejua mitsnamiki xinechchijchiuili se kali kampa nechueyichiuaskej?
6 Desde ke nikinkixtij israelitas de Egipto hasta axkan, amo keman nikpiani se kali kampa nechueyichiuaskej, ta nochipa nechueyichiuanij* itech se kaltsin tein miakkan kiuikatinemij.
7 Nochi nejon tiempo keman nikinixyekanak israelitas, nejua nikixtalij katiyejua de nochin uejueyi kalyetonij taixyekanaskia itech noxolal. ¿Kemansa tikakik maj nikintajtaniani semej nejon uejueyi kalyetonij maj nechchijchiuilikan se kali de cedrojkouit?”’.
8 No xikilui notekitikauj David: ‘Yejua nejin tein kijtoua Jehová akin kinixyekana iangeluan: “Tejua tikinpixtinemia ichkamej* ne ixtauat, sayoj ke nimitskixtij de ompa para tikinixyekanas israelitas akin pouij itech noxolal.
9 Uan nochipa nimitspaleuis kampa yeski tias. Moixpan nikinixpolos nochin akin mitstauelitaj. Uan nikchiuas maj no miakkan mitsixmatikan ijkon kemej kinixmatij okseki uejueyi chiuanimej.
10 Nikinmakas israelitas akin pouij itech noxolal se tal tein yeski ininaxka. Yejuan kualtsin nemiskej ompa uan amo akin kinkuejmolosok. Akin amo yolkualmej amo kintajyouiltiskejok kemej achto kintajyouiltijkaj.
11 Israelitas akin pouij itech noxolal kintajyouiltijkej desde keman nikinixtalij jueces para maj kinixyekanakan. Uan nikchiuas maj amo teyi mitschiuilikanok akin mitstauelitaj.
”’”Uan nejua Jehová no nimitsiluij ke nejua Jehová nikchiuas maj mokoneuan nochipa tekiuajtikan.*
12 Keman timikis,* nikixtalis semej mokoneuan maj mitsixpata uan maj mochiua tekiuaj, uan nikchiuas maj nochipa yejua tekiuajti.
13 Yejua nechchijchiuilis se kali para kiueyichiuaskej notokay uan nikchiuas maj nochipa yejua tekiuajti.
14 Nejua niyeski niitat uan yejua yeski nokoneuj. Keman kichiuas tein amo kuali, nejua nikmagas para niktatsakuiltis ijkon kemej tetatsakuiltiaj takamej.*
15 Nejua nochipa niktasojtas* uan amo keman nikauas ijkon kemej nikauak Saúl, akin nikixpatak kemej tekiuaj para nimitsixtalis tejua.
16 Nikchiuas maj mokoneuan nochipa tekiuajtikan, uan motaixyekanalis amo keman ixpoliuis”ʼ”.
17 Natán kimatiltij David nochi tein Dios kiluijka uan kinextilijka.
18 Keman Natán tamitajtoj, tekiuaj David yajki uan motalij para kitataujtis Jehová uan kiluij: “NoUeyi Teko Jehová, tejua semi tinechpaleuiani maski nejua uan nochankauan amo teyi tichiuanimej.
19 Uan amo sayoj yejua tikchiuani noUeyi Teko Jehová, ta no tikijtoua ke nokoneuan miak tiempo tekiuajtiskej. Uan amo akin uelis kipatas nejon noUeyi Teko Jehová.
20 Tejua kuali tinechixmati nejua David nimotekitikauj. Yejua ika ¿toni uelisok nimitsiluis noUeyi Teko Jehová?
21 Tikchiuani nochi nejin tein semi kualtsin uan tinechmatiltiani porin yejua tein tikneki. Uan yejua nejon tein timotenkauak.
22 Tejua semi tichikauak noUeyi Teko Jehová. Amo akin kemej tejua. Sayoj tejua yekmelauj tiDios. Nochi tein tikakinij kinextia ke melauj nejin.
23 Amo onkak okse xolal kemej moxolal Israel. NoDios, tejua tikinmakixtito de Egipto porin tikinijitak para maj mochiuakan moxolal. Tikchiuak miak milagros keman tikinkixtijtiajki akin nemiaj itech okseki altepemej para maj ompa nemikan akin pouij itech moxolal, uan no tikinixpoloj inintatadiosuan.* Ijkon tikchiuak maj miakej mitsixmatikan uan maj mitstakachiuakan.
24 Tikchiuak maj israelitas mochiuakan moxolal nochipaya, uan tejua Jehová timochiuak ininDios.
25 ”Jehová Dios, tikijtoj ke nejua uan nokoneuan titekiuajtiskej, yejua ika amo keman xikpata tein timotenkauak uan nimitstataujtia ijkon xikchiua.
26 Maj nochin kiueyitalikan motokay nochipaya uan maj kijtokan: ‘Jehová akin kinixyekana iangeluan yejua ininDios israelitas’. Uan xikinpaleui nokoneuan para maj miak tiempo tekiuajtikan.
27 Porin tejua Jehová, ininDios israelitas akin tikinixyekana moangeluan, tinechmatiltij ke tikchiuas maj nokoneuan nochipaya tekiuajtikan.* Yejua ika noteko amo nimoui nimitstataujtis.
28 NoUeyi Teko Jehová, tejua yekmelauj tiDios uan nochipa tikijtoua tein melauj. Uan timotenkauani nouan ke tikchiuas nochi nejin tein tinechiluij.
29 Yejua ika nimitstataujtia xikintatiochiui nochankauan uan maj nochipa mitsyolpakti tein kichiuaj, porin tejua noUeyi Teko Jehová timotenkauak ke ijkon tikchiuas. Uan nochipaya xikintatiochiui nochankauan para maj nochipa kuali nemikan”.
Tajtolmelaualismej
^ Xikonita tanauatijkej.
^ Xikonita tatiochiualkaxon.
^ Nejin kaltsin chijchiujtoya ika tasal.
^ Itech hebreo, “ninentinemini”.
^ Oso “borregos”.
^ Oso “nimitschijchiuilis se kali”.
^ Itech hebreo, “timoseuitiuj iniuan mouejkaujtatuan”.
^ Oso xa “ikoneuan Adán”.
^ Oso “niknextilis ke niktasojta”.
^ Oso “inintiotsitsin”.
^ Oso “tinechchijchiuilis se kali”.
