2 Samuel 8:1-18
8 Panok tiempo uan David kinteuij filisteos uan kintanik. No kinkuilij tal tein moixmati kemej Meteg-Amá.
2 David no kintanik moabitas uan kiniluij maj motekanij talpan uan exkan kinxejxeloj.* Ome oloch kinmiktiskiaj uan okse oloch amo teyi kinchiuiliskiaj. Moabitas peuak kitekitiliaj David uan kimakayaj tomin uan okseki taman tein kiixtalijka maj kimakakan.
3 Keman Hadadézer yaya oksepa moinaxkatiliti talmej tein yetokej tanakastan den ueyiat Éufrates, David kiteuij uan kitanik. Itat Hadadézer katka Rehob uan tekiuajtia Zobá.
4 David kikuilij Hadadézer 1,700 soldados akin yayaj itech caballos uan 20 mil soldados akin metsnejnemiaj. No kinkoxojkuiltij* caballos tein kitilantiayaj carros uan sayoj 100 caballos amo teyi kinchiuilij.
5 Keman sirios akin nemiaj Damasco kipaleuikoj Hadadézer akin tekiuajtia Zobá, David kinmiktij 22 mil sirios.
6 Uan David kintitanik seki soldados maj tajpiatij Siria tein poui Damasco. Uan sirios peuak kitekitiliaj David uan kimakayaj tomin uan okseki taman tein kiixtalijka maj kimakakan. David nochipa tatania kampa yaya tateuiti porin Jehová kipaleuiaya.*
7 Uan no, David kinkuilij ininescudos itekitikauan Hadadézer. Nejon escudos tein katkaj de oro uan youaltikej kinuikak Jerusalén.
8 Uan tekiuaj David no kiuikak miak cobre tein onkaya Bétah uan Berotái. Tekiuaj Hadadézer achto taixyekanaya itech nejon uejueyi xolalmej.
9 Satepan, Toi akin tekiuajtia Hamat kitekakilij ke David kintanka nochin isoldados Hadadézer.
10 Yejua ika Toi kiualtitanik Joram akin katka iokichpil maj kiitaki tekiuaj David uan maj kitajtani ox paktok. No kinauatij maj kilui ke yolpakia porin kiteuijka Hadadézer uan kitanka. (Toi semi yolpakia porin Hadadézer miakpa kiteuijka). Joram kiualkuilij David miak taman tein chijchiujtoya ika plata, oro uan cobre.
11 Tekiuaj David kimaktilij Jehová nochi nejon plata, oro uan cobre, ijkon kemej kichiujka ika plata uan oro tein kinkuilijka akin nemiaj itech okseki altepemej.
12 Yejua kinkuilijka ininplata uan ininoro sirios, moabitas, ammonitas, filisteos uan amalequitas. No kikuilijka miak taman Hadadézer iokichpil Rehob akin tekiuajtia Zobá.
13 David no miakkan kiixmatkej porin kinmiktij 18 mil edomitas itech tal tamanis* tein moixmati kemej Sal.
14 David kintitanik seki soldados ompa Edom para maj tajpiakan itech nochi ueyi xolal, uan nochin edomitas peuak kitekitiliaj. David nochipa tatania kampa yaya tateuiti porin Jehová kipaleuiaya.*
15 David kisentokak kinixyekanak nochin israelitas. Keman israelitas kiixpantiliayaj teisa, kuali kiixtaliaya tein kinamikia mochiuas uan kichiuaya tein kuali.
16 Joab iokichpil Zeruyá kinixyekanaya nochin isoldados David, uan Jehosafat iokichpil Ahilud kijkuilouaya nochi tein mochiuaya itech altepet.
17 Sadoc uan Ahimélec katkaj tiopixkamej uan Seraya katka tajkuilojkej. Itat Sadoc katka Ahitub uan itat Ahimélec katka Abiatar.
18 Benaya iokichpil Jehoiadá kinixyekanaya soldados akin kiyekpiayaj tekiuaj.* Uan ikoneuan David katkaj uejueyi chiuanimej.*
Tajtolmelaualismej
^ Oso “uan kintamachiuak ika se mekat”.
^ Oso “kinkotstejtekik”.
^ Oso “kimakixtiaya”.
^ Oso “takomol”.
^ Oso “kimakixtiaya”.
^ Itech hebreo, “keretitas uan peletitas”.
^ Itech hebreo, “tiopixkamej”.
