2 Timoteo 4:1-22
4 Cristo Jesús kiixtalis tein kinnamiki kiseliskej akin yoltokej uan akin momikilijkejya keman senkis monextis uan keman yetos itech iTaixyekanalis. Iixpan Cristo Jesús uan iixpan Dios nimitsyeknauatia nejin:
2 xikteixmatilti itajtol Dios, nochipa xiktayekanalti keman nochi kuali yetok uan keman amo; xiknexti tein amo kuali yetok, xitetakaualti uan xiteyolmajxiti. Keman tikchiuas nejin amo xiyolijsiui uan kuali xitamachti.
3 Porin ejkos tonal keman yejuan amo kinekiskej kikakiskej tamachtilis tein kuali,* ta kichiuaskej tein sayoj yejuan kinejnekiskej uan kintemoskej tamachtianij akin kiniluiskej tein yejuan kinekiskej kikakiskej.
4 Amo kikakiskejok tein melauak ta kikakiskej tein amo melauak tein tetapouiskej.
5 Sayoj ke tejua xiksentoka xiyektalnamikto itech nochi, xikxiko nochi ouijkayomej, xikteixmatilti kuali tanauatilmej* uan xikyektekitili Dios.
6 Porin nimotemakatokya kemej vino tein kimaktiliayaj Dios tein kipantekayaj itech altar, uan ejkotokya tonal keman nimikis.*
7 Nitateuijya kemej se kuali soldado, nitamitsikuinikya uan niksentoka nitakuaujtamati.
8 Desde axkan toTekotsin akin kiixtalia nochi kemej moneki, nechxelouilij se corona. Nejin corona kiseliaj akin yolmelaujkej. Yejua nechtaxtauis ika nejin itech nejon tonal. Uan amo sayoj nejua, ta no nochin akin semi kichixtokej* maj monexti.
9 Xikchiua nochi tein tiuelis para niman tinechitakiuj.
10 Porin Demas nechkaujteuak. Yejua okachi kiuelitak tein onkak nikan taltikpak* uan yajki Tesalónica; Crescente yajki Galacia uan Tito yajki Dalmacia.
11 Sayoj Lucas nouan yetok. Maj mouan uiki Marcos porin yejua semi nechpaleuis maj niktekitili Dios.
12 Tíquico niktitanik Éfeso.
13 Keman tiualas, xikualkui nopantaken tein nikualkaujteuj ichan Carpo ompa Troas. No xikinualkui amatajkuilolmej,* okachiok nikneki xinechualkuili tein ijkuiliujtok itech kuetax.
14 Alejandro akin tamachijchiua ika cobre, semi nechtajyouiltij. Jehová* kimakas tein kinamiki.
15 Tejua no ximoyekpia, porin yejua semi kiixnamikik tein tikteixmatiltiaj.
16 Keman yekinika nimotajtouij ininixpan tekiuanij amo akin nechpaleuij, ta nochin nechkaujteujkej. Maj Dios kintapojpolui.
17 Sayoj ke toTekotsin kemaj nechpaleuij uan nechyolchikauak para maj nikteixmatilti nochi tein kijtoua itajtol Dios uan maj kikakikan akin nemij itech nochin altepemej, uan nechmakixtij para maj amo nechkua tekuani.
18 ToTekotsin nechpaleuis itech nochi tein amo kuali uan nechmakixtis para nechuikas itech iTaixyekanalis ne iluikak. Yejua kinamiki maj kiueyitalikan nochipaya. Maj ijkon mochiua.*
19 Xinechintajpalouili Prisca uan Áquila uan akin nemij ichan Onesíforo.
20 Erasto mokauak Corinto, uan Trófimo nikauak ompa Mileto porin mokokouaya.
21 Xikchiua nochi tein tiuelis para tiejkos achto ke taseseyas.
Eubulo, Pudente, Lino, Claudia uan nochin tokniuan mitstajpalouaj.
22 Maj toTekotsin kitiochiua kuali tanemilil tein tiknextia. Maj Dios namechmaka itatiochiualis tein amo technamiki.
Tajtolmelaualismej
^ Oso “tepaleuia”.
^ Oso “tajtolmej”.
^ Oso “nechmakixtiskej”.
^ Oso “kichatokej”.
^ Xikonita tonalmej; tein mochiujtok.
^ Itech griego, “amatatetekuinolmej”. Xikonita amatatetekuinol.
^ Oso “Amén”.
