Génesis 11:1-32
11 Itech nejon tonalmej, nochin akin nemiaj itech taltikpak tajtouayajok sayoj se taman tajtol.
2 Keman yajtiayaj kampa ika ualkisa tonaltsin, kiixajsitoj se tal tamanis* tatajko de seki tepemej ompa Sinar, uan ompa mokaltalijkej.
3 Uan moiluijkej: “Maj tikchijchiuakan tabiques uan maj tikintakuaualtikan ika tit”.* Yejua ika kikuikej tabiques kemej tet uan kikuikej chapopote* para ika tapepechoskej.
4 Uan kijtojkej: “Maj tikchijchiuakan se ueyi xolal uan se kali tel uejkapantik tein ajsis hasta iluikak. Ijkon kampa yeski techixmatiskej uan amo timomoyauaskej* itech nochi taltikpak”.
5 Jehová kiitato* ueyi xolal uan ueyi kali tein kichijchiujtoyaj.
6 Uan Jehová kijtoj: “Kemej mosenpaleuiaj uan tajtouaj sayoj se tajtol, xikita toni peuak kichiuaj. Axkan amo teyi kintsakuilis maj kichiuakan tein yeski taman tein kiixtaliskej.
7 Maj tikinpapatilitij inintajtol para tikinpojpoloskej uan maj amo ueli monojnotsakan”.
8 Yejua ika Jehová desde ompa kinmoyauak itech nochi taltikpak, uan yolik kikaujtiajkej tekit uan amo kichijchiujkejok ueyi xolal.
9 Yejua ika nejon ueyi xolal monotsak Babel,* porin Jehová ompa kinpojpoloj nochin uan kichiuak maj tajtouanij tataman tajtolmej. Uan desde ompa Jehová kinmoyauak itech nochi taltikpak.
10 Nikan ika motajtoua Sem.
Keman Sem kipiaya 100 xiujmej, kipiak se okichpil akin kitokaytij Arpaksad, ome xiuit satepan ke tetsaujkakiouik.
11 Satepan ke kipiak Arpaksad, Sem nemikok 500 xiujmej. Uan kinpiak okseki okichpipil uan siuapipil.
12 Keman Arpaksad kipiaya 35 xiujmej, kipiak se okichpil uan kitokaytij Selá.
13 Satepan ke kipiak Selá, Arpaksad nemikok 403 xiujmej. Uan kinpiak okseki okichpipil uan siuapipil.
14 Keman Selá kipiaya 30 xiujmej, kipiak se okichpil uan kitokaytij Éber.
15 Satepan ke kipiak Éber, Selá nemikok 403 xiujmej. Uan kinpiak okseki okichpipil uan siuapipil.
16 Keman Éber kipiaya 34 xiujmej, kipiak se okichpil uan kitokaytij Péleg.
17 Satepan ke kipiak Péleg, Éber nemikok 430 xiujmej. Uan kinpiak okseki okichpipil uan siuapipil.
18 Keman Péleg kipiaya 30 xiujmej, kipiak se okichpil uan kitokaytij Reú.
19 Satepan ke kipiak Reú, Péleg nemikok 209 xiujmej. Uan kinpiak okseki okichpipil uan siuapipil.
20 Keman Reú kipiaya 32 xiujmej, kipiak se okichpil uan kitokaytij Serug.
21 Satepan ke kipiak Serug, Reú nemikok 207 xiujmej. Uan kinpiak okseki okichpipil uan siuapipil.
22 Keman Serug kipiaya 30 xiujmej, kipiak se okichpil uan kitokaytij Nacor.
23 Satepan ke kipiak Nacor, Serug nemikok 200 xiujmej. Uan kinpiak okseki okichpipil uan siuapipil.
24 Keman Nacor kipiaya 29 xiujmej, kipiak se okichpil uan kitokaytij Taré.
25 Satepan ke kipiak Taré, Nacor nemikok 119 xiujmej. Uan kinpiak okseki okichpipil uan siuapipil.
26 Satepan ke Taré kiajxitij 70 xiujmej, kinpiak eyi okichpipil: Abrán, Nacor uan Harán.
27 Nikan ika motajtoua Taré.
Taré kinpiak eyi okichpipil: Abrán, Nacor uan Harán. Uan Harán kipiak se okichpil akin kitokaytij Lot.
28 Keman Taré nemiaok, iokichpil akin monotsaya Harán momikilij kampa yolka: itech ueyi xolal Ur ompa Caldea.*
29 Abrán uan Nacor monajnamiktijkej. Isiuatsin Abrán monotsaya Sarái uan isiuatsin Nacor monotsaya Milcá, akin katka isiuapil Harán. Harán katka inintat Milcá uan Iscá.
30 Sayoj ke Sarái amo uelia kinpiaya konemej; amo kipiaya nion se.
31 Taré kisak de Ur ompa Caldea para yas Canaán. Kiuikak Abrán uan iixuiuj akin monotsaya Lot. Lot katka iokichpil Harán. No kiuikak Sarái, isiuatsin Abrán. Nochin senyajkej uan ajsikej hasta ueyi xolal Harán uan ompa peuak nemij.
32 Keman kipiaya 205 xiujmej, Taré momikilij ompa Harán.
Tajtolmelaualismej
^ Oso “takomol”.
^ Oso “tekol”.
^ Oso “alquitrán”.
^ Oso “amo timoxiniskej”.
^ Itech hebreo, “pantemok uan kiitato”.
^ Tokayit tein kijtosneki ‘tein tapojpolouaʼ.
^ Oso “itech inintal caldeos”.
