Génesis 23:1-20
-
Sara momikilia uan kitokaj (1-20)
23 Sara nemik 127 xiujmej.
2 Uan momikilij ompa Quiryat-Arbá, tein no moixmati kemej Hebrón, tein mokaua Canaán. Abrahán chokak uan semi motayokoltij porin Sara momikilij.
3 Uan Abrahán kikauak imiketsin uan kiniluito ikoneuan Het:
4 “Nejua amo nikan nikayot. Sayoj ke niknekiskia xinechmakakan se cacho namotal kampa uelis niktokas nosiuatsin”.
5 Uan ikoneuan Het kiluijkej Abrahán:
6 “¡Tejuatsin! Dios mitsixtalij kemej taixyekankej. Uelis tiktokas mosiuatsin itech miketekoch kampa okachi kuali titachijchiujkej. Tinochin timitskauiliaj miketekoch tein tikpiaj para ompa xiktoka mosiuatsin”.
7 Yejua ika Abrahán moketsak, moixpiloj ininixpan ikoneuan Het
8 uan kiniluij: “Komo nanechkauaj maj niktoka nosiuatsin nikan, xikiluikan Efrón, iokichpil Zóhar,
9 maj nechnamakilti tepekoyok tein kipia ompa Macpelá, tein yetok italtenoj. Maj nikixtauili namoixpan ipatiuj tal uan ijkon uelis ompa niktokas nosiuatsin”.
10 Efrón tokotsyetoya iniuan ikoneuan Het, akin kinixmatiaj kemej hititas. Yejua ika ininixpan yejuan uan nochin akin mosentilijkaj ikalakyan ueyi xolal kampa nemia, Efrón akin no katka hitita, kiluij Abrahán:
11 “¡Tejuatsin! Amo sayoj nimitsmaka tepekoyok, ta no tal kampa yetok. Nimitsmaka ininixpan nejin takamej akin nikan nemij. Ompa xiktoka mosiuatsin”.
12 Uan Abrahán moixpiloj ininixpan akin ompa yetoyaj,
13 uan sentaixpan kiluij Efrón: “Xikaki, okachi kuali maj ijkon tikchiuakan. Maj nimitsixtauili ipatiuj motal. Xikui plata tein nimitsmaka uan ijkon uelis ompa niktokas nosiuatsin”.
14 Uan Efrón kinankilij Abrahán:
15 “¡Tejuatsin! Nejin tal nikaua ika naui kilo uan tajko* plata. Sayoj ke amo teisa, uelis ompa tiktokas mosiuatsin”.
16 Yejua ika Abrahán kiluij Efrón ke kiixtauaskia tein kijtojka ininixpan ikoneuan Het, uan kitamachiuak naui kilo uan tajko plata ika pesa tein kikuiaj tanamakanij.
17 Ijkon Efrón kinamakak italpan tein yetoya Macpelá, amo uejka de Mamré. Nejon tal, tepekoyok uan nochin koujmej tein ompa onkayaj
18 iaxkaya katka Abrahán. Yejua kikouak ininixpan ikoneuan Het uan nochin akin mosentilijkaj ikalakyan ueyi xolal.
19 Satepan, Abrahán kitokak Sara itech tepekoyok tein yetoya Macpelá, amo uejka de Mamré ompa Hebrón, tein mokaua Canaán.
20 Ijkon, tal uan tepekoyok tein ompa yetoya, ikoneuan Het kimakakej Abrahán, uan yejua ompa kitokak isiuatsin.
Tajtolmelaualismej
^ Itech hebreo, “400 siclos”. Xikonita B14.
