Génesis 27:1-46
27 Keman Isaac tatajtsinya katka uan amo ueliaok tachiaya, kinotsak Esaú, iokichpil akin tayekanaya, uan kiluij: “¡Nokonetsin!”. Uan yejua kinankilij: “¡Nikan nietok!”.
2 Uan Isaac kiluij: “Nitatajtsinya uan amo nikmati ox niuejkauasok.
3 Yejua ika, ¿uelis tiktemotiuj uan tinechualkuilis se tapial? Xikui moflechas uan moarco uan xikitskiti.
4 Uan xinechchijchiuili se tapalol tein uelik kemej nejua nikuelilia, uan xinechualkuili para maj nikua. Ijkon, achto ke nimomikilis nimitstiochiuas”.
5 Sayoj ke Rebeca kikaktoya tein Isaac kiluijtoya Esaú. Uan Esaú kitemoto se tapial.
6 Yejua ika Rebeca kiluij Jacob: “Yekin nikakik ke mopaj kiluij mokniuj Esaú:
7 ‘Xikitskiti se tapial uan xinechchijchiuili se tapalol tein uelik. Xinechmaka para maj nikua uan nimitstiochiuas iixpan Jehová achto ke nimomikilisʼ.
8 Yejua ika nokonetsin, kuali xinechkaki uan xikchiua tein nimitsiluiti.
9 ¿Uelis tinechkuilitiuj ome chivojkonemej? Xiouj kampa yetokej tapialmej uan xinechinualkuili tein okachi tomaujkej, para maj nikchijchiuili mopaj se tapalol tein uelik, kemej yejua kiuelilia.
10 Uan xikuikili para maj kikua uan para maj mitstiochiua tejua, achto ke momikilis”.
11 Sayoj ke Jacob kiluij inan: “Sayoj ke nokniuj Esaú tamitsonej, uan nejua amo.
12 Uan komo nopaj nechmachilia, kinemilis ke sayoj ika nimauiltisneki uan amo nechtiochiuas, ta kijtos maj nechpano tein amo kuali”.
13 Uan imomaj kiluij: “Nokonetsin, maj nejua nechpano tein amo kuali uan amo tejua. Xikchiua tein nimitsiluia. Xiouj uan xinechinualkuili chivojkonemej”.
14 Yejua ika Jacob kinkuito uan imomaj kichijchiuak se tapalol tein uelik, kemej kiueliliaya itat.
15 Satepan, Rebeca kalakito ichan, kikuik se itasal* Esaú tein okachi kuali katka uan kitalilij Jacob, iokichpil akin xokoyot.
16 Uan no kitalilij ipankuetaxyo chivo imako uan ikechko, kampa amo tsonej katka.
17 Satepan kimakak Jacob tapalol tein uelik uan pantsin tein kichijchiujka.
18 Uan Jacob kalakik kampa yetoya itat uan kiluij: “¡Paj!”. Uan itat kinankilij: “¡Nikan nietok nokonetsin! ¿Tiakoni?”.
19 Jacob kinankilij: “Nejua niEsaú, akin tayekana. Nikchiuakya nochi tein tinechiluij. Ximotali uan xikmajseua nejin tapialtsin tein nikmiktito uan xinechtiochiua”.
20 Sayoj ke Isaac kiluij Jacob: “Nokonetsin, ¡tel niman tikajsik!”. Uan yejua kinankilij: “ToDios Jehová nechpaleuij maj nikajsi”.
21 Uan Isaac kiluij Jacob: “Nokonetsin, ¿uelis timoualtokis tepitsin? Maj nimitsmachili para nikmatis ox tinokoneuj Esaú”.
22 Yejua ika Jacob motokij. Uan Isaac kitalij imay itech uan kijtoj: “Titajtoua kemej Jacob, sayoj ke momauan majya imauan Esaú”.
23 Isaac amo kimatik ke katka Jacob porin tel matsonej katka kemej Esaú. Yejua ika kitiochiuak.
24 Satepan kitajtanij:* “¿Yekmelauj tinokoneuj Esaú?”. Uan Jacob kinankilij: “Kemaj”.
25 Uan Isaac kiluij: “Nokonetsin, xikualkui tapialtsin tein tikmiktito para maj nikmajseua uan satepan nimitstiochiuas”. Yejua ika Jacob kitakualtekij uan takuaj, kiualkuilij vino uan tayik.
26 Isaac kiluij: “¿Uelis timoualtokis tepitsin? Xinechmaka se beso* nokonetsin”.
27 Jacob motokij uan kimakak se beso itat uan yejua kijnekuik itasal. Yejua ika kitiochiuak uan kijtoj:
“Nokonetsin ajuiyak kemej taajuiyaya ne koujtaj kampa Jehová tatiochiuak.
28 Maj toTajtsin Dios mitsmaka ajuach tein ualpanuetsi, talmej kampa motachiua, tataman tatok uan tel miak vino tein yankuik.
29 Maj itech nochi xolalmej mitstekitilikan uan maj itech nochin altepemej moixpilokan moixpan. Xikinixyekana mokniuan uan maj yejuan moixpilokan moixpan. Maj kipano tein amo kuali akin mitsnejnekilis tein amo kuali uan maj kipano tein kuali akin mitsnejnekilis tein kuali”.
30 Uan niman keman Isaac kitamitiochiuak Jacob uan Jacob yekin kiska de kampa yetoya itat, kisako Esaú uan kiualkuia tapialtsin tein kikitskito.
31 Yejua no kichijchiuak se tapalol tein uelik, kiuikilij itat uan kiluij: “Ximeua paj. Xikmajseua tapialtsin tein nikitskito uan xinechtiochiua”.
32 Uan Isaac kiluij: “¿Tiakoni?”. Uan yejua kinankilij: “Nejua niEsaú, mokoneuj akin tayekana”.
33 Uan Isaac peuak eliuis uiuiyoka uan kiluij: “ Komo ijkon, ¿akoni kitemoto se tapialtsin uan nechualkuilij? Nitakuaj tepitsin achto ke tiejkoskia uan yejua niktiochiuak. ¡Niktiochiuakya uan amo akin ueli kipata nejon!”.
34 Keman Esaú kikakik nejon, peuak eliuis tsajtsi uan kitataujtia itat: “¡Paj, nejua no xinechtiochiua!”.
35 Sayoj ke yejua kiluij: “Mokniuj ualaj uan nechkajkayauak para maj yejua niktiochiua maski amo yejua kinamikia, ta tejua”.
36 Uan Esaú kijtoj: “Kinamiki maj monotsa Jacob* porin ojpaya nechtakuilia. Ipa nechkuilijya tein nechmakaskiaj porin achto niyolik. ¡Uan axkan no kichiuak maj yejua kitiochiuakan!”. Satepan kitajtanij: “¿Uan nejua amo tinechtiochiuas?”.
37 Sayoj ke Isaac kinankilij Esaú: “Nikiluijya ke yejua mitsixyekanas, uan ke nochin iikniuan kitekitiliskej. No nikiluijya ke kipias miak takual uan vino. Nokonetsin, amo nikpiaok nion teyi para nimitsmakas”.
38 Sayoj ke Esaú kiluij: “Paj, ¿sayoj se ueli tiktiochiua? ¡Nejua no xinechtiochiua paj!”. Uan Esaú peuak choka uan tsajtsi.
39 Uan Isaac kinankilij:
“Xikita, amo tinemis kampa tel kuali motachiua uan kampa ualpanuetsi ajuach.
40 Nochipa tikuikatinemis momachete tein ojkan tenej* uan tiktekitilis mokniuj. Sayoj ke keman amo titaxikosok, tikauas uan amo tiktekitilisok”.
41 Uan Esaú peuak kiteltauelita Jacob porin itat kitiochiujka. Uan Esaú moluiaya: “Amo uejkaua momikiliti nopaj. Uan satepan ke momikilis, nikmiktiti nokniuj Jacob”.
42 Keman kitapouijkej Rebeca tein Esaú kiixtalijtoya, nimantsin tanauatij maj kinotsatij Jacob uan kiluij: “¡Xikaki! Mokniuj Esaú tel kualantok uan kiixtalijtok mitsmiktis.*
43 Yejua ika nokonetsin, xikchiua tein nimitsiluiti. Nimantsin xicholo uan xiouj Harán, kampa yetok nokniuj Labán.
44 Iuan xinemiti seki tonalmej, hasta maj tauelkisa mokniuj,
45 hasta maj amo mitstauelitstook uan maj kielkaua tein tikchiuilij. Ijkuak, nitanauatis maj mitsiluikan ke uelisya timokepas. Amo nikneki namechpolos nanomen itech sayoj se tonal”.
46 Uan Rebeca peuak kiluia Isaac: “Isiuapipiluan Het nechyolajxitijkejya. Komo Jacob monamiktia iuan se isiuapil Het, kemej nejin siuamej akin nikan kayomej, okachi kuali maj nimiki”.
Tajtolmelaualismej
^ Oso “itilmaj”.
^ Oso “kitajtoltij”.
^ Oso “Xinechpitso”, “Xinechtenamiki”.
^ Tokayit tein kijtosneki ‘akin tekotskitskia’ oso ‘akin tetakuilia’.
^ Oso “moespada”.
^ Oso “yolseui keman kinemilia ke mitsmiktiti”.
