Génesis 29:1-35
29 Satepan, Jacob oksepa kikuik ojti uan yajki Mesopotamia.*
2 Itech ixtauat kiitak se atekoch uan eyi oloch ichkamej* ompaka uejuetstoyaj, porin nochipa ompa yayaj atitij. Uan nejon atekoch tentsaktoya ika se ueyi tet.
3 Keman nochin ichkamej ompa kinsentiliayaj, ichkatajpianij kixolauayaj tet uan kinatiltiayaj ininichkauan. Satepan oksepa kitentsakuayaj atekoch ika nejon tet.
4 Uan Jacob kintajtanij:* “Nokniuan, ¿namejuan kani nanemij?”. Yejuan kinankilijkej: “Tinemij Harán”.
5 Uan yejua kiniluij: “¿Nankiixmatij Labán iixuiuj Nacor?”. Uan yejuan kinankilijkej: “Kemaj”.
6 Jacob kintajtanij: “¿Keniuj yetok, paktok?”. Yejuan kinankilijkej: “Kemaj paktok. Uan ne ualajtok isiuapil, kinualkui ichkamej. Monotsa Raquel”.
7 Jacob kiniluij: “Ta yekin nepantaj. Ayamo hora para se kintsakuas ichkamej. Xa ueliskia nankinatiltiskej uan oksepa nankinuikaskej maj takuatij”.
8 Sayoj ke yejuan kinankilijkej: “Amo techkauaj maj tikchiuakan nejon. Moneki timochiaskej hasta maj mosentilikan nochin ichkamej uan maj tikajchiuakan tet tein ika tentsaktok atekoch. Sayoj ijkuak tikinatiltiaj toichkauan”.
9 Keman Jacob tajtojtoyaok iniuan, ejkok Raquel. Yejua kinyekpiaya ichkamej uan kinualkuia iichkauan itat.
10 Keman Jacob kiitak ke Raquel kinualkuia iichkauan Labán, niman kixolauato tet tein ika tentsaktoya atekoch uan peuak kinatiltia ichkamej. Labán katka itat Raquel uan iikniuj imomaj Jacob.
11 Uan Jacob kitajpaloj Raquel uan kimakak se beso* uan peuak choka.
12 Jacob peuak kitapouia Raquel ke Labán katka ipariente* uan ke imomaj katka Rebeca. Uan Raquel niman kisteuak kiluito itat.
13 Niman keman Labán kikakik ke isobrino ompa yetoya, kisteuak kinamikito. Kinauaj, kimakak se beso* uan kiuikak ichan. Uan Jacob peuak kitapouia Labán nochi tein kipanoka.
14 Labán kiluij: “Tejua yekmelauj tinopariente”. Uan Jacob iuan mokauak se metsti.
15 Satepan, Labán kiluij Jacob: “Maski tinopariente,* amo uelis nenkaj tinechtekitilis. Xinechilui, ¿kanachi tikneki maj nimitstaxtaui?”.
16 Labán kinpiaya ome isiuapipiluan: akin tayekanaya monotsaya Lea, uan xokoyot monotsaya Raquel.
17 Sayoj ke Lea amo semi kuakualtsin katka. Uan Raquel kualtsin moitaya uan ixkuakualtsin katka.
18 Kemej Jacob kitasojtaya Raquel, kiluij Labán: “Nimitstekitilis chikome xiuit para iuan nimonamiktis mosiuapil Raquel”.
19 Labán kinankilij: “Okachi kuali maj mouan monamikti uan amo iuan okse. Nikan ximokaua uan nouan xinemi”.
20 Uan Jacob tekitik chikome xiuit para uelis monamiktis iuan Raquel. Sayoj ke kemej semi kitasojtaya, kimachilij kemej yeskia sayoj seki tonalmej.
21 Satepan Jacob kiluij Labán: “Nimitstekitilijya chikome xiuit ijkon kemej tikijtojkaj. Xinechmaka nosiuatsin Raquel para maj iuan nimoteka”.
22 Yejua ika Labán kinyoleuak nochin ivecinos uan iluichiuak.
23 Sayoj ke keman tayouak, kiuikilij Lea para maj iuan moteka.
24 Uan Labán kimakak Lea se itakeual akin monotsaya Zilpá para maj kitekitili.
25 Mostika kualkan, Jacob kiitak ke iuan yetoya Lea. Yejua ika kiluij Labán: “¿Keyej tinechchiuilij nejin? Nimitstekitilij para tinechmakas Raquel. ¿Keyej tinechkajkayauak?”.
26 Sayoj ke Labán kinankilij: “Nikan amo timomattokej achto tiktemakaskej tosiuapil akin xokoyot, ta akin tayekana.
27 Xiiluiti nochi nejin semana iuan Lea. Satepan no nimitsmakas Raquel, sayoj ke moneki tinechtekitilis chikome xiuitok”.
28 Jacob kijtoj ke kuali yetok uan iluitik iuan Lea se semana. Satepan Labán no kimakak Raquel.
29 Uan Labán kimakak Raquel se itakeual akin monotsaya Bilhá para maj kitekitili.
30 Uan Jacob no motekak iuan Raquel uan okachi kitasojtak Raquel ke Lea. Uan kitekitilij Labán chikome xiuitok.
31 Keman Jehová kiitak ke Jacob amo semi kitasojtaya Lea, kichiuak maj mokokoxkatali. Sayoj ke Raquel amo uelia kinpiaya konemej.
32 Uan Lea mokokoxkatalij uan kipiak se okichpiltsin akin kitokaytij Rubén,* porin kijtoj: “Jehová kiita ke nitajyouia. Axkan notakatsin nechtasojtasya”.
33 Satepan oksepa mokokoxkatalij uan kipiak se okichpiltsin. Uan kijtoj: “Jehová nechkakik keman niktataujtij uan kimati ke notakatsin amo nechtasojta. Uan yejua kichiuak maj nikpia okse konetsin”. Yejua ika kitokaytij Simeón.*
34 Uan Lea oksepa mokokoxkatalij uan kipiak okse okichpiltsin. Yejua ika kijtoj: “Axkan kemaj notakatsin okachi yetos nouan,* porin nikinpiak eyi iokichpipiluan”. Yejua ika kitokaytijkej Leví.*
35 Uan oksepa mokokoxkatalij uan kipiak okse okichpiltsin. Uan kijtoj: “Axkan nikueyitalis Jehová”. Yejua ika kitokaytij Judá.* Uan amo kinpiakok konemej.
Tajtolmelaualismej
^ Itech hebreo, “inintal akin nemij kampa ika ualkisa tonaltsin”.
^ Oso “borregos”.
^ Oso “kintajtoltij”.
^ Oso “kipitsoj”, “kitenamik”.
^ Itech hebreo, “iikniuj”.
^ Oso “kipitsoj”, “kitenamik”.
^ Itech hebreo, “tinokniuj”.
^ Tokayit tein kijtosneki ‘¡xikitakan, se okichpiltsin!’.
^ Tokayit tein kijtosneki ‘tekaki’.
^ Oso “mosentilis nouan”.
^ Tokayit tein kijtosneki ‘mosentilia’.
^ Tokayit tein kijtosneki ‘kiueyitaliaj’.
