Génesis 32:1-32
32 Jacob kikuik ojti uan iangeluan Dios kinamikitoj.
2 Niman keman Jacob kinitak, kijtoj: “¡Nikan mokaujtikiskej iangeluan Dios!”. Yejua ika ompa tatokaytij Mahanaim.*
3 Uan Jacob kintitanik seki itakeualuan maj kiitatij Esaú, akin yetoya itech tal tein poui Seír, tein no moixmati kemej Edom.
4 Uan kinnauatij nejin: “Xikiluikan nejin noteko Esaú: ‘Motekitikauj Jacob technauatij maj timitsiluikij nejin: “Miak xiujmej ninemik iuan Labán
5 uan nikinpia kuakuejmej, burros, ichkamej,* uan nechtekitiliaj miakej takamej uan siuamej. Noteko, nimitsmatiltia nejin para kuali tinechitas”ʼ”.
6 Satepan, itakeualuan Jacob mokepkej uan kiluijkej: “Tikitatoj mokniuj Esaú uan ualajtok mitsnamikiki uan kinualkui 400 takamej”.
7 Uan Jacob motelmoujtij uan moteltekipachoj, yejua ika ojkan kinxeloj akin iuan yayaj uan no ichkamej, chivos, kuakuejmej uan camellos.
8 Yejua kijtoj: “Ijkon, komo Esaú kinteuia sekin, oksekin uelis choloskej”.
9 Satepan, Jacob kiluij Dios: “Jehová, iDios noueyitat Abrahán uan iDios nopaj Isaac, tejua tinechiluij: ‘Ximokepa kampa tiyolik uan kampa nemij moparientes uan nejua nimitstatiochiuisʼ.
10 Tejua semi tinechtasojtani uan tikchiuani nochi tein tinechiluij maski amo nimotanilijtok. Keman nikpanauij ueyiat Jordán sayoj nikpiaya notopil, sayoj ke axkan hasta ojkanya nikxeloj tein nikpia.
11 Nimitstataujtia xinechpaleui para maj nokniuj Esaú amo teyi nechchiuili. Porin nimoui maj nechmikti nejua, siuamej uan ininkoneuan.
12 Tejua tinechiluij: ‘Nimitstatiochiuis uan nikchiuas maj mokoneuan tel miakej kemej xal tein onkak itech mar, tein amo ueli se kipouaʼ”.
13 Ompa mokauak nejon youak. Uan kinsentilij seki itapialuan para kitayokolis Esaú:
14 220 chivos, 220 ichkamej,
15 30 camellojtenamej iniuan ininpiluan, 50 kuakuejmej uan 30 burros.
16 Uan Jacob kinmajmakatiajki itakeualuan seki tapialmej uan kiniluij: “Namejuan xitayekanakan uan amo ximosentilikan, ta ijkon xixexeliujtiakan”.
17 Uan no, akin yaya hasta taixpan kinauatij nejin: “Komo tiknamiki nokniuj Esaú uan mitstajtania* ‘¿Akoni tiktekitilia uan kani tiouj? ¿Akoni iaxka nejin tapialmej?’,
18 xiknankili ‘Iaxka motekitikauj Jacob uan yejua mitstayokolia, noteko Esaú. Tein melauj yejua techualtojtoka’”.*
19 No ijkon kinnajnauatij takeualmej akin yayaj taikan uan kinuikayaj tapialmej. Kiniluij: “Yejua nejon tein moneki nankiluiskej Esaú keman nankinamikiskej.
20 No xikiluikan: ‘Motekitikauj Jacob techualtojtokaʼ”. Porin Jacob moluiaya: “Komo nejin tein niktayokolia kiyolseuia, keman nikitas xa kualtsin nechtajpalos”.
21 Uan takeualmej akin kinuikayaj tapialmej tayekanteujkej. Uan Jacob ompa mokauak nejon youak.
22 Sayoj ke nejon youak Jacob meuak uan kinkuiteuak Raquel uan Lea, Bilhá uan Zilpá uan 11 ikoneuan. Kipanauijkej ueyiat* Jaboc kampa amo uejkatan katka.
23 Ijkon kinuikak oksekopa uan no kiuikak nochi tein kipiaya.
24 Satepan, keman Jacob iselti yetoya, se takat kikitskij uan kinekia kiuetsiltis hasta ke tanesik.
25 Keman nejon takat kiitak ke amo kitania Jacob, kikesomiyojkokoj. Yejua ika Jacob keskopinik.
26 Satepan, nejon takat kiluij: “Xinechkajkaua, porin tanestokya”. Sayoj ke Jacob kinankilij: “Amo nimitskajkauas hasta xinechtiochiua”.
27 Uan takat kitajtanij: “¿Keniuj timonotsa?”. Uan yejua kinankilij: “Jacob”.
28 Takat kiluij: “Amo timonotsasok Jacob, ta Israel,* porin tiknextij mochikaualis iixpan Dios uan ininixpan oksekin, uan tikpiak tein tiknekia”.
29 Uan Jacob kiluij: “Nimitstataujtia, xinechilui keniuj timonotsa”. Sayoj ke takat kinankilij: “¿Keyej tikneki tikmatis keniuj nimonotsa?”. Uan ompa kitiochiuak.
30 Yejua ika Jacob ompa tatokaytij Peniel,* porin kijtoj: “Maski nikixitak Dios amo nimikik”.
31 Uan keman tanestiaya, Jacob kistiayaya de Penuel* uan koxojtaksatiaya porin keskopinka.
32 Yejua ika hasta axkan, ikoneuan Israel amo kikuaj taluat tein kipia ikes se tapial, porin takat ompa kikokoj Jacob.
Tajtolmelaualismej
^ Tokayit tein kijtosneki ‘ojkan mokaltalijkej’.
^ Oso “borregos”.
^ Oso “mitstajtoltia”.
^ Oso “techtoktilia”.
^ Oso “atauit (ojpanat)”.
^ Tokayit tein kijtosneki ‘akin itech mokitskia Dios’ oso ‘Dios kinextia ichikaualis’.
^ Tokayit tein kijtosneki ‘iixko Dios’.
^ Oso “Peniel”.
