Génesis 33:1-20
33 Keman Jacob moixajokuik, kiitak ke Esaú ualaya iniuan 400 takamej. Yejua ika kinxejxeloj ikoneuan iuan Lea, Raquel uan Bilhá uan Zilpá.
2 Achto kintalij Bilhá uan Zilpá iniuan ininkoneuan, tatajko kitalij Lea iniuan ikoneuan uan hasta taikan Raquel iuan José.
3 Uan Jacob yajki hasta taixpan uan ijkon kemej yaya kiajsiti iikniuj, motankuaketstiaya uan moixpilouaya hasta talpan. Ijkon kichiuak chikome viaje.
4 Sayoj ke Esaú tsikuinteuak kinamikito, kinauaj uan kimakak se beso* uan peujkej chokaj.
5 Keman Esaú moixajokuik, kinitak siuamej uan konemej uan kitajtanij* Jacob: “¿Akonimej ne ualajtokej mouan?”. Jacob kinankilij: “Nokoneuan akin Dios nechinmakak”.
6 Uan ajsitoj Bilhá uan Zilpá iniuan ininkoneuan uan motankuaketskej uan moixpilojkej hasta talpan.
7 No ajsitoj Lea uan ikoneuan uan no ijkon kichiujkej, uan satepan ajsitoj José uan Raquel uan no motankuaketskej uan moixpilojkej hasta talpan.
8 Esaú kitajtanij Jacob: “¿Keyej tikinualtitanik miakej maj nechnamikikij?”. Uan yejua kinankilij: “Para kuali timouikaskej, noteko”.
9 Uan Esaú kiluij: “Noknitsin, nejua nikpia miak tamanya. Ximokauili, porin moaxka”.
10 Sayoj ke Jacob kiluij: “Amo, komo kuali tinechitaya, nimitstataujtia xikui tein nimitstayokolia, porin nikualkuik para uelis nimitsitas. Nimitsixitakya uan kemej yeskia nikixitak Dios, porin kualtsin tinechtajpaloj.
11 Nimitstataujtia xikui tein nimitsualkuilij, porin Dios nechtatiochiuiani uan amo teyi nechpoloua”. Uan kisentokak kitataujtij hasta ke Esaú kikuik tein kiuikilijka.
12 Satepan Esaú kiluij: “Maj tiakanya. Nejua nimitsyekantias”.
13 Sayoj ke Jacob kinankilij: “Noteko, tikmati ke konemej amo semi chikaujkej. Uan ichkamej* uan kuakuejmej tein nikinuika kipiaj ininpiluan. Komo itech se tonal eliuis tikinpeuaj, nochin mikiskej.
14 Nimitstataujtia noteko, xitayekana. Nejua okachi yolik nias, iniuan tapialmej uan konemej, hasta maj nimitsajsiti ompa Seír”.
15 Uan Esaú kiluij: “Maj nimitsinkauili seki notakeualuan”. Sayoj ke Jacob kinankilij: “Noteko, amo ximokuejmolo, ta tinechiknelij uan yejua nejon tein okachi niknekia”.
16 Uan Esaú mokepak Seír nejon tonal.
17 Uan Jacob yajki Sucot. Ompa mochijchiuilij se kali uan kinchijchiuak sakakaltsitsin para itapialuan. Yejua ika, ompa tatokaytij Sucot.*
18 Satepan ke Jacob kisak de Padán-Aram kuali ajsik ueyi xolal Siquem, tein yetok itech tal tein poui Canaán, uan mokaltalijtikisak amo uejka de Siquem.
19 Uan kampa mokaltalijka kikouak se cacho tal ika 100 platajtomin. Nejon tal kinkouilij ikoneuan Hamor, akin katka itat Siquem.
20 Ompa kichijchiuak se altar uan kitokaytij Dios yejua iDios Israel.
Tajtolmelaualismej
^ Oso “kipitsoj”, “kitenamik”.
^ Oso “kitajtoltij”.
^ Oso “borregos”.
^ Tokayit tein kijtosneki ‘sakakaltsitsin’.
