Josué 11:1-23
11 Keman tekiuaj Jabín akin taixyekanaya Hazor kimatik tein kichiujkaj israelitas, kinnotsak seki tekiuanij para maj mosentilikan. Kinotsak tekiuaj Jobab akin taixyekanaya Madón, no kinotsak akin tekiuajtia Simrón uan akin tekiuajtia Acsaf.
2 No kinnotsak akin tekiuajtiaj kampa tepeyoj* uan kampa tamanis* tein yetok tanikopa* den mar Kinéret.* No kinnotsak akin tekiuajtiaj kampa moixmati kemej Sefelá uan itech tepetsitsin tein yetokej itech ueyi xolal Dor, kampa pankalaki tonaltsin.
3 Kiniluij maj mosentilikan nochin cananeos,* amorreos, hititas, perizitas, jebuseos akin nemiaj kampa tepeyoj uan heveos akin nemiaj itsintan tepet Hermón kampa motanotsa Mizpá.
4 Yejua ika nochin nejon tekiuanij uan ininsoldados yajkej kampa mosentiliskiaj. Semi miakej katkaj kemej xal tein onkak martenoj uan kinuikayaj miak caballos uan carros tein kikuiaj keman tateuiayaj.
5 Nejon tekiuanij mosentilijkej uan kitalijkej ininkaltsitsin* itech ueyi xolal Merom para kinteuiskej israelitas. Itech nejon ueyi xolal onkaya miak at.
6 Jehová kiluij Josué: “Amo xikinmouili, porin mosta kemej nejin hora namechpaleuis xikinmiktikan* nochin. Tikinkoxojkuiltis* inincaballos uan tikinchichinos inincarros”.
7 Josué uan nochin isoldados kinichtakauitoj tanakastan de Merom.*
8 Jehová kinpaleuij israelitas maj kintanikan uan maj kinmiktikan nochin. Motalojkej uan kintokatiajkej hasta ueyi xolal Sidón, hasta Misrefot-Maim uan tal tamanis* tein moixmati kemej Mizpé.*
9 Josué kichiuak ijkon kemej Jehová kiluij: kinkoxojkuiltij* inincaballos uan kinchichinoj inincarros.
10 Uan Josué uan isoldados mokepkej uan yajkej Hazor. Moaxkatilijkej Hazor uan kimiktijkej akin ompa tekiuajtia. Ueyi xolal Hazor okachi moixmatia ke okseki uejueyi xolalmej kampa taixyekanaya se tekiuaj.
11 Kintamimiktijkej nochin akin ompa nemiaj ika ininmachete tein ojkan tenej,* uan amo akin makisak. Satepan kitikuiltijkej ueyi xolal Hazor.
12 Josué moinaxkatilij nochi nejin uejueyi xolalmej uan kinmiktij nochin akin ompa tekiuajtiaj. Kinmiktij nochin, ijkon kemej Moisés itekitikauj Jehová tanauatijka.
13 Sayoj ke israelitas amo kintikuiltijkej uejueyi xolalmej tein yetokej tepekuapan, ta sayoj kitikuiltijkej Hazor.
14 Israelitas mokuilijkej nochi tein kipiayaj akin nemiaj itech nejon uejueyi xolalmej uan inintapialuan. Uan kintamimiktijkej nochin akin ompa nemiaj ika ininmachete tein ojkan tenej uan amo akin makisak.
15 Jehová kinauatijka itekitikauj Moisés toni monekia kichiuas uan Moisés kiluij Josué nochi tein Dios kinauatijka. Yejua ika Josué kichiuak nochi tein Jehová tanauatijka.
16 Josué moinaxkatilij nochi in talmej tein yetokej kampa tepeyoj. No moaxkatilij tal tein moixmati kemej Négueb, talmej tein moixmatij kemej Gosén, Sefelá, Arabá uan kampa tepeyoj* ompa Israel.
17 Moinaxkatilij in talmej desde tepet Halac tein amo uejka yetok de Seír hasta Baal-Gad, tein yetok itsintan tepet Hermón. Ueyi xolal Baal-Gad no moajsi itech tal tamanis* tein yetok Líbano. Kintanik nochin akin ompa tekiuajtiaj uan kinmiktij.
18 Josué uejkauak moteuijtoya iniuan nejin tekiuanij.
19 Israelitas monekik kinteuiskej nochin akin nemiaj itech okseki uejueyi xolalmej para moinaxkatiliskej. Sayoj heveos akin nemiaj Gabaón kintataujtitoj israelitas maj amo kinmiktikan.
20 Jehová kichiuak maj amo moyolpatakan nochin akin nemiaj itech okseki uejueyi xolalmej para maj yanij kinteuitij israelitas. Ijkon amo kinikneliskia ta kintamiixpoloskia. Monekia ixpoliuiskej ijkon kemej Jehová kinauatijka Moisés.
21 Josué no kinmiktij ikoneuan Anaq akin nemiaj kampa tepeyoj uan akin nemiaj Hebrón, Debir uan Anab. No kinmiktij akin nemiaj kampa tepeyoj ompa Judá uan Israel uan kinixpoloj nochi uejueyi xolalmej kampa nemiaj.
22 Sayoj mokaujkej seki ikoneuan Anaq ompa Gaza, Gat uan Asdod. Sayoj ke kampa nemiaj israelitas amo mokauak nion se ikoneuj Anaq.
23 Josué moinaxkatilij nochi in talmej, ijkon kemej Jehová kiluijka Moisés. Josué kinmakak nochin israelitas nejon talmej uan kinxejxelouilij nochin uejueyi kalyetonij. Kinmakak ijkon kemej ixyetoya kipiaskej sejse. Uan desde ijkuak peuak kualtsin nemij porin amo akinok kinteuij.
Tajtolmelaualismej
^ Nejin yetok norte.
^ Oso “takomol”, “Arabá”.
^ Oso “ataujkopa”, “tauakalkopa”.
^ Satepan moixmatik kemej mar de Galilea.
^ Itech hebreo, “nochin cananeos desde kampa ualkisa tonaltsin hasta kampa pankalaki tonaltsin”.
^ Nejin kaltsitsin chijchiujtoyaj ika tasal (tilmaj).
^ Oso “nikinpaleuis israelitas maj kinmiktikan”.
^ Oso “Tikinkotstejtekis”.
^ Oso “Merom, kampa onkaya at”.
^ Oso “takomol”.
^ Nejin yetok kampa ualkisa tonaltsin.
^ Oso “kinkotstejtekik”.
^ Oso “ininespada”.
^ Oso “uejueyi tepemej uan tepetsitsin”.
^ Oso “takomol”.
