Josué 18:1-28
18 Kemej israelitas moaxkatilijkajya nochi in talmej tein pouij Canaán, nochin mosentilijkej itech ueyi xolal Siló uan ompa kitalijkej kaltsin kampa yayaj kiueyichiuatij Dios.*
2 Sayoj ke chikome uejueyi kalyetonij israelitas ayamo kinmakayaj inintal.
3 Yejua ika Josué kiniluij: “¿Keyej ayamo namoaxkatiliaj in tal tein namechmakak Jehová, ininDios touejkaujtatuan?
4 Xikinixtalikan eyi takamej akin pouij itech sejse uejueyi kalyetonij para nikintitanis maj kiitatij tal. Nikinnauatis maj kijkuilokan keniuj moita tal uan maj kichijchiuakan dibujos.* Nejon kinextis keniuj xejxeliujtos tal tein kinmakaskej uejueyi kalyetonij. Uan keman matamiskej maj oksepa ualakan.
5 Moneki nankixejxeloskej tal para chikome uejueyi kalyetonij. Ichankauan Judá mokauaskej tanikopa* uan ichankauan José mokauaskej ajkokopa.
6 Xikijkuilokan keniuj moita tal uan xikxejxelokan para chikome uejueyi kalyetonij. Satepan xinechualkuilikan tein nankijkuiloskej uan nikan niktatamotas tetsitsin* para tikmatiskej toni kijtoua Jehová.*
7 Sayoj ke ichankauan Leví amo kinmakaskej nion se tal, porin Jehová kinijitak* para maj mochiuakan tiopixkamej. Uan ichankauan Gad, ichankauan Rubén uan seki* ichankauan Manasés kipiajya inintal oksekopa* den ueyiat Jordán. Nejon talmej kinxejxelouilij Moisés akin katka itekitikauj Jehová”.
8 Keman takamej yajtoyajya, Josué kinnauatij: “Xiakan xikitatij tal uan xikijkuilokan keniuj moita. Keman namatamiskej oksepa xinechitakij nikan Siló. Nejua niktatamotas tetsitsin para tikmatiskej toni kijtoua Jehová”.
9 Takamej yajkej kiitatoj nochi in talmej uan kijkuilojkej keniuj moitaya. No kijkuilojkej kanachi uejueyi xolalmej yetoyaj itech nejon talmej. Nochi kixejxelojkej para chikome uejueyi kalyetonij uan sekosan kiamatalijkej. Keman matankej oksepa kiitatoj Josué ompa Siló.
10 Keman yetoyajya Siló, Josué kitatamotak tetsitsin para kimatiskej toni kijtoua Jehová. Ijkon Josué kinxejxelouilij israelitas tal tein kinmakaskiaj.
11 Keman kitatamotkej tetsitsin, nesik kani kinmakaskiaj inintal ichankauan Benjamín por familias. Tal tein kinmakakej yetok kampa kintaxejxelouilijkej ichankauan Judá uan ichankauan José.
12 Ajkokopa, inintal peua tanakastan den ueyiat Jordán uan youi ajkokopa de Jericó. Uan de kampa pankalaki tonaltsin panoua kampa tepeyoj uan ajsi hasta taluakyan tein yetok Bet-Aven.
13 De ompa youi hasta tanikopa* den ueyi xolal Luz tein no monotsa Betel uan temoua Atarot-Addar itech tepet tein yetok tanikopa de Bet-Horón Baja.
14 Uan desde tepet tein yetok tanikopa de Bet-Horón tamalakachoua tanikopa uan tami hasta Quiryat-Baal tein no monotsa Quiryat-Jearim. Nejin ueyi xolal yetok itech tal tein kinmakakej ichankauan Judá. Ijkon xejxeliujtok tal tein kinmakakej ichankauan Benjamín de kampa pankalaki tonaltsin.
15 Tanikopa,* inintal peua kampa tami Quiryat-Jearim uan youi hasta ameyal* tein moixmati kemej Neftóah tein yetok kampa pankalaki tonaltsin.
16 De ompa temoua tatsintan den tepet tein yetok taixpan den tal tamanis* tein moixmati kemej Hinón. Nejin tepet no yetok ajkokopa den tal tamanis tein moixmati kemej Refaím. Tal tein kinmakakej youi hasta tal tamanis Hinón, tanikopa* de kampa nemij jebuseos uan temoua hasta En-Roguel.
17 De ompa youi ajkokopa uan ajsi hasta En-Semes. Satepan panoua Guelilot, tein yetok taixpan den ojti tein moixmati kemej Adumim. De ompa temoua kampa yetok tet tein moixmati kemej Bohán. Bohán katka semej ikoneuan Rubén.
18 Uan youi ajkokopa hasta tepetsitsin tein yetokej taixpan den Arabá uan ajsi hasta Arabá.
19 Uan tal tein kinmakakej youi hasta ajkokopa de Bet-Hoglá. Uan tami atenoj tein yetok ajkokopa den mar Salado* kampa monamiki iuan ueyiat Jordán. Ompa peua uan ompa tami tal tein kinmakakej ichankauan Benjamín tanikopa.*
20 Uan de kampa ualkisa tonaltsin, inintal tami tanakastankopa den ueyiat Jordán. Ompa peua uan ompa tami nochi in tal tein kinmajmakakej ichankauan Benjamín por familias.
21 Yejua nejin uejueyi xolalmej tein kinmajmakakej ichankauan Benjamín por familias: Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá,
24 Kefar-Amoní, Ofní uan Gueba. Katkaj 12 uejueyi xolalmej uan xolaltsitsin tein ompa pouij.
25 No kinmakakej Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí tein no monotsa Jerusalén, Guibeá uan Quiryat. Katkaj 14 uejueyi xolalmej uan xolaltsitsin tein ompa pouij.
Yejua nejin talmej tein kinmajmakakej ichankauan Benjamín por familias.
Tajtolmelaualismej
^ Xikonita ikaltsin Dios.
^ Itech hebreo, “mapas”.
^ Oso “ataujkopa”, “tauakalkopa”.
^ Xikonita tetsitsin tein kitatamotayaj.
^ Itech hebreo, “iixpan Jehová”.
^ Oso “kinixpejpenak”.
^ Itech hebreo, “tajko”.
^ Nejin yetok kampa ualkisa tonaltsin.
^ Oso “ataujkopa”, “tauakalkopa”.
^ Oso “Ataujkopa”, “Tauakalkopa”.
^ Oso “amel”.
^ Oso “takomol”.
^ Oso “ataujkopa”, “tauakalkopa”.
^ Nejin no moixmati kemej mar Muerto.
^ Oso “ataujkopa”, “tauakalkopa”.
