Josué 19:1-51
-
Talmej tein kinxejxelouiliaj ichankauan Simeón (1-9)
-
Talmej tein kinxejxelouiliaj ichankauan Zabulón (10-16)
-
Talmej tein kinxejxelouiliaj ichankauan Isacar (17-23)
-
Talmej tein kinxejxelouiliaj ichankauan Aser (24-31)
-
Talmej tein kinxejxelouiliaj ichankauan Neftalí (32-39)
-
Talmej tein kinxejxelouiliaj ichankauan Dan (40-48)
-
Tal tein kimakaj Josué (49-51)
19 Keman oksepa* kitatamotkej tetsitsin,* nesik kani kinmajmakaskiaj inintal ichankauan Simeón por familias. Tal tein kinmakakej yetok kampa kintaxejxelouilijkej ichankauan Judá.
2 Kinmakakej Beer-Seba uan Seba, Moladá,
3 Hazar-Sual, Balá, Ézem,
4 Eltolad, Betul, Hormá,
5 Ziclag, Bet-Marcabot, Hazar-Susá,
6 Bet-Lebaot uan Saruhén. Katkaj 13 uejueyi xolalmej uan xolaltsitsin tein ompa pouij.
7 No kinmakakej Ain, Rimón, Éter uan Asán. Katkaj naui uejueyi xolalmej uan xolaltsitsin tein ompa pouij.
8 No kinmakakej okseki xolaltsitsin tein ajsij hasta Baalat-Beer, tein no moixmati kemej Ramá tein yetok tanikopa.* Yejua nejin talmej tein kinmajmakakej ichankauan Simeón por familias.
9 Tal tein kinmakakej ichankauan Judá semi ueyi katka, yejua ika yejuan kinmakakej seki talmej ichankauan Simeón. Yejua ika talmej tein kinxejxelouilijkej ichankauan Simeón yetok kampa kintaxejxelouilijkej ichankauan Judá.
10 Keman oksepa* kitatamotkej tetsitsin, nesik kani kinmakaskiaj inintal ichankauan Zabulón por familias. Inintal tami hasta Sarid.
11 De ompa youi Mareal tein yetok kampa pankalaki tonaltsin, panoua Dabéset uan ajsi hasta tal tamanis* tein yetok taixpan de Jocneam.
12 Desde Sarid youi kampa peua Kislot-Tabor tein yetok kampa ualkisa tonaltsin, satepan youi Daberat uan ajsi hasta Jafía.
13 De ompa youi ueyi xolal Gat-Héfer kampa ualkisa tonaltsin, panoua Et-Cazín, youi Rimón uan ajsi hasta Neá.
14 De ompa tamalakachoua uan youi ajkokopa hasta Hanatón uan ajsi hasta tal tamanis* tein moixmati kemej Iftá-El.
15 Kampa kintaxejxelouilijkej yetokej nejin uejueyi xolalmej: Catat, Nahalal, Simrón, Idalá uan Belén. Katkaj 12 uejueyi xolalmej uan xolaltsitsin tein ompa pouij.
16 Yejua nejin talmej, uejueyi xolalmej uan xolaltsitsin tein kinmajmakakej ichankauan Zabulón por familias.
17 Keman oksepa* kitatamotkej tetsitsin, nesik kani kinmajmakaskiaj inintal ichankauan Isacar por familias.
18 Inintal peua Jezreel uan panoua Kesulot, Sunem,
19 Hafaraim, Shion, Anaharat,
20 Rabit, Quisión, Ébez,
21 Rémet, En-Ganim, En-Hadá uan Bet-Pazez.
22 Inintal ajsi hasta tepet Tabor, Sahazuma, Bet-Semes uan tami hasta ueyiat Jordán. Katkaj 16 uejueyi xolalmej uan xolaltsitsin tein ompa pouij.
23 Yejua nejin talmej, uejueyi xolalmej uan xolaltsitsin tein kinmajmakakej ichankauan Isacar por familias.
24 Keman oksepa* kitatamotkej tetsitsin, nesik kani kinmajmakaskiaj inintal ichankauan Aser por familias.
25 Inintal peua Helcat uan panoua Halí, Beten, Acsaf,
26 Alamélec, Amad uan Misal. De kampa pankalaki tonaltsin inintal youi hasta tanakastan den tepet Carmelo uan ajsi hasta ueyiat Sihor-Libnat.
27 De kampa ualkisa tonaltsin panoua Bet-Dagón uan ajsi hasta kampa kinmakakej inintal ichankauan Zabulón. Uan ajkokopa peua de kampa yetok tal tamanis* tein moixmati kemej Iftá-El, panoua Bet-Émec uan Neiel uan youi hasta tanakastan de Cabul.
28 Inintal panoua Ebrón, Rehob, Hamón, Caná uan ajsi hasta ueyi xolal Sidón.
29 Inintal youi Ramá uan ajsi hasta ueyi xolal Tiro kampa tatsaktok ika uejueyi tepamit. Inintal oksepa peua desde ueyi xolal Hosá uan ajsi hasta atenoj kampa yetok ueyi xolal Aczib,
30 Umá, Afec uan Rehob. Katkaj 22 uejueyi xolalmej uan xolaltsitsin tein ompa pouij.
31 Yejua nejin talmej, uejueyi xolalmej uan xolaltsitsin tein kinmajmakakej ichankauan Aser por familias.
32 Keman oksepa* kitatamotkej tetsitsin, nesik kani kinmajmakaskiaj inintal ichankauan Neftalí por familias.
33 Inintal peua desde Hélef, desde Zaananim kampa yetok se ueyi kouit, panoua Adamí-Néqueb uan Jabneel. De ompa ajsi Lacum uan tami hasta ueyiat Jordán.
34 De kampa pankalaki tonaltsin youi Aznot-Tabor uan panoua Hucoc. Tanikopa* iuan monamiki tal tein kinmakakej ichankauan Zabulón. De kampa pankalaki tonaltsin yetok tal tein kinmakakej ichankauan Aser. Uan de kampa ualkisa tonaltsin monamiki iuan tal tein kinmakakej ichankauan Judá.* Nejin tal yetok tanakastan den ueyiat Jordán.
35 Uan uejueyi xolalmej kampa tatsaktok ika uejueyi tepamit tein kinmakakej katkaj Zidim, Zer, Hammat, Racat, Kinéret,
36 Adamá, Ramá, Hazor,
37 Quedes, Edréi, En-Hazor,
38 Yirón, Migdal-El, Horem, Bet-Anat, uan Bet-Semes. Katkaj 19 uejueyi xolalmej uan xolaltsitsin tein ompa pouij.
39 Yejua nejin talmej, uejueyi xolalmej uan xolaltsitsin tein kinmajmakakej ichankauan Neftalí por familias.
40 Keman oksepa* kitatamotkej tetsitsin, nesik kani kinmajmakaskiaj inintal ichankauan Dan por familias.
41 Uan inintal peua Zorá uan panoua Estaol, Ir-Semes,
42 Saalabín, Ayalón, Itlá,
43 Elón, Timná, Ecrón,
44 Eltequé, Guibetón, Baalat,
45 Jehúd, Bene-Berac, Gat-Rimón,
46 Me-Jarcón, Racón uan ajsi hasta taixpan de Jope.
47 Sayoj ke ichankauan Dan amo kinajsia tal tein kinmakakej. Yejua ika kinteuitoj akin nemij Lésem uan kintamimiktijkej ika ininmachete tein ojkan tenej.* Moaxkatilijkej ueyi xolal uan ompa mokaltalijkej. Uan kemej ininuejkaujtat monotsaya Dan, kipatilijkej itokay ueyi xolal Lésem uan kitokaytijkej Dan.
48 Yejua nejin talmej, uejueyi xolalmej uan xolaltsitsin tein kinmajmakakej ichankauan Dan por familias.
49 Ijkon kintamixejxelouilijkej israelitas talmej tein kinmakaskiaj. Uan israelitas kimakakej Josué ikoneuj Nun se tal tein ininaxkaya katka.
50 Jehová tanauatij maj kimakanij Timnat-Sérah, ueyi xolal tein yejua tajtanik. Nejin ueyi xolal yetok kampa tepeyoj, kampa kintaxejxelouilijkej ichankauan Efraín. Josué kiyekchijchiuak Timnat-Sérah uan ompa mokaltalij.
51 Ijkon kintamixejxelouilijkej talmej israelitas. Tiopixkat Eleazar, Josué ikoneuj Nun uan akin kinixyekanayaj uejueyi kalyetonij israelitas mosentilijkej kaltenoj den kaltsin kampa yayaj kiueyichiuatij Dios. Yejuan kitatamotkej tetsitsin ompa Siló kampa yetok kaltsin* para kimatiskej toni kijtoua Jehová.*
Tajtolmelaualismej
^ Oso “Keman ika ojpa”.
^ Xikonita tetsitsin tein kitatamotayaj.
^ Oso “ataujkopa”, “tauakalkopa”.
^ Oso “Keman ika expa”.
^ Oso “takomol”.
^ Oso “takomol”.
^ Oso “Keman ika naujpa”.
^ Oso “Keman makuilpa”.
^ Oso “takomol”.
^ Oso “Keman chikuasenpa”.
^ Oso “Ataujkopa”, “Tauakalkopa”.
^ Nikan xa ika motajtojtok sayoj se ichankauj Judá uan amo nochin ichankauan.
^ Oso “Keman chikome viaje”.
^ Oso “ininespada”.
^ Xikonita ikaltsin Dios.
^ Itech hebreo, “iixpan Jehová”.
