Josué 20:1-9
-
Uejueyi xolalmej kampa israelitas uelis choloskej komo temiktiaj (1-9)
20 Uan Jehová kiluij Josué:
2 “Xikinilui israelitas: ‘Xikixtalikan uejueyi xolalmej kampa israelitas uelis choloskej, ijkon kemej nikiluijka Moisés maj namechnauati xikchiuakan.
3 Komo se israelita kichiua teisa uan kiualmiktia aksa,* uelis cholos ompa porin amo kinekia kimiktis. Keman yetos itech semej nejon uejueyi xolalmej, ichankauj akin kimiktijkej* amo teyi uelis kichiuilis.
4 Uan akin temiktis monekis yas semej nejin uejueyi xolalmej. Keman ompa ajsis, moneki moketsas kaltenoj den ueyi xolal uan kiniluis taixyekananij israelitas tein kichiuak. Satepan, taixyekananij kikauaskej maj kalaki uan moneki kiluiskej kani nemis, uan desde ijkuak ompaya chanchiuas.
5 Keman ichankauj akin kimiktijkej ajsis ompa, taixyekananij amo moneki kikauiliskej maj kimikti porin yejua amo kinekia temiktis. Uan amo no kitauelitaya akin kimiktij.
6 Moneki yetos itech nejon ueyi xolal hasta keman tamelauanij kiixejekoskej ox yekmelauj amo kinekia temiktis. Uan komo kiitaj ke amo kinekia temiktis, uelis kisentokas ompa chanchiuas hasta keman momikilis tayekankatiopixkat. Ijkuak uelis mokepas kampa ualeuak uan oksepa nemitiuj ichan’”.
7 Yejua ika kixelojkej para Dios nejin uejueyi xolalmej kampa israelitas ueliskia choloskej: kampa kintaxejxelouilijkaj ichankauan Neftalí kixelojkej ueyi xolal Quedes tein yetok ompa Galilea kampa tepeyoj. Kampa kintaxejxelouilijkaj ichankauan Efraín kixelojkej ueyi xolal Siquem tein yetok kampa tepeyoj. Uan kampa kintaxelouilijkaj ichankauan Judá kixelojkej ueyi xolal Quiryat-Arbá tein no monotsa Hebrón tein yetok kampa tepeyoj.
8 Uan yejua nejin uejueyi xolalmej tein israelitas kixelojkej oksekopa den ueyiat Jordán taixpan de Jericó:* kampa kintaxejxelouilijkaj ichankauan Rubén kixelojkej ueyi xolal Bézer tein yetok taluakyan kampa tamanis.* Kampa kintaxelouilijkaj ichankauan Gad kixelojkej ueyi xolal Ramot tein yetok Galaad. Uan kampa kintaxejxelouilijkaj ichankauan Manasés kixelojkej ueyi xolal Golán tein yetok Basán.
9 Kiixtalijkej nejin uejueyi xolalmej para uelis ompa choloskej israelitas uan akin amo israelitas akin iniuan nemij. Komo se israelita oso se akin amo israelita kiualmiktia aksa, uelis cholos ompa para maj ichankauj akin kimiktijkej* amo teyi kichiuili. Keman ompa yetos, tamelauanij kiixejekoskej ox yekmelauj amo kinekia temiktis.
Tajtolmelaualismej
^ Oso “akin”, “akaj”.
^ Oso “akin kinekis momakepas”.
^ Oso “kampa ualkisa tonaltsin”.
^ Oso “takomol”.
^ Oso “akin kinekis momakepas”.
