Josué 3:1-17
-
Israelitas kipanauiaj ueyiat Jordán (1-17)
3 Josué uan israelitas kualkantsin meujkej, kiskej de Sitim uan ajsikej ueyiat Jordán. Nejon youak amo kipanauijkej ueyiat, ta ompa mokaujkej.
2 Uiptika, akin kinixyekanayaj israelitas panotiajkej kampa nochin kitalijkej ininkaltsitsin.*
3 Yejuan kinnauatijkej israelitas: “Keman nankiitaskej ke tiopixkamej* kiuikajya tatiochiualkaxon* tein iaxka toDios Jehová, niman xiktojtokakan.*
4 Amo ximoteltokikan, ta xiktakauilijtiakan tatiochiualkaxon kemej 900 metros. Xiktojtokatiakan* para nankimatiskej kanika nanyaskej porin amo keman nanyanij ompaka”.
5 Josué kiniluij israelitas: “Jehová kichiuas miak milagros mosta para namechpaleuis, yejua ika xikchiuakan axkan nochi tein moneki para uelis nankiueyichiuaskej mosta”.
6 Satepan, Josué kiniluij tiopixkamej: “Xikuikan tatiochiualkaxon uan xikinyekantiakan israelitas”. Uan tiopixkamej kikuikej tatiochiualkaxon uan kinyekantiajkej israelitas.
7 Uan Jehová kiluij Josué: “Desde axkan israelitas peuas mitstakachiuaskej,* porin nikinnextiliti ke nejua nimitspaleuijtok, ijkon kemej nikpaleuij Moisés.
8 Xikinnauati tiopixkamej akin kiuikaj tatiochiualkaxon maj kichiuakan nejin: ‘Keman nanajsiskej ueyiat Jordán ximometskalakikan uan ompa xiijkatokan’”.
9 Josué kiniluij israelitas: “Xikakikij tein toDios Jehová kijtoua”.
10 Uan Josué kijtoj: “Nejin namechpaleuis xikmatikan ke yekmelauj moajsi se Dios akin namechpaleuijtok, akin kintalkuiliti cananeos, hititas, heveos, perizitas, guirgaseos, amorreos uan jebuseos.
11 Achto kikalakitij itech ueyiat Jordán nejin tatiochiualkaxon tein iaxka akin taixyekana itech nochi taltikpak, uan satepan namejuan nanpanoskej.
12 Uan namejuan moneki nankinijitaskej* 12 takamej akin pouij itech 12 uejueyi kalyetonij israelitas.
13 Tiopixkamej kiuikaskej tatiochiualkaxon tein iaxka Jehová, akin taixyekana itech nochi taltikpak. Keman mometskalakiskej itech ueyiat Jordán, at tein moualtalojtok motsakuilis kemej yeskia yetoskia se tepamit tein kitsakuilijtoskia”.*
14 Israelitas kiskej de ininkaltsitsin para kipanauiskej ueyiat Jordán. Uan tiopixkamej akin kiuikayaj tatiochiualkaxon kinyekantiajkej.
15 (Ueyiat Jordán peua semi moskaltia keman xijxiujtika kisentiliaj tatok). Keman tiopixkamej akin kiuikayaj tatiochiualkaxon ajsikej ueyiat Jordán uan mometskalakijkej,
16 at tein moualtalojtoya motsakuilij kemej yeskia yetoskia se tepamit tein kitsakuilijtoskia. Motsakuilij itech ueyi xolal Adán, tein semi uejka moajsi de kampa yetoyaj israelitas. Ompaka no moajsi ueyi xolal Zaretán. Uan at tein yaya tamiti hasta mar Salado,* uaktiajki. Kemej at motsakuilij, israelitas uelik panokej oksekopa uan nepakatsin yetoyaya ueyi xolal Jericó.
17 Kemej in ueyiat Jordán uakik, tiopixkamej akin kiuikayaj tatiochiualkaxon tein iaxka Jehová uelik moketskej tatajko uan nochin israelitas uelik panokej. Uan tiopixkamej ompa mokaujkej hasta keman tamipanokej nochin israelitas.
Tajtolmelaualismej
^ Nejin kaltsitsin chijchiujtoyaj ika tasal (tilmaj).
^ Nejin tiopixkamej katkaj levitas.
^ Xikonita tatiochiualkaxon.
^ Oso “xiktoktilikan”.
^ Oso “Xiktoktilijtiakan”.
^ Oso “mitspoujkaitaskej”.
^ Oso “nankinixpejpenaskej”.
^ Oso “motsakuilis kemej yeskia se tepamit”.
^ Itech hebreo, “mar tein yetok Arabá”. Nejin no moixmati kemej mar Muerto.
