Josué 5:1-15
5 Jehová ijkon kichiuak maj ueyiat Jordán motsakuiliani hasta maj israelitas tamipanouanij. Keman tekiuanij akin kinixyekanayaj amorreos uan cananeos kimatkej nejon, motelmoujtijkej uan amo kinekkej* kinixnamikiskej israelitas porin semi kinmouiliayaj. Amorreos nemiaj tanakastan den ueyiat Jordán kampa pankalaki tonaltsin, uan cananeos nemiaj tanakastan den mar Mediterráneo.
2 Ijkuak, Jehová kiluij Josué: “Xiktenti seki temej* para maj kintekikan* takamej israelitas”.
3 Yejua ika Josué kitentij seki temej uan ika peujkej kintekij takamej israelitas ompa Guibeat-Haaralot.
4 Josué tanauatij maj kintekikan porin nochin takamej akin kiskaj de Egipto uan katkaj soldados* momikilijkajya taluakyan.
5 Nochin takamej akin kiskaj de Egipto kintekkaj. Sayoj ke nochin akin yolkej keman yajtoyaj taluakyan, ayamo kintekiaj.
6 Israelitas nentinenkej taluakyan 40 xiujmej, hasta keman momikilijkej nochin takamej akin kiskaj de Egipto. Nejon takamej katkaj soldados uan amo kitakamatkaj Jehová. Yejua ika Jehová kinyekiluij ke amo keman kinkauaskia maj kiitakan tal tein Jehová kiniluijka touejkaujtatuan ke techmakaskia, se kualtsin tal kampa onkak miak leche uan nekti.*
7 ToDios kinixpatak nejon takamej ika ininkoneuan akin ayamo kintekiaj. Yejua ika Josué tanauatij maj kintekikan.
8 Keman kintamitekkej nochin takamej, israelitas mokaujkej kampa kitalijkaj ininkaltsitsin* hasta keman pajtikej.
9 Uan Jehová kiluij Josué: “Axkan nikchiuak maj egipcios amo namechpinaujtikanok porin namechtekkejya”. Yejua ika nejon ueyi xolal moixmati kemej Guilgal* hasta axkan.
10 Israelitas kisentokakej ompa Guilgal. Kitalijkej ininkaltsitsin itech taluakyan tein yetok nikampatsin de Jericó. Uan kichiujkej iluit tein monotsa Pascua itech tonal 14 metsti abib* keman tapoyauik.
11 Mostika, keman tamik iluit, peujkej kikuaj nochi tein onkaya ompa Canaán: pantsin tein amo kipiaya levadura uan cebada tateuats.
12 Uan nejon tonal keman peuak kikuaj tein onkaya ompa Canaán, tamik maná. Amo onkayaok maná, sayoj ke nejon xiuit israelitas peuak kikuaj nochi tein onkaya ompa Canaán.
13 Keman Josué yetoya nikampatsin de Jericó, sepasan kiitak se takat. Nejon takat ijkatoya iixpan uan maaktoya se machete tein ojkan tenej.* Josué motokij kampa yetoya uan kitajtanij:* “¿Titechpaleuijtok tejuan oso tikinpaleuijtok akin techixnamikij?”.
14 Takat kinankilij: “Amo, ta nejua nikinixyekana isoldados* Jehová”. Keman Josué kikakik nejon, motankuaketsak uan moixpiloj hasta talpan. Uan kiluij: “Tejuatsin, ¿toni tikneki maj nikchiua?”.
15 Akin kinixyekana isoldados Jehová kiluij Josué: “Ximokixtili motekakuan porin tal kampa tiijkatok Dios moxelouilij”. Josué nimantsin kichiuak nejon.
Tajtolmelaualismej
^ Oso “amo moixeuijkej”. Itech hebreo, “amo akin kipiak chikaualis para”.
^ Oso “Ximochijchiuili cuchillos de tet”.
^ Oso “kinchiuilikan circuncisión”. Itech hebreo, “oksepa kintekikan”. Xikonita circuncisión.
^ Oso “akin kiajxitijkajya xiuit para mochiuaskej soldados”.
^ Oso “miel”.
^ Nejin kaltsitsin chijchiujtoyaj ika tasal (tilmaj).
^ Tokayit tein kijtosneki ‘kitetekuinouaj’ oso ‘kitetekuinojtiouij’ (‘kixolkeptiouij’, ‘kitemimilojtiouij’).
^ Itech hebreo, “den yekinika metsti”. Axkan nejin metsti uetsi itajkotian marzo hasta itajkotian abril. Xikonita abib.
^ Oso “espada”.
^ Oso “kitajtoltij”.
^ Nikan xa ininka motajtoua ángeles.
