Josué 6:1-27
6 Akin nemiaj Jericó kuali kitsakkaj puertas tein kipiaya ueyi xolal porin kinmouiliayaj israelitas. Amo akin kisaya nion kalakia.
2 Jehová kiluij Josué: “Nimitsmakati ueyi xolal Jericó uan nimitspaleuis xiktani akin ompa tekiuajti uan isoldados akin kuali tateuiaj.
3 Tejua uan soldados moneki mojmostaj nankimamalakachoskej* ueyi xolal sayoj sepa. Ijkon moneki nankichiuaskej chikuasen tonal.
4 Maj chikome tiopixkamej kiuikakan chikome kuaomimej* uan maj kiyekantiakan tatiochiualkaxon.* Sayoj ke chikometika tonal, moneki chikome viaje nankimalakachoskej ueyi xolal uan tiopixkamej kipitstiaskej kuaomimej.
5 Keman tiopixkamej kipitstoskej kuaomimej, nochin soldados moneki chikauak tsajtsiskej kemej yeskia tateuitijya. Uan tepamit tein kiyoualoua ueyi xolal xitinis. Ijkuak soldados moneki kalaktikisaskej”.
6 Yejua ika Josué ikoneuj Nun kinsentilij tiopixkamej uan kiniluij: “Xikuikakan tatiochiualkaxon tein iaxka Jehová. Uan maj chikome tiopixkamej kiuikakan chikome kuaomimej uan maj tayekantiakan”.
7 Josué no kiniluij soldados: “Xiakan xikmalakachotij* ueyi xolal, uan maj seki soldados kiyekantiakan tatiochiualkaxon tein iaxka Jehová”.
8 Nochin kichiujkej tein Josué tanauatijka. Chikome tiopixkamej akin kiuikayaj chikome kuaomimej yayaj iixpan Jehová* uan kipitstiayaj kuaomimej. Taikan yayaj tiopixkamej akin kiuikayaj tatiochiualkaxon tein iaxka Jehová.
9 Hasta taixpan yayaj seki soldados uan kintojtokatiayaj* tiopixkamej akin kipitstiayaj kuaomimej. Uan okseki soldados kitojtokatiayaj tatiochiualkaxon. Tiopixkamej kipitstiajkej kuaomimej nochi in ojti.
10 Uan Josué kinnauatijka soldados: “Amo xitsajtsikan nion xikakistikan. Amo teyi xikijtokan hasta tonal keman namechiluis ‘¡Xitsajtsikan!’ uan ijkuak xitsajtsikanya”.
11 Josué tanauatij maj kimalakachotij ueyi xolal se viaje uan maj kiuikakan tatiochiualkaxon tein iaxka Jehová. Satepan mokepkej kampa israelitas kitalijkaj ininkaltsitsin* uan ompa mokaujkej nejon youak.
12 Mostika, Josué kualkan meuak uan tiopixkamej kiuikakej tatiochiualkaxon tein iaxka Jehová.
13 Hasta taixpan yayaj seki soldados, kintojtokatiayaj* chikome tiopixkamej akin kipitstiayaj chikome kuaomimej. Satepan yayaj akin kiuikayaj tatiochiualkaxon tein iaxka Jehová. Uan hasta taikan yayaj okseki soldados. Yejuan no kitojtokatiayaj tatiochiualkaxon tein iaxka Jehová.
14 Mostika, oksepa kimalakachojkej ueyi xolal sayoj sepa uan mokepkej kampa kitalijkaj ininkaltsitsin. Israelitas chikuasen tonal kimalakachojkej ueyi xolal sayoj sepa.
15 Chikometika tonal kualkantsisan meujkej. Uan kimalakachotoj* ueyi xolal kemej ipa kichiujkajya. Sayoj ke ijkuak, chikome viaje kimalakachojkej.
16 Keman chikome viajejya kimalakachojkaj ueyi xolal, tiopixkamej kipitskej kuaomimej uan Josué kiniluij soldados: “¡Xitsajtsikan, porin Jehová namechpaleuiti ximoaxkatilikan ueyi xolal!
17 Xikixpolokan ueyi xolal uan xikinmiktikan akin ompa nemij uan no xikinmiktikan nochi inintapialuan. Nochi ueyi xolal uan tein ompa onkak iaxka Jehová. Sayoj momakixtis Rahab, siuat akin monamakaya iniuan takamej uan nochin akin yetokej ichan, porin kintatij* israelitas akin tapijpiakoj.
18 Sayoj ke nion xikitakan tein moneki nankiixpoloskej, para amo nankinejnekiskej uan namokuiliskej. Komo nankikuij tein ompa onkak, nankinkuejmolkalakiskej nochin israelitas uan nankichiuaskej maj tamiixpoliuikan.
19 Nochi plata, oro uan tein chijchiujtok de cobre oso tepos iaxka Jehová porin yejua moxelouilijya. Moneki nankieuatiuij* ichan Jehová kampa yetok nochi tein iaxka”.
20 Keman tiopixkamej kipitskej kuaomimej, soldados tsajtsikej. Niman keman tsajtsikej, tepamit xitinik. Uan soldados kalaktikiskej itech ueyi xolal uan kiixpolojkej.
21 Ika ininmachete tein ojkan tenej* kinmiktijkej nochin takamej, siuamej, akin xiuejkejya uan akin amo. No kinmiktijkej kuakuejmej, ichkamej* uan burros.
22 Josué kiniluij ome takamej akin yajkaj tachiatoj Canaán: “Xikuitij Rahab akin monamakaya iniuan takamej uan nochin akin yetokej ichan, ijkon kemej nankiluijkaj ke nankichiuaskiaj”.
23 Yejua ika, tapijpianij kikixtitoj Rahab, itat, inan, iikniuan uan nochin akin yetoyaj ichan uan kinuikakej kampa amo teyi kinpanoskia, nepakatsin de kampa israelitas kitalijkaj ininkaltsitsin.
24 Satepan kitikuiltijkej ueyi xolal uan nochi tein ompa onkaya. Sayoj ke plata, oro uan tein chijchiujtok de cobre oso tepos, kikauatoj ichan Jehová kampa yetok nochi tein iaxka.
25 Josué amo kikauak maj kimiktikan Rahab, siuat akin monamakaya iniuan takamej, nochin akin nemiaj ichan itat uan nochin akin yetoyaj ichan Rahab. Sayoj yejuan momakixtijkej. Uan Rahab kisentoka nemi iniuan israelitas hasta axkan, porin kintatij* akin Josué kintitanka maj tachiatij Jericó.
26 Ijkuak, Josué kiyekijtoj* nejin: “Maj Jehová kitatsakuilti akin kiyekchijchiuas ueyi xolal Jericó. Keman kichijchiuas cimientos, momikilis ikoneuj akin tayekana uan keman kitalis puertas momikilis ixokoyouj”.
27 Jehová kipaleuij Josué uan miakkan kiixmatkej.*
Tajtolmelaualismej
^ Oso “nankiyoualoskej”.
^ Oso “ikuaomiyo ichkaueuet (borrego)”.
^ Xikonita tatiochiualkaxon.
^ Oso “xikyoualotij”.
^ Oso “kiyekantiayaj tatiochiualkaxon tein iaxka Jehová”.
^ Oso “kintoktilijtiayaj”.
^ Nejin kaltsitsin chijchiujtoyaj ika tasal (tilmaj).
^ Oso “kintoktilijtiayaj”.
^ Oso “kiyoualotoj”.
^ Oso “kincholtij”.
^ Oso “nankiyektalitiuij”.
^ Oso “ininespada”.
^ Oso “borregos”.
^ Oso “kincholtij”.
^ Oso xa “kichiuak maj israelitas kiyekijtouanij”.
^ Oso xa “miakkan kiixmatkej Jehová”.
