Josué 7:1-26
7 Dios kiniluijka israelitas maj kiixpolokan seki taman, sayoj ke yejuan amo tatakamatkej. Acán akin iuejkaujtat katka Judá, kiichtekik seki taman tein monekia kiixpoloskej. Itat Acán katka Carmí, iueyitat katka Zabdí uan katka semej ichankauan Zérah. Kemej tachtekik, Jehová semi kualanik iniuan israelitas.
2 Keman israelitas yetoyaj Jericó, Josué kintitanik seki takamej maj yakan Hai. Nejin ueyi xolal amo uejka yetok de Bet-Aven uan tanakastan de Betel, kampa ualkisa tonaltsin. Josué kiniluij: “Xiakan xitachiatij ueyi xolal Hai uan xikitatij inintal akin ompa nemij”. Nejon takamej yajkej uan kichiujkej tein kiniluij.
3 Keman mokepkej kiluijkej Josué: “Amo moneki maj yakan nochin soldados porin amo miakej akin nemij Hai. Uelis tikintaniskej sayoj ika ome mil oso eyi mil soldados. Yejua ika amo xikintitani nochin takamej porin nenkajsan tikinsioujtis”.
4 Yejua ika pankiskej kemej eyi mil takamej, sayoj ke cholojkej keman kinixnamikikoj akin nemiaj Hai.
5 Yejuan kinmiktijkej 36 israelitas. Kintokatiajkej uan kinmiktijtiajkej desde puertas tein kipiaya ueyi xolal hasta Sebarim.* Temotiajkej uan kisentokakej kinmiktijtiajkej. Yejua ika israelitas peuak yoltitikuikaj* porin semi moujtoyaj.
6 Keman Josué kimatik tein panok, kitsayanak itasal.* Motankuaketsak uan moixpiloj hasta talpan iixpan tatiochiualkaxon* tein iaxka Jehová, uan ompa tankuaijkatoya hasta tiotak. Josué uan taixyekananij israelitas kisentokakej mokuatemilijkej talnex.
7 Josué kijtoj: “¡ToUeyi Teko Jehová! ¿Keyej titechualkuik uan titechpanoltij itech ueyiat Jordán? ¿Sayoj titechualkuik para maj techtanikan uan maj techmiktikan amorreos? Okachi kuali maj amo tikpanauianij ueyiat, ta maj timokauanij kampa tietoyaj.
8 Jehová, israelitas cholojkej porin akin techixnamikij kintankej. Amo nikmatiok toni nikijtos.
9 Keman akin nemij Canaán uan akin nemij itech okseki xolalmej kimatiskej tein panok, ualaskej uan techtamiixpoloskej uan amo akin techelnamikisok. ¿Uan toni tikchiuas para maj amo kijijtokan motokaytsin?”.
10 Jehová kiluij Josué: “¡Ximoketsa! ¿Keyej tiksentoka ampon titankuaijkatok?
11 Israelitas tajtakolchiujkej. Yejuan amo kichiujkej tein nikinnauatijka porin kikuikej tein monekia kiixpoloskej. Kiichtekkej uan kitatijkej* kampa kitalijtokej tein kipiaj.
12 Yejua ika israelitas choloskej uan amo uelis kintaniskej akin kinixnamikij. Ijkon kinpanos porin nejua nikijtoj ke israelitas moneki ixpoliuiskej. Komo amo nankiajchiuaj akin nikijtoj ke moneki ixpoliuis, amo namechpaleuisok.
13 Xikinilui israelitas maj kichiuakan nejin: ‘Xikchiuakan nochi tein moneki para uelis nankiueyichiuaskej toDios* Jehová mosta, porin yejua nejin tein kijtoua: “Israelitas, namouan yetok se takat akin moneki nankiixpoloskej. Komo amo nankiajchiuaj, amo uelis nankintaniskej akin namechtauelitaj.
14 Nanochin kualkan ximosentilikan. Uan Jehová kijitas* semej uejueyi kalyetonij, uan de ompa kijitas se familia, uan de nejon familia Jehová kinijitas akin sennemij itech se kali. Uan de akin nemij itech nejon kali, Jehová kijitas takat akin tajtakolchiuak.
15 Uan keman nankimatiskej akoni mokuilij tein monekia nankiixpoloskej, moneki nankichichinoskej. Uan no moneki nankichichinoskej nochi tein kipia porin amo kichiuak tein Jehová kinnauatijka israelitas. Semi tepinaujtij tein kichiuak”’”.
16 Mostika, Josué kualkan meuak uan kinsentilij nochi uejueyi kalyetonij israelitas uan Dios* kijitak* Judá.
17 Satepan motokijkej nochin ichankauan Judá uan de ompa Dios kinijitak* ichankauan Zérah. Panotiajkej sejse uan Dios kijitak Zabdí.
18 Satepan motokijkej nochin akin nemiaj ichan Zabdí, panotiajki sejse uan Dios kijitak* Acán. Itat Acán katka Carmí, iueyitat katka Zabdí uan katka semej ichankauan Zérah uan iuejkaujtat katka Judá.
19 Josué kiluij Acán: “Nokonetsin, xikueyitali Jehová, ininDios israelitas uan xikilui tein tikchiuak. Nimitstataujtia amo xinechtatili* tein tikchiuak”.
20 Acán kinankilij Josué: “Kemaj, nejua nikchiuak tein Jehová, ininDios israelitas kijtoj maj amo tikchiuakan. Yejua nejin tein nikchiuak:
21 Kampa yetoya nochi tein patiyoj tein mosentilijka nikitak se kualtsin tasal tein kichijchiujkaj ompa Sinar. No nikitak ome kilo* plata uan tajko kilo* oro. Kemej semi nikinuelitak, nimoinuikilij uan nikintalpachoto kampa niktalij nokaltsin.* Ompa yetok tasal uan hasta tatampa yetok tomin”.
22 Josué niman kintitanik seki israelitas maj yakan kampa yetoya ikaltsin Acán. Yejuan kisteujkej uan ompa kiajsikej tasal uan hasta tatampa kitatijka tomin.
23 Kikixtijkej nochi uan kiuikilijkej Josué uan nochin israelitas. Kitalitoj iixpan tatiochiualkaxon tein iaxka Jehová.*
24 Josué uan nochin israelitas kiuikakej Acán ikoneuj Zérah hasta tal tamanis* tein moixmati kemej Acor. Ompa no kiuikakej plata, tasal, oro, nochin ikoneuan, ikuakuejuan, iburros, iichkauan* uan okseki itapialuan. No kiuikakej ikaltsin uan nochi tein kipiaya.
25 Uan Josué kiluij Acán: “Jehová mitstatsakuiltiti porin titechkuejmolkalakij”. Nochin israelitas kitetenkej* Acán uan no kintetenkej ichankauan hasta kinmiktijkej, uan satepan kinchichinojkej.
26 Kampa yetoya Acán kinejnepanojkej miak tet uan nejon tet ompa nepaniujtok hasta axkan. Nochi nejon tapaleuij maj Jehová amo kualantook. Yejua ika motanotsa tal tamanis* Acor* hasta axkan.
Tajtolmelaualismej
^ Tokayit tein kijtosneki ‘kampa kikixtiaj tet’.
^ Oso “yolkokomokaj”, “yolkuetauij”.
^ Oso “itilmaj”.
^ Xikonita tatiochiualkaxon.
^ Oso “kicholtijkej”.
^ Oso “ininDios israelitas”.
^ Oso “kiixpejpenas”.
^ Oso xa “Josué”.
^ Oso “kiixpejpenak”.
^ Oso “kinixpejpenak”.
^ Oso “kiixpejpenak”.
^ Oso “amo xinechcholtili”.
^ Itech hebreo, “200 siclos”. Xikonita B14.
^ Itech hebreo, “50 siclos”.
^ Nejin kaltsin chijchiujtoya ika tasal (tilmaj).
^ Itech hebreo, “iixpan Jehová”.
^ Oso “takomol”.
^ Oso “iborregos”.
^ Oso “kitepoxonijkej”, “kimojmotkej ika tet”.
^ Oso “takomol”.
^ Tokayit tein kijtosneki ‘kuejmol’.
