Levítico 1:1-17
-
Tapialmej tein kichichinouiliskej Dios (1-17)
1 Uan Jehová kiualnotsak Moisés desde kaltsin kampa israelitas taueyichiuayaj,* uan kiluij:
2 “Xikinilui israelitas nejin: ‘Komo nankimaktilitij Jehová se namotapial, moneki yeski se kuakouej, se ichkat* oso se chivo.
3 ”’Akin kiuikas se kuakouej para maj kichichinouilikan Dios, moneki yeski se kuakuejueuet tein kuali yetos uan yekin moskaltijtos. Kitemakas porin ijkon kiixtalij uan kiuikilis Jehová ikalakyan kaltsin.
4 Moneki kitalis imay ikuako in kuakouej, uan Dios kiyolpaktis tein kimaktilia uan kiixpolos itajtakoluan.
5 ”’Moneki kimiktiskej kuakouej iixpan Jehová. Uan ikoneuan Aarón, akin tekitij kemej tiopixkamej, kimaktiliskej Dios iesyo tapial uan kipijpisuiskej ikejkespan altar, tein yetok ikalakyan kaltsin.
6 Nejon tapial moneki kikixtiliskej ipankuetaxyo uan kikojkotonaskej.
7 Ikoneuan Aarón moneki kitaliskej tekol itech altar uan ompa kitaliskej kouit.
8 Yejuan kitaliskej nakat tein kikojkotonkej iuan itsontekon uan imantecayo* itech kouit tein xotatos itech altar.
9 Kipajpakaskej ikuitaxkol* uan imetsuan, uan tiopixkat moneki kitamichichinos itech altar para maj popoka. Nejin kitamichichinouiliskej Jehová uan yejua semi kiajuiyakmatis.*
10 ”’Akin kiuikas se itapial para maj kichichinouilikan Dios, yeski se ichkat oso se chivo, moneki maj tapialueuet uan maj kuali yeto. Uan ichkat moneki yekin moskaltijtos.
11 Moneki kimiktiskej iixpan Jehová, tanakastan* den altar. Uan ikoneuan Aarón kipijpisuiskej esti ikejkespan altar.
12 Kikojkotonaskej tapial, uan tiopixkat kitalis nakat iuan itsontekon uan imantecayo* itech kouit tein xotatos itech altar.
13 Kipajpakaskej ikuitaxkol* uan imetsuan, uan tiopixkat moneki kimaktilis Dios nochi uan kichichinos itech altar para maj popoka. Nejin kitamichichinouiliskej Jehová uan yejua semi kiajuiyakmatis.
14 ”’Sayoj ke, akin kiuikas totomej para maj kichichinouilikan Jehová, moneki yeskij palomas oso palomajkonemej.
15 Tiopixkat kimaktilis Dios sejse tototsin itech altar, ika iisti kikechtekis uan kichichinos itech altar para maj popoka. Sayoj ke kichiuas maj iesyo temo ikespan altar.
16 Moneki kikixtilis ibuche uan iijuiyo uan kitamotas tanakastan den altar kampa ika ualkisa tonaltsin, kampa kitemaj koujnex.*
17 Uan moneki kiixtapos tepitsin iajtapalkopa sayoj ke maj amo kitajkokotona. Tiopixkat moneki kichichinos itech altar para maj popoka. Nejin kitamichichinouilis Jehová uan yejua semi kiajuiyakmatis.
Tajtolmelaualismej
^ Xikonita ikaltsin Dios.
^ Oso “borrego”.
^ Oso “ichiauakyo tein kipachojtok riñones”.
^ Oso “iijtikyo”.
^ Oso “kiyolseuis”.
^ Oso “itech lado norte”. Komo se moixkepa kampa ika ualkisa tonaltsin, nejin mokaua se iopochmakopa.
^ Oso “ichiauakyo tein kipachojtok riñones”.
^ Oso “iijtikyo”.
^ Oso “koujnex tein chiauak”.