Levítico 10:1-20
10 Satepan, Nadab uan Abihú, iokichpipiluan Aarón kikuikej sejse tekolkaxit, ompa kitalijkej tekol uan kopal, uan peuak tapopochuiaj iixpan Jehová. Sayoj ke amo kichiujkej kemej Dios tanauatijka.
2 Uan Jehová kiualtitanik se tit* tein kinchichinoj, uan yejuan mikkej iixpan Jehová.
3 Uan Moisés kiluij Aarón: “Yejua nejin tein kijtoua Jehová: ‘Nochin akin motokiaj itech kaltsin kampa nechueyichiuaj* moneki kielnamikiskej ke senkis nichipauak uan nochin moneki nechueyitaliskej’”. Uan Aarón amo teyi kijtoj.
4 Moisés kinnotsak Misael uan Elzafán, ikoneuan Uziel. Uziel katka itío Aarón. Uan kiniluij: “Xiualakan. Xikinkixtikan namokniuan de kampa Dios taxeloj uan xikinuikakan uejka den kaltsitsin”.*
5 Uan yejuan kinkixtitoj ijkon kemej Moisés kiniluijka. Uan aktoyajok inintasal* tein kikuiaj para tekitiskej kemej tiopixkamej.
6 Satepan, Moisés kiluij Aarón uan okseki iokichpipiluan, Eleazar uan Itamar: “Amo xikauakan maj fiero mochiua namotson nion xiktsayanakan namotasal. Amo xikchiuakan nejon para amo namikiskej uan para maj Dios amo kualani iniuan nochin israelitas. Nochin namokniuan israelitas kinchokiliskej akin Jehová kinmiktij ika tit.*
7 Xietokan ikalakyan kaltsin kampa tikueyichiuaj Dios. Komo nankisaj namikiskej, porin Jehová namechixtalij ika aceite”. Uan yejuan kichiujkej tein Moisés kinnauatij.
8 Uan Jehová kiluij Aarón:
9 “Amo xitayikan vino nion okseki tayil tein teuintij keman nankalakiskej itech kaltsin kampa nantaueyichiuaj, ijkon amo namikiskej. Desde axkan ixyetok nejin tanauatil para tejua uan nochin mokoneuan.
10 Ijkon uelis kimatiskej toni mokui para kiueyichiuaskej Dios uan toni amo uelis mokuis, toni tein chipauak uan toni tein pitsotik.
11 Uan uelis kinmachtiskej israelitas nochi tein Jehová kinnauatij itechkopa Moisés”.
12 Uan Moisés kiluij Aarón uan iokichpipiluan, Eleazar uan Itamar, akin nemiajok: “Tein mokauak den harina tein kitemakakej para kichichinouiliskej Jehová, ika ximochijchiuilikan pantsitsin tein amo kipias levadura. Xikuakan kampa ika yetok altar, porin Dios kixeloj nejon sayoj para namejuan.
13 Moneki nankikuaskej kampa Dios taxeloj, porin nejin mitsxelouiliaj tejua uan mokoneuan keman kimaktiliaj Jehová teisa para kichichinouiliskej. Yejua nejon tein nechnauatijkej.
14 Tejua, mookichpipiluan uan mosiuapipiluan no nankikuaskej iyolixpan tapial tein kimauiuikaskej uan imets tein ixyetok para tiopixkamej. Moneki nankikuaskej kampa tachipaujkan. Keman israelitas kitemakaskej teisa para sentakuaskej iuan Dios,* nejin namechxelouiliskej tejua uan mokoneuan.
15 Kiuikaskej imets uan iyolixpan tapial uan no ininmantecayo tapialmej tein kichichinouiliskej Dios. Kimauiuikaskej iixpan Jehová para kimaktiliskej. Imets uan iyolixpan tapial nochipa yeski para tejua uan mokoneuan, ijkon kemej Jehová tanauatij”.
16 Uan Moisés ika tajtantinemik chivo tein israelitas kitemaktijkaj porin tajtakolejkej uan kimatik ke kichichinojkaj. Yejua ika kualanik iuan Eleazar uan Itamar, uan kiniluij:
17 “¿Keyej amo nankikuajkej tapial tein israelitas kitemakakej? Monekia nankikuaskej kampa Dios taxeloj porin nejon namechxelouilij sayoj para namejuan. Uan namechmakakej para maj Jehová kiixpolo inintajtakoluan israelitas.
18 Iesyo tapial amo kiuikakej kalijtik. Yejua ika monekia nankikuaskej inakayo kampa Dios taxeloj, ijkon kemej nechnauatijkej”.
19 Aarón kiluij Moisés: “Xikita, axkan yejuan kitemaktijkej tapialmej porin tajtakolejkej uan para kichichinouiliskej Jehová. Tejua tikmati nochi tein nechpanok axkan. Komo nikuaskia nejon nakat, ¿kiuelitaskia Jehová?”.
20 Keman Moisés kikakik tein Aarón kiluij, kiajsikamatik keyej kichiuak nejon.
Tajtolmelaualismej
^ Oso “tekol”.
^ Xikonita ikaltsin Dios.
^ Nejin kaltsitsin chijchiujtoyaj ika tasal (tilmaj).
^ Oso “inintilmaj”.
^ Oso “tekol”.
