Levítico 12:1-8
-
Tein moneki kichiuas se siuat keman kipias se ikonetsin (1-8)
12 Jehová kiluij Moisés:
2 “Xikinilui israelitas: ‘Komo se siuatsin mokokoxkatalia uan kipia se okichpiltsin, Dios kiitas ke amo chipauak chikome tonal. Amo chipauak yeski ijkon kemej ipa panoua keman estemoua mejmetstika.
3 Itech chikueyitika tonal kitekiskej* okichpiltsin.
4 Siuatsin kisentokas mochias 33 tonalmejok para motamichipauas porin tel eskisak. Amo uelis kikitskis nion se taman tein mokui para kiueyichiuaskej Dios nion kalakis kampa taxeliujtok hasta maj motamichipaua.
5 ”’Komo kipia se siuapiltsin, Dios kiitas ke amo chipauak 14 tonalmej. Amo chipauak yeski ijkon kemej ipa panoua keman estemoua mejmetstika. Siuatsin kisentokas mochias 66 tonalmejok para motamichipauas porin tel eskisak.
6 Keman motamichipauas porin kipiak se okichpiltsin oso se siuapiltsin, moneki kiitatiuj tiopixkat ikalakyan kaltsin kampa kiueyichiuaj Dios.* Kiuikilis se ichkaueuet* tein ayamo kiajxitia se xiuit para maj kichichinouilikan Dios. Uan no kiuikas se palomajkonet oso se paloma porin tajtakolej.
7 Tiopixkat kimaktilis Jehová nochi nejon para maj kiixpolo itajtakol siuatsin. Ijkon chipauakya yeski porin tel eskiska. Yejua nejin tein moneki mochiuas keman se siuatsin kipias se okichpiltsin oso se siuapiltsin.
8 Sayoj ke komo siuatsin amo kiajsi tomin para kikouas se ichkat, moneki kiuikas ome palomas oso ome palomajkonemej. Se kitemakas para maj kichichinouilikan Dios uan okse porin tajtakolej. Uan tiopixkat kitemaktis nejon para maj Dios kiixpolo itajtakol siuatsin. Ijkon yejua chipauakya yeski’”.
Tajtolmelaualismej
^ Oso “kichiuiliskej circuncisión”. Xikonita circuncisión.
^ Xikonita ikaltsin Dios.
^ Oso “borrego”.
