Levítico 14:1-57
14 Jehová no kiluij Moisés:
2 “Yejua nejin tein moneki mochiuas keman akin kipiaya lepra kiuikaskej iuan tiopixkat para maj kijto ke chipauakya.
3 Tiopixkat kisas de kampa yetokej kaltsitsin* uan kuali kiitas keniuj yetok. Komo pajtikya,
4 para uelis mochipauas, tiopixkat kinauatis maj kiuika ome totomej tein Dios kinita ke chipaujkej, cedrojkouit, hilo chichiltik uan xiujtsitsin.*
5 Tiopixkat tanauatis maj kimiktikan se totot itech se komit. Nejon komit moneki kipias at de se ameyal.*
6 Sayoj ke moneki kikuis totot tein yoltok uan cedrojkouit, hilo chichiltik uan xiujtsitsin. Nochi nejon moneki kisenajakis itech iesyo totot tein kimiktijkej.
7 Uan kipijpisuilis chikome viaje akin kipiaya lepra, uan tiopixkat kijtos ke chipauakya. Uan nejon totot kikajkauas kampa amo kaltaj.
8 ”Akin kipiaya lepra moneki kipakas itasal,* motamiximas* uan maltis,* uan chipauakya yeski. Satepan uelisya nemis kampa nemij nochin, sayoj ke amo uelis kalakis ichan chikome tonal.
9 Keman ajsis chikome tonal moneki mokuaximas, motenximas uan moixkuaximas.* Satepan ke motamiximas, kipakas itasal uan maltis uan chipauakya yeski.
10 ”Itech chikueyitika tonal kikuis ome ichkaueuetkej* tein yekin moskaltijtokej uan se ichkalamat tein ayamo kiajxitia se xiuit. Nejon tapialmej moneki kuali yetoskej. No kikuis eyi kilo uan tajko harina tein okachi kuali tamanelol ika aceite, uan se taza* aceite.
11 Tiopixkat akin kijtos ke chipauakya takat akin kipiaya lepra, kiuikas nejon takat uan tein kitemaktiti iixpan Jehová, ikalakyan kaltsin kampa kiueyichiuaj.*
12 Kiuikas se ichkaueuet porin kichiuak tein amo kuali. Tiopixkat kikuis nejon tapial uan kimaktilis Dios. No kimaktilis nejon taza aceite uan kimauiuikas nochi nejon iixpan Jehová.
13 Uan kimiktis ichkaueuet kampa Dios taxeloj, kampa ipa kinmiktiaj tapialmej tein kimaktiliaj. Inakayo nejon tapial iaxka tiopixkat, ijkon kemej no iaxka keman aksa* kimaktilia se tapial porin tajtakolej. Dios kixeloj sayoj para tiopixkamej.
14 ”Tiopixkat kitalilis inakasko akin kipiaya lepra tepitsin iesyo nejon ichkaueuet. Kitalilis itech inakas tein yetok iyekmakopa. No kitalilis tepitsin esti itech imajpil uan iikxipil tein okachi tomauak tein kipia iyekmakopa.
15 Momatekilis tepitsin aceite de nejon taza, itech iopochmay.
16 Uan kitalis imajpil de iyekmay itech aceite tein kipia itech iopochmay, uan kipijpisuis iixpan Jehová chikome viaje.
17 Satepan kikuis tepitsin aceite tein kipiasok imako uan kitalilis itech inakas tein yetok iyekmakopa akin kipiaya lepra. Tiopixkat no kitalilis tepitsin aceite itech imajpil uan iikxipil tein okachi tomauak de iyekmakopa, kampa kitalilijkaya esti.
18 Uan aceite tein mokauasok imako, kikuatalilis akin kipiaya lepra. Kichiuas nejon para maj Jehová kiixpolo itajtakol.
19 ”Tiopixkat kitemaktis in tapial tein kiuikak akin kipiaya lepra porin tajtakolej, uan nejon tapaleuis maj Dios kiixpolo itajtakol. Satepan kimiktis okse tapial tein kichichinouilis.
20 Tiopixkat kichichinos tapial uan harina tamanelol ika aceite itech altar. Kichiuas nejon para maj Dios kiixpolo itajtakol akin kipiaya lepra, uan yejua chipauakya yeski.
21 ”Sayoj ke, komo yejua pobre uan amo kiajsi tomin para kikouas nochi nejon, kiuikas se ichkaueuet tein yekin moskaltijtok porin kichiuak tein amo kuali. Tiopixkat kimauiuikas uan kimaktilis Dios para maj kiixpolo itajtakol. No kiuikilis se kilo harina tein okachi kuali tamanelol ika aceite, se taza aceite
22 uan ome palomas oso ome palomajkonemej, ijkon kemej uelis kitemakas. Se kitemaktis porin tajtakolej uan okse para kichichinouilis Dios.
23 Itech chikueyitika tonal, kiuikilis tiopixkat nochi nejon ikalakyan kaltsin, iixpan Jehová, para maj tiopixkat kijto ke chipauakya.
24 ”Tiopixkat kikuis ichkaueuet tein kiuikak akin kipiaya lepra porin kichiuak tein amo kuali uan no taza aceite. Kimauiuikas nochi nejon iixpan Jehová para kimaktilis.
25 Kimiktis ichkaueuet uan kitalilis tepitsin iesyo itech inakas tein yetok iyekmakopa akin kipiaya lepra. No kitalilis tepitsin esti itech imajpil uan iikxipil tein okachi tomauak tein kipia iyekmakopa.
26 Momatekilis tepitsin aceite itech iopochmay.
27 Uan ika imajpil de iyekmay, kikuis aceite tein kipia itech iopochmay uan kipijpisuis iixpan Jehová chikome viaje.
28 No kikuis tepitsin aceite tein kipia imako uan kitalilis itech inakas tein yetok iyekmakopa akin kipiaya lepra. Tiopixkat kitalilis tepitsin aceite itech imajpil uan iikxipil tein okachi tomauak de iyekmakopa, kampa kitalilijkaya iesyo ichkaueuet.
29 Uan aceite tein mokauasok imako, kikuatalilis akin kipiaya lepra. Kichiuas nejon para maj Jehová kiixpolo itajtakol.
30 ”Yejua kitemakas palomas oso palomajkonemej, ijkon kemej uelis kitemakas.
31 Se totot kitemakas porin tajtakolej uan okse totot kitemakas para maj kichichinouilikan Dios iuan harina tamanelol ika aceite. Uan tiopixkat kichiuas nejon para maj Jehová kiixpolo itajtakol akin kipiaya lepra.
32 ”Yejua nejin tein moneki mochiuas para maj Dios kiita ke chipauakya akin kikuika lepra sayoj ke pobre”.
33 Uan Jehová kiniluij Moisés uan Aarón:
34 “Keman nikauas maj nesi lepra itech se kali ompa Canaán, tal tein namechmakas, moneki nankichiuaskej nejin.
35 Akin iaxka kali kiitatiuj tiopixkat uan kiluis: ‘Ne nochan nesik se mancha’.
36 Tiopixkat tanauatis maj tamitakixtikan achto ke kiitatiuj nejon mancha; ijkon amo monekis kijtos ke amo chipauak nochi tein onkak kalijtik. Satepan tiopixkat kalakis para tachiatiuj.
37 Kuali kiitas kampa nesik mancha. Komo tepamit kojkoyonik uan moita xoxoktik uan kostik oso chichiltik uan nesi ke tel kalakikya itech tepamit,
38 tiopixkat yas kaltenoj uan kijtos maj amo akin kalaki itech nejon kali chikome tonal.
39 ”Keman ajsis chikome tonal tiopixkat oksepa tachiatiuj. Komo neskej okachi manchas itech tepamit,
40 tiopixkat tanauatis maj kikixtikan temej tein kipiaskej mancha uan maj kitamotatij kalampa den ueyi xolal, kampa kitamotatij tein pitsotik.
41 Uan tanauatis maj kuali kiuauanakan tepamit kalijtikkopa. Tein kisas moneki kitamotatiuij kalampa den ueyi xolal, kampa kitamotatij tein pitsotik.
42 Kampa kikixtiskej temej moneki kitaliskej okseki, uan tanauatis maj kichijchiuakan mezcla uan maj ika kialaxokan tepamit.
43 ”Sayoj ke, komo oksepa nesi se mancha itech tepamit, satepan ke kikixtijkej temej uan kiuauankej uan kialaxojkej,
44 tiopixkat kalakis uan tachiatiuj. Komo neskej okachi manchas itech tepamit, kijtosneki ke nesik lepra tein amo poliui. Dios kiita ke nejon kali amo chipauak.
45 Yejua tanauatis maj kixitinikan nejon kali uan maj kitamotatij nochi in tet, kouit uan nochi tein kisak kalampa den ueyi xolal, kampa kitamotatij tein pitsotik.
46 Sayoj ke takan aksa kalaki itech se kali satepan ke tiopixkat kijtoj maj amo akin kalaki, amo chipauak yeski hasta keman tapoyauis.
47 Uan akin kochis oso takuas itech nejon kali moneki kipakas itasal.
48 ”Sayoj ke komo tiopixkat tachiati uan kiita ke amo neskej manchas satepan ke kialaxojkej tepamit, kijtos ke in kali chipauakya, porin amo nesikok nion se mancha.
49 Para maj Dios kiita ke kali chipauakya tiopixkat kikuis ome totomej, cedrojkouit, hilo chichiltik uan xiujtsitsin.*
50 Moneki kimiktis se totot itech se komit. Nejon komit moneki kipias at de se ameyal.*
51 No kikuis cedrojkouit, xiujtsitsin, hilo chichiltik uan totot tein yoltok. Nochi nejon kiajakis itech iesyo totot tein kimiktijkej itech komit tein kipia at de se ameyal, uan moneki tapijpisuis chikome viaje kampa ika yetok kali.
52 Kichipauas nejon kali ika iesyo totot, at de se ameyal, totot tein yoltok, cedrojkouit, xiujtsitsin uan hilo chichiltik.
53 Satepan kikajkauas totot tein yoltok kampa amo kaltaj. Ijkon Dios kiitas ke nejon kali chipauakya.
54 ”Yejua nejin tein moneki mochiuas keman nesis lepra, keman nesis se mancha itech itsontekon oso itesakako aksa,
55 keman nesis lepra itech se tasal oso se kali,
56 keman aksa peuas posauayas,* xojxoleuis uan ixteuakis itech inakayo oso chichileuis.
57 Ijkon tiopixkat uelis kiixtalis ox teisa chipauak oso amo chipauak. Yejua nejin tein moneki mochiuas keman nesis lepra”.
Tajtolmelaualismej
^ Nejin kaltsitsin chijchiujtoyaj ika tasal (tilmaj).
^ Oso “hisopojxiuit”.
^ Oso “amel”.
^ Oso “itilmaj”.
^ Oso “motamixijximas”.
^ Oso “mopakas”.
^ Oso “mokixtilis iceja”.
^ Oso “borregos”.
^ Itech hebreo, “se log”. Xikonita B14.
^ Xikonita ikaltsin Dios.
^ Oso “akin”, “akaj”.
^ Oso “hisopojxiuit”.
^ Oso “amel”.
^ Oso “temis”.
