Levítico 16:1-34
-
Tonal keman Dios kiixpoloua tajtakolmej (1-34)
16 Jehová iuan tajtoj Moisés satepan ke ome iokichpipiluan Aarón mikkej porin motokijkej iixpan Jehová.
2 Jehová kiluij Moisés: “Xikilui mokniuj Aarón ke amo uelis kalakis keman yeski itech cuarto tein monotsa Santísimo, oksekopa den cortina, taixpan den tatiochiualkaxon* para maj amo miki. Porin nejua nimonextis itech se mixti kampa yetok ipantsak tatiochiualkaxon.
3 ”Yejua nejin tein Aarón moneki kichiuas achto ke kalakis itech Santísimo: kitemaktis se kuakouej tein yekin moskaltijtok uan se ichkaueuet.* Kuakouej kitemaktis porin tajtakolej uan ichkaueuet para kichichinouilis Dios.
4 Moneki maltis* uan motalilis linojtasal* tein kikui para tekitis kemej tiopixkat: tasal tein maueueyak, tatampa calzon, tasal tein ika motajkoilpis,* uan tasal tein mokuayoualouilis.
5 ”Moneki kinkuis ome chivojkonemej tein israelitas kitemakaskej porin tajtakolejkej uan se ichkaueuet para maj kichichinouilikan Dios.
6 ”Uan Aarón moneki kiuikas itech altar kuakouej tein yejua kiualkuik porin tajtakolej, para maj Dios kiixpolo itajtakoluan yejua uan ichankauan.
7 ”Kinkuis ome chivojkonemej uan kinuikas iixpan Jehová, ikalakyan kaltsin kampa kiueyichiuaj.*
8 Aarón kitatamotas tetsitsin* para kimatis katin chivojkonet kimaktilis Jehová uan katin kiuikas in tajtakol.*
9 Aarón kikuis chivojkonet tein kimaktilis Jehová porin tajtakolejkej.
10 Sayoj ke chivojkonet tein kiuikas in tajtakol, Aarón moneki kiuikas yoltok iixpan Jehová para maj kiixpolo inintajtakoluan. Ijkon uelis kititaniskej taluakyan para maj kiuika in tajtakol.
11 ”Aarón kiuikas itech altar kuakouej tein kiualkuik porin tajtakolej para maj Dios kiixpolo itajtakoluan yejua uan ichankauan. Satepan kimiktis nejon kuakouej.
12 ”Kikuis tekolkaxit uan kitemilis tekol tein kikuis itech altar tein yetok iixpan Jehová. No kikuis ome tamatsol kopal tein kuali takuechol uan kiuikas oksekopa den cortina.
13 No kitemas kopal itech tekol iixpan Jehová, uan pokti tein kisas kikemis ipantsak tatiochiualkaxon, para maj Aarón amo miki.
14 ”Ika imajpil kikuis tepitsin iesyo kuakouej uan kipijpisuis chikome viaje taixpan den* tatiochiualkaxon, kampa ika ualkisa tonaltsin.
15 ”Satepan kimiktis chivojkonet tein kitemakakej israelitas porin tajtakolejkej. Kiuikas iesyo oksekopa den cortina, uan no kipijpisuis iesyo kemej kipijpisuij iesyo kuakouej. Kipijpisuis taixpan den tatiochiualkaxon.
16 ”Ijkon tachipauas kampa Dios taxeloj porin israelitas kichiuaj tein amo chipauak, amo tatakamatij uan tajtakolchiuaj. No ijkon moneki kichipauas in kaltsin, tein yetok kampa nemij israelitas, akin amo chipaujkej.
17 ”Maj amo akin yeto itech nejon kaltsin keman tiopixkat yetos itech Santísimo. Keman kalakis, kitataujtis Dios maj kiixpolo itajtakoluan yejua, ichankauan uan nochin israelitas.
18 ”Uan kisas uan yas kampa yetok altar, iixpan Jehová, uan kitalilis nochin cuernos tepitsin iesyo kuakouej uan tepitsin iesyo chivojkonet. Ijkon kichipauas altar.
19 Ika imajpil no kipijpisuis esti itech altar chikome viaje, uan ijkon kichipauas porin israelitas kichiuaj tein amo chipauak.
20 ”Keman kichiuasya nochi tein moneki para maj Dios kiita ke chipauakya cuarto tein monotsa Santísimo, kaltsin uan altar, no kiualkuis chivojkonet tein yoltok.
21 Aarón kitalis imauan ikuako chivojkonet, uan keman kikuakitskijtos kijtos tein amo kuali tein kichiujkej israelitas uan nochi inintajtakoluan. Nochi nejon kemej yeskia kikuatalilis chivojkonet uan kimakas takat akin kiixtalijkej para maj kititani taluakyan.
22 Kititaniskej chivojkonet taluakyan para maj ompa kiuika nochi inintajtakoluan.
23 ”Uan Aarón kalakis kampa Dios taxeloj, mokixtilis linojtasal tein motalilijka keman kalakik itech Santísimo, uan ompa kikauas.
24 Moneki maltis kampa Dios taxeloj uan motapatilis. Satepan kichichinouilis Dios in tapial tein yejua kiuikak uan tein kiuikakej israelitas. Kichiuas nejon para maj Dios kiixpolo itajtakoluan yejua uan israelitas.
25 Kichichinos itech altar ininmantecayo tapialmej tein kitemakakej porin tajtakolejkej para maj popoka.
26 ”Akin kititanik chivojkonet tein kiuikak in tajtakol moneki kipakas itasal uan maltis. Satepan uelis kalakisya kampa nemij nochin.
27 ”Uan ininpankuetaxyo, ininnakayo uan ininkuit kuakouej uan chivojkonet tein kimaktilijkej Dios porin tajtakolejkej, kitatiskej* uejka den kaltsitsin.* Tiopixkat kiuikak ininesyo nejon tapialmej itech Santísimo para maj Dios kiixpolo inintajtakoluan.
28 Akin kitatis nochi nejon moneki kipakas itasal uan maltis. Satepan uelis kalakisya kampa nemij nochin.
29 ”Desde axkan nikixtalia nejin tanauatil tein moneki nankitakamatiskej: itech metsti etanim,* tonal 10, moneki namotayokoltiskej por namotajtakoluan,* uan amo xikchiuakan nion se tekit, namejuan uan akin okseko kayomej akin nemij namouan.
30 Nejon tonal Dios kiixpolos namotajtakoluan uan namechchipauas. Jehová namechtapojpoluis uan namechitas ke nanchipaujkej.
31 Nejon tonal moneki nankiitaskej kemej tonal sábado uan amo nankichiuaskej nion se tekit. Uan moneki namotayokoltiskej por namotajtakoluan. Desde axkan nikixtalia nejin tanauatil.
32 ”Tiopixkat akin kiixpatas itat uan kikuatekiliskej aceite uan kiixtaliskej kemej tiopixkat kintemaktis tapialmej. Motalilis linojtasal tein kikuis para tekitis kemej tiopixkat.
33 Kintemaktis nejon tapialmej para maj Dios kiita ke chipauakya cuarto tein monotsa Santísimo, nochi kaltsin uan altar, uan para maj kiixpolo inintajtakoluan tiopixkamej uan nochin israelitas.
34 Desde axkan nikixtalia nejin tanauatil tein moneki nankitakamatiskej uan mochiuas sepa itech xiuit, para maj Dios kiixpolo inintajtakoluan israelitas”.
Uan Aarón kichiuak nochi tein Jehová kinauatijka Moisés.
Tajtolmelaualismej
^ Xikonita tatiochiualkaxon.
^ Oso “borrego”.
^ Oso “mopakas”.
^ Oso “linojtilmaj”.
^ Oso “motajkotsikos”.
^ Xikonita ikaltsin Dios.
^ Xikonita tetsitsin tein kitatamotayaj.
^ Itech hebreo, “para Azazel”. Nejin tokayit xa kijtosneki ‘chivo tein poliuiti’.
^ Oso “de ipantsak”.
^ Oso “kichichinoskej”.
^ Nejin kaltsitsin chijchiujtoyaj ika tasal (tilmaj).
^ Itech hebreo, “chikometika metsti”. Axkan nejin metsti uetsi itajkotian septiembre hasta itajkotian octubre. Xikonita etanim.
^ Keman motayokoltiayaj xa amo takuayaj nion kichiuayaj okseki taman tein ika moyolpaktiskiaj.
