Levítico 18:1-30
-
Tein Dios kiixtalij maj amo kichiuakan (1-30)
18 Jehová no kiluij Moisés:
2 “Xikinilui israelitas: ‘Nejua namoDios Jehová.
3 Amo xikchiuakan tein kichiuaj akin nemij Egipto, kampa nanenkej. Amo no xikchiuakan tein kichiuaj akin nemij Canaán, kampa namechajxititi. Uan amo xinemikan kemej yejuan.
4 Xikchiuakan tein nikixtalia uan xiktakamatikan notanauatiluan. Nejua namoDios Jehová.
5 Moneki nankitakamatiskej notanauatiluan uan tein nikixtalia. Akin kichiuas nejon kisentokas nemis. Nejua niJehová.
6 ”’Maj amo akin moteka iuan se ichankauj. Nejua niJehová.
7 Amo ximoteka iuan mopaj nion iuan momaj. Yejua momaj; amo ximoteka iuan.
8 ”’Amo ximoteka iuan motakpanan. Nejon kipinaujtiskia mopaj.
9 ”’Amo ximoteka iuan mokniuj siuat, maski yeski isiuapil mopaj oso isiuapil momaj, maski yolik mochan oso okseko.
10 ”’Amo ximoteka iuan moixuiuj,* porin nejon mitspinaujtiskia.
11 ”’Amo ximoteka iuan motakpaikniuj, isiuapil mopaj, porin yejua mokniuj.
12 ”’Amo ximoteka iuan motía, iikniuj mopaj. Yejua uan mopaj sesaj ininesyo.
13 ”’Amo ximoteka iuan motía, iikniuj momaj. Yejua uan momaj sesaj ininesyo.
14 ”’Amo ximoteka iuan isiuatsin motío, iikniuj mopaj. Komo ijkon tikchiua tikpinaujtis motío. Nejon siuatsin motía.
15 ”’Amo ximoteka iuan mosiuamon. Yejua isiuatsin mookichpil; amo ximoteka iuan.
16 ”’Amo ximoteka iuan mocuñada, porin nejon kipinaujtiskia mokniuj.
17 ”’Amo ximoteka iuan se siuat uan iuan isiuapil. Amo no ximoteka iuan iixuiuj. Nejon siuamej sesaj ininesyo. Nejon semi pitsotik.
18 ”’Amo ximonamikti iuan iikniuj mosiuatsin, porin motauelitaskej. Amo ximoteka iuan keman mosiuatsin yoltosok.
19 ”’Amo ximoteka iuan se siuat keman amo chipauak yeski porin estemok.
20 ”’Amo ximoteka iuan se tesiuauj, porin nejon kichiuaskia maj Dios kiita ke amo tichipauak.
21 ”’Amo xikaua maj kikuikan se mokoneuj para kimaktiliskej Mólek.* Amo xikchiua maj amo kuali ika tajtokan moDios. Nejua niJehová.
22 ”’Amo ximoteka iuan se motakaikniuj kemej timoteka iuan se siuat. Nejon tetajyaltij.
23 ”’Maj nion se takat moteka iuan se tapial,* porin nejon kichiuaskia maj Dios kiita ke amo chipauak. Uan maj nion se siuat moteka iuan se tapial. Dios amo ijkon kiixtalij.
24 ”’Amo xikchiuakan nion se taman kemej nejin para amo namopitsotiliskej, porin yejua nejon tein ika mopitsotilijtokej akin nemij itech altepemej kampa nanajsitij, yejua ika nikinkixtiti.
25 Inintal amo chipauak uan nikintatsakuiltis porin kichiuaj tein amo kuali, uan tal kemej yeskia kinijsotas akin ompa nemij.
26 Sayoj ke namejuan, israelitas uan akin okseko nankayomej, moneki nankitakamatiskej notanauatiluan uan nankichiuaskej tein nikixtalia, uan amo xikchiuakan nion se taman tein tetajyaltij.
27 Porin nochi nejon tein tetajyaltij kichiujtiuitsej akin ompa nemij, yejua ika nejon tal amo chipauak.
28 Komo no nankipitsotiliaj, nejon tal no namechijsotas, ijkon kemej kinijsotas akin ompa nemij.
29 Nochin akin kichiuaskej se taman tein tetajyaltij kemej nejin, ixpoliuiskej.
30 Namejuan moneki nankichiuaskej tein namechnauatia uan amo nankichiuaskej tein pitsotik tein kichiujtiuitsej akin ompa nemij, para amo ximopitsotilikan kemej yejuan. Nejua namoDios Jehová’”.
Tajtolmelaualismej
^ Oso “isiuapil mookichpil oso iuan isiuapil mosiuapil”.
^ Nejin kijtosneki motekas iuan se tapial kemej motekaskia iuan se siuat.
