Levítico 19:1-37
-
“Moneki nanyeskij nanchipaujkej” (1-37)
-
Tein moneki kichiuaskej keman kitekiskej tatok (9, 10)
-
Maj amo teyi kichiuilikan akin amo ueli takaki uan akin amo tachia (14)
-
“Amo xitetakajkayauilijtinemi” (16)
-
“Amo [...] xikelnamiktinemi tein mitschiuilijkej” (18)
-
Tatuajes (28)
-
“Moneki tiktakachiuas akin xiuejya” (32)
-
Keniuj moneki kinitaskej akin amo israelitas (33, 34)
-
19 Jehová oksepa iuan tajtoj Moisés uan kiluij:
2 “Xikinilui nochin israelitas nejin: ‘Moneki nanyeskij nanchipaujkej porin nejua, namoDios Jehová, senkis nichipauak.
3 ”’Nanochin moneki nankitakachiuaskej* namomaj uan namopaj, uan nankichiuaskej tein namechnauatij xikchiuakan itech tonal sábado. Nejua namoDios Jehová.
4 Amo xikinueyichiuakan dioses tein amo tapaleuiaj nion ximochijchiuilikan tatadiosmej.* Nejua namoDios Jehová.
5 ”’Komo nankimaktiliaj Jehová se tapial para iuan nansentakuaskej,* xikmaktilikan kemej kinamiki para nankiyolpaktiskej.
6 Moneki nankikuaskej itech tonal keman nankitemaktiskej uan no mostika. Sayoj ke nochi tein mokauas moneki nankichichinoskej uiptika.
7 Uan komo uiptika aksa* kikua tein mokauak, nejon tetajyaltij uan Dios amo kiyolpaktis.
8 Akin kikuas nejon nakat kitatsakuiltiskej, porin amo kikuik kemej kinamiki tein xeliujtok para Jehová. Moneki mikis.
9 ”’Keman tiktekis tein tiktokas, amo xikteki nochi tein mochiuas tatenoj nion xikpejpenati tein mokauas.
10 Amo no xiktekiti uvas tein tikaujtiajki nion xikololo tein uetsik. Xikinkauili pobres* uan akin okseko kayomej. Nejua namoDios Jehová.
11 ”’Amo xitachtekikan, amo xixolopijtikan nion ximokakajkayauakan.
12 Amo xikyekijtokan teisa notokaykopa keman nankimatij ke amo melauj, porin ijkon amo kuali noka tajtoskiaj. Nejua namoDios Jehová.
13 Amo xikajkayaua mokniuj para tikuilis tein iaxka nion xitachteki. Niman xiktaxtaui motakeual. Amo ximokauili itaxtauil hasta mostika.
14 ”’Amo xikuijuikalti* se akin amo ueli takaki nion xiktalili teisa tein kitsakuilis akin amo tachia, uan xikmojkatoka moDios. Nejua niJehová.
15 ”’Amo xitechichikouikan keman nankimelaujtoskej se kuejmol. Amo xikpaleuikan se pobre sayoj porin pobre oso amo sayoj xiktakachiuakan akin tominpia. Xikyektalikan ikuejmol namokniuj kemej kijtoua tanauatil.
16 ”’Amo xitetakajkayauilijtinemi. Amo xikchiua nion teyi tein ueliskia kichiuas maj mokniuj kipano tein amo kuali.* Nejua niJehová.
17 ”’Amo xiktauelita mokniuj moyolijtik. Xikilui mokniuj tein amo kuali kichiuak, para amo tikchiuas se tajtakol kemej yejua.
18 ”’Amo ximomakepa nion xikelnamiktinemi tein mitschiuilijkej, uan xiktasojta moknitsin kemej tejua timotasojta. Nejua niJehová.
19 ”’Xiktakamatikan notanauatiluan: amo xikincruzarokan ome tataman namotapialuan; amo xiktokakan ome tataman xinach namotalpan, uan amo no ximotalilikan se tasal* tein tajkitil ika ome tataman hilo.
20 ”’Komo se takat moteka iuan se siuat, uan nejon siuat ixyetoyaya monamiktis iuan okse takat, sayoj ke ayamo kikouayaj nion kimajkaujtoya iteko, nejon takat uan siuat moneki kintatsakuiltiskej. Sayoj ke amo kinmiktiskej, porin siuat kipiayaok iteko.
21 Takat moneki kiuikilis Jehová se ichkaueuet* para kimaktilis porin kichiuak tein amo kuali. Kiuikas ikalakyan kaltsin kampa kiueyichiuaj.*
22 Uan tiopixkat kimaktilis Jehová nejon ichkaueuet para maj kiixpolo itajtakol nejon takat, uan Dios kitapojpoluis.
23 ”’Keman nanemiskejya itech tal tein namechmakati uan nankitokaskej se kouit tein kitemaka itakilo, nejon takilot amo chipauak yeski uan eyi xiuit amo uelis nankikuiskej. Amo xikuakan.
24 Sayoj ke itech naujpatika xiuit, Jehová kiitas ke nochi itakilo chipauakya uan nanyolpakiskej iixpan.
25 Uan itech makuiltika xiuit uelis nankikuaskejya. Ijkon momiakilis tein nankitekiskej. Nejua namoDios Jehová.
26 ”’Amo xikuakan nion teyi tein esyoj.
”’Amo xiktemokan tein namechmatiltis toni panos satepan nion xitenaualuikan.
27 ”’Amo ximokuaximakan* sayoj namonajnakastan nion eliuis xiktejtekikan namotentson.
28 ”’Amo ximotejtekikan keman aksa momikilis nion ximochiuilikan tatuajes. Nejua niJehová.
29 ”’Amo xikchiua maj mosiuapil monamaka iniuan takamej porin tikpinaujtis. Komo ijkon tikchiua, tal kampa tinemi mopitsochiuas ika nejon auilnemilis uan motelchiuas tein tepinaujtij uan tetajyaltij.
30 ”’Moneki nankichiuaskej tein namechnauatij xikchiuakan itech tonal sábado uan amo xikauilmatikan tein mochiua kampa nechueyichiuaj. Nejua niJehová.
31 ”’Amo xikintemokan akin kinnojnotsaj mikemej nion adivinos, porin nejon kichiuaskia amo xichipaujkej. Nejua namoDios Jehová.
32 ”’Ximoketsa iixpan akin kuapochiktik, uan moneki tiktakachiuas* akin xiuejya uan tikmojkatokas moDios. Nejua niJehová.
33 ”’Komo se akin amo israelita nemi namouan, amo xiktajyouiltikan.
34 Xikitakan kemej se namokniuj uan xiktasojtakan kemej namejuan namotasojtaj, porin namejuan no nantepalnemiaj ompa Egipto. Nejua namoDios Jehová.
35 ”’Amo xitakajkayauakan keman nantatamachiuaskej.
36 Sayoj xikuikan tatamachiualoni, pesas, chikiuit uan komit tein ajsitok tatamachiuaj.* Nejua namoDios Jehová, akin namechkixtij de Egipto.
37 Xiktakamatikan nochi notanauatiluan uan xikchiuakan nochi tein nikixtalia. Nejua niJehová’”.
Tajtolmelaualismej
^ Oso “nankipoujkaitaskej”.
^ Oso “tiotsitsin”.
^ Oso “akin”, “akaj”.
^ Oso “akin tajyouiaj”.
^ Oso “Amo xiknejnekili tein amo kuali”, “Amo xiktejtelchiua (xikijijto)”.
^ Oso xa “Xikpaleui mokniuj komo tikita ke kipanoti tein amo kuali”.
^ Oso “tilmaj”.
^ Oso “borrego”.
^ Xikonita ikaltsin Dios.
^ Oso “Amo ximokuaxijximakan”.
^ Oso “tikpoujkaitas”.
^ Itech hebreo, “se efá tein ajsitok uan se hin tein ajsitok”. Efá mokuia para kitamachiuaskej nochi tataman xinach, uan hin para kitamachiuaskej at. Xikonita B14.
