Levítico 21:1-24
21 Jehová no kiluij Moisés: “Xikinilui tiopixkamej, ikoneuan Aarón: ‘Komo se akin namouan poui momikilia, amo ximotokikan porin amo nanchipaujkejok nanyeskij.
2 Sayoj ke komo momikilia namomaj, namopaj, namookichpil, namosiuapil oso se namokniuj takat, uelis namotokiskej maski amo nanchipaujkejok nanyeskij.
3 No uelis namotokiskej komo momikilia se namokniuj siuat, komo ayamo motekaya iuan se takat, iuan nanemiaj uan ayamo monamiktiaya.
4 Uan komo momikilia isiuauj se takat akin namouan poui, amo no ximotokikan porin amo nanchipaujkejok nanyeskij.
5 Amo ximokuaximakan* nion ximokanximakan, uan amo no ximotejtekikan.
6 Moneki nesis ke nanxeliujtokej para namoDios uan amo nankichiuaskej maj oksekin amo kuali ika tajtokan, porin namejuan nankichichinouiliaj Jehová tein kimaktiliaj. Nejon kemej yeskia itakual namoDios. Moneki nesis ke nanxeliujtokej.
7 Amo ximonamiktikan iuan se siuat akin monamaka iniuan takamej oso se siuat akin ika mauiltijkej, nion iuan se siuat akin itakauj kikauak, porin tiopixkat xeliujtok para iDios.
8 Moneki tinechxelouilis, porin yejua kimaktilia moDios in takual. Moneki tikitas ke xeliujtok porin nejua Jehová, akin namechxelojtok, senkis nichipauak.
9 ”’Uan komo isiuapil se tiopixkat monamakaskia para motekas iuan se takat, kipinaujtiskia itat. Moneki kimiktiskej uan kichichinoskej.
10 ”’Tayekankatiopixkat kikuatekilijkej aceite uan kiixtalijkej para maj motalili tasal* tein kikuis para tekitis kemej tiopixkat. Maj amo kikaua maj fiero mochiua itson nion maj kitsayana itasal.
11 Maj amo motoki kampa yetok se miket. Maj amo mopitsotili nion por itat nion por inan.
12 Maj amo kisa de kampa yetok ikaltsin Dios* nion maj kipitsotili, porin kikuatekilijkej aceite uan nejon kinextia ke kiixtalijkej maj tekiti kemej tiopixkat. Nejua niJehová.
13 ”’Maj monamikti iuan se siuat akin ayamo motekani iuan se takat.
14 Amo uelis monamiktis iuan se siuat akin momikilijya itakatsin, se akin itakauj kikauak, se akin ika mauiltijkej oso se akin monamakatinemi. Moneki monamiktis iuan se siuat akin iuan poui uan ayamo motekani iuan se takat.
15 Komo amo ijkon kichiua, oksekin kiitaskej ke ikoneuan amo chipaujkej, porin nejua niJehová, akin nikxeloj’”.
16 Jehová no kiluij Moisés:
17 “Xikilui Aarón: ‘Komo semej mokoneuan kipia teisa tein amo kuali, amo uelis kimaktilis Dios in takual.
18 Amo uelis kichiuas nejon nion se takat akin amo tachia, akin koxoj, akin yekatsol kotoltik, akin kipia se imay oso se imets okachi ueyak,
19 akin metspostektok oso mapostektok,
20 akin pantomotstik, akin amo moskaltij,* akin amo ixkuali, akin sauati, xojxoleui oso se takat akin mokokoj ikestsalan.*
21 Komo semej ikoneuan tiopixkat Aarón kipia teisa tein amo kuali, amo uelis kichichinouilis Jehová tein kimaktiliaj. Kemej amo yekkuali, amo uelis kimaktilis iDios in takual.
22 Uelis kikuas nochi tataman takual tein kixelouiliaj Dios.
23 Sayoj ke amo uelis motokis kampa yetok cortina nion kampa yetok altar, porin kipia teisa tein amo kuali. Maj amo kipitsotili kaltsin, porin nejua niJehová, akin nikinxelojtok’”.
24 Uan Moisés tajtoj iuan Aarón uan ikoneuan uan iniuan nochin israelitas.
Tajtolmelaualismej
^ Oso “Amo ximokuaxijximakan”.
^ Oso “tilmaj”.
^ Xikonita ikaltsin Dios.
^ Oso xa “kokoxkatik”.
^ Oso “itech itestículos”.
