Levítico 24:1-23
24 Jehová oksepa iuan tajtoj Moisés uan kiluij:
2 “Xikinnauati israelitas maj mitsuikilikan yekaceite de itakilo olivojkouit para maj candilmej nochipa tauijtokan.
3 Aarón moneki kiitas maj xotatokan candilmej tein yetokej itech kaltsin kampa taueyichiuaj,* oksekopa den cortina, tanakastan den tatiochiualkaxon.* Moneki xotatoskej iixpan Jehová desde tiotak hasta kualkan. Desde axkan nikixtalia nejin tanauatil tein moneki kichiuaskej ijkon kemej yoltiaskej.
4 Yejua moneki kiitas maj candilmej nochipa yetokan itech tauilketsaloni tachijchiuj ika oro tein okachi kuali iixpan Jehová.
5 ”Tikuis harina tein okachi kuali uan tikchijchiuas 12 pantsitsin tein ijtikoyoktikej. Tikuis ome kilo harina para tikchijchiuas sejse pantsin.
6 Itech mesa tein tachijchiuj ika oro tein okachi kuali, ojkan tiknejnepanos nejon pantsitsin iixpan Jehová. Seko chikuasen uan okseko no chikuasen.
7 Itech sejse tanepan tiktalis istak kopal tein amo tamanelol. Tikchichinouilis Jehová istak kopal uan nejon kiixnextis pantsin tein kimaktiliaj.
8 Nochi sábados, tiopixkat moneki kitalis pantsin iixpan Jehová. Desde axkan nimotenkaua nejin iniuan israelitas.
9 Nejon pantsin ininaxka yeski Aarón uan ikoneuan, uan kikuaskej kampa Dios taxeloj. Keman kimaktiliaj Jehová teisa para kichichinouiliskej, moneki kinxelouiliskej. Desde axkan nikixtalia nejin”.
10 Moajsia se okichpil akin inan katka se israelita uan itat katka de Egipto. Nejon okichpil peuak moteuia iuan se israelita kampa nochin mochantijtoyaj.
11 Iokichpil nejon israelita peuak kiuijuikaltia* Dios uan kitenkuitiaya itokay. Yejua ika kiuikilijkej Moisés. Inan nejon okichpil monotsaya Selomit, isiuapil Dibrí, ichankauj Dan.
12 Ompa kipixtoyaj hasta maj kimatinij toni kiixtalijka Jehová.
13 Uan Jehová kiluij Moisés:
14 “Xikalankixti akin nechuijuikaltij,* uan nochin akin kikakkej moneki kitaliskej ininmauan ikuako in okichpil, uan nochin moneki kitetemaskej.*
15 Uan xikinilui israelitas: ‘Akin kiuijuikaltis iDios, moneki kitatsakuiltiskej.
16 Yejua ika, akin kiuijuikaltis Jehová uan kitenkuitias itokay moneki mikis. Nochin moneki kitetemaskej.* Yeski israelita oso okseko kayot, moneki mikis por kiuijuikaltis Dios uan kitenkuitias itokay.
17 ”’Komo se takat kimiktia aksa,* moneki mikis.
18 Akin kimiktilis itapial aksa moneki taxtauas, para maj se tapial kiixpata okse.
19 Komo se takat kikokoua okse, nejon takat no moneki kichiuiliskej tein yejua techiuilij.
20 Komo kipostekilij se iomiyo, maj no kipostekilikan se iomiyo, komo kiixpitsinij maj no kiixpitsinikan uan komo kitanpixoj maj no kitanpixokan;* moneki kichiuiliskej tein yejua techiuilij.
21 Akin kimiktilis itapial aksa moneki taxtauas, sayoj ke akin kimiktis aksa, moneki mikis.
22 ”’Tein moixtalis mochiuas iuan se akin okseko kayot maj no yejua moixtali iuan se israelita, porin nejua namoDios Jehová’”.
23 Uan Moisés tajtoj iniuan israelitas uan yejuan kikalankixtijkej akin kiuijuikaltijka* Dios uan kitetenkej.* Israelitas kichiujkej ijkon kemej Jehová kinauatijka Moisés.
Tajtolmelaualismej
^ Xikonita ikaltsin Dios.
^ Xikonita tatiochiualkaxon.
^ Oso “kitejtelchiua”, “kijijtoua”.
^ Oso “nechtejtelchiuak”, “nechijijtoj”.
^ Oso “kitepoxoniskej”, “kimojmotaskej ika tet”.
^ Oso “kitepoxoniskej”, “kimojmotaskej ika tet”.
^ Oso “akin”, “akaj”.
^ Oso “tetantepeuj maj no kitantepeuakan”.
^ Oso “kitejtelchiujka”, “kijijtojka”.
^ Oso “kitepoxonijkej”, “kimojmotkej ika tet”.
