Levítico 25:1-55
25 Jehová oksepa iuan tajtoj Moisés itech tepet Sinaí, uan kiluij:
2 “Xikinilui israelitas: ‘Keman nanajsiskejya itech tal tein namechmakati, nankiixseuiskej namotal se xiuit, kemej yeskia se sábado tein xeliujtok para Jehová.
3 Chikuasen xiuit titatokas, tikmatekis uvajkouit uan tiktekis tein mochiuas.
4 Sayoj ke chikometika xiuit yeski kemej sábado tein xeliujtok para Jehová, uan tikixseuis motal. Amo xitatoka nion xikmateki uvajkouit.
5 Komo uetsi xinach keman tiksentilis tein mochiua uan iselti ixua, amo xiksentili tein mochiuas nion xiksentili uvas. Moneki tikixseuis motal se xiuit.
6 Uelis tiktekis itech nejon xiuit* sayoj tein nankikuaskej: tejua, takamej uan siuamej tein tikinkouas, akin tikintakeuas uan akin amo israelita uan nemis mouan.
7 Motapialuan uan koujtajtapialmej no uelis kikuaskej tein mochiuas. Nochi tein mochiuas uelis nankikuaskej.
8 ”’Chikome viaje moneki tikpouas chikome xiuit, uan ajsis 49 xiujmej. Itech nochi nejon xiujmej tal moixseuis chikome xiuit.
9 Uan itech metsti etanim,* tonal 10, chikauak titapitsas;* itech tonal keman Dios kiixpolos namotajtakoluan, moneki nantapitsaskej kemej mokakis itech nochi namotal.
10 Xiuit 50 moneki nankiitaskej ke xeliujtok para Dios uan nankitematiltiskej ke kinmajkauaskej nochin akin yetoskej temako. Yeski xiuit keman kimakixtiskej nochi, uan nanochin namechkepiliskej namotal uan namokepaskej iniuan namochankauan.
11 Xiuit 50 yeski xiuit keman kimakixtiskej nochi. Amo nantatokaskej nion nankisentiliskej tein iselti mochiuas nion nankisentiliskej uvas.
12 Porin nejon xiuit kimakixtiskej nochi. Moneki nankiitaskej ke xeliujtok para Dios. Ijkuak, sayoj uelis nankitekiskej tein nankikuaskej.
13 ”’Itech nejin xiuit, nanochin moneki namechkepiliskej tein namoaxka katka.
14 Amo ika ximauiltikan namokniuj komo nankinamakiltiaj oso nankikouiliaj teisa.
15 Komo tikouati teisa, xikita kanachi xiujmejya panok desde xiuit keman kimakixtijkej nochi, uan akin mitstanamakiltis moneki kiitas kanachi xiujmejok tatakis.
16 Komo miak xiujmejok poliui, uelis kipankixtilis ipatiuj, sayoj ke komo amo miak xiujmejok poliui, moneki kitsinkixtis. Moneki kiitas kanachi xiujmejok tatakis.
17 Maj amo akin ika mauilti se iikniuj, uan moneki nankimojkatokaskej namoDios, porin nejua namoDios Jehová.
18 Komo nankitakamatij notanauatiluan uan nankichiuaj tein nikixtalia, kualtsin nanemiskej.
19 Motachiuas itech nochi nejon tal, uan namejuan kuali nanixuiskej uan kualtsin nanemiskej.
20 ”’Sayoj ke xa namotajtaniskej “¿Toni tikuatij itech chikometika xiuit komo amo uelis titatokaskej nion tiksentiliskej tein mochiuas?”.
21 Amo ximotekipachokan. Xikyekmatikan ke itech chikuasentika xiuit namechteltatiochiuis uan mochiuas tein namechajsis eyi xiuit.
22 Uan itech chikueyitika xiuit nantatokaskej uan nankikuajtoskej tein nankisentilijkej itech chikuasentika xiuit. Nankikuajtoskej nejon hasta chiknauitika xiuit, hasta maj mochiua tein nankitokkej.
23 ”’Uelis nankinamakaskej namotal, sayoj ke akin namechkouilis amo uelis mokauilis nochipaya, porin tal noaxka. Nejua namechita kemej akin mokaltalitij tetalpan uan kemej akin nemij kampa amo kayomej.
24 Itech nochi in tal kampa nanemiskej, akin kinamakas italpan uelis oksepa kikouas.
25 ”’Komo mokniuj mokaua pobre uan kinamaka se cacho ital, se ichankauj moneki ualas uan oksepa kikouas tein iikniuj kinamakak.
26 Akin amo kipias se ichankauj akin uelis oksepa kikouas tal uan yejua kipia tomin para mokouilisya,
27 moneki kiitas kanachi xiuit panok desde ke kinamakak para kiixtalis ipatiuj tal, uan kikepilis sayoj tomin tein poliuis akin kikouilijka. Uan ijkuak, uelis oksepa iaxka yeski nejon tal.
28 ”’Sayoj ke komo amo kipia tomin para kikouas, akin takouak mokauilis hasta itech xiuit keman kimakixtiskej nochi. Itech nejon xiuit, akin tanamakak oksepa iaxka yeski nejon tal.
29 ”’Uan akin kinamakas se kali tein yetok itech se ueyi xolal kampa tatsaktok ika tepamit, uelis oksepa kikouas nejon kali sayoj itech yekinika xiuit. Satepan ke kinamakas, sayoj kipias se xiuit para uelis oksepa kikouas.
30 Sayoj ke, komo nejon kali amo kikouaj itech nejon xiuit, akin kikouak mokauilisya. Iaxka yeski yejua uan ikoneuan akin yoltiaskej. Amo moneki kikepas itech xiuit keman kimakixtiskej nochi.
31 Sayoj ke, komo kali tein kinamakaj yetok itech se xolal kampa amo tatsaktok ika tepamit, uelis oksepa kikouaskej keman yeski, ijkon kemej kichiuaj keman kinamakaj se tal. Uan moneki kikepiliskej akin iaxka katka itech xiuit keman kimakixtiskej nochi.
32 ”ʼIchankauan Leví, akin moixmatij kemej levitas, kipiaj ininchan itech uejueyi xolalmej. Komo kinamakaj ininchan, uelis oksepa kikouaskej keman yeski.
33 Komo se levita amo oksepa kikoua ichan tein kinamakak, no kikepiliskej itech xiuit keman kimakixtiskej nochi, porin kalmej tein yetokej itech uejueyi xolalmej kampa kinmakakej, ininaxka yejuan.
34 Uan no, ixtauat tein kiyoualoua uejueyi xolalmej tein kinmakakej amo uelis kinamakaskej porin ixyetok maj nochipa ininaxka.
35 ”ʼKomo se mokniuj mokaua pobre uan amo ueli moixpanoltiaok, moneki tiktekipanos kemej tikchiuaskia iuan se akin amo israelita oso se akin mokaltaliti tetalpan, para maj amo miki.
36 Komo tikpaleuia, amo xikixtili tomin. Moneki tikmojkatokas moDios, uan mokniuj amo mikis.
37 Amo xiktaneujti motomin para tiktanilis nion xiktamaka para tikixtilis tomin.
38 Nejua namoDios Jehová, akin namechkixtij de Egipto para namechmakas tal tein poui Canaán, para nankimatiskej ke nejua niDios.
39 ”’Komo se mokniuj mokaua pobre uan mitsiluia xikoua, amo xikchiualti tekit tein kichiualtiaj takeual tein tanamak.
40 Moneki tikitas kemej se akin tetekitilia oso kemej se akin mokaltaliti tetalpan. Moneki mitstekitilis hasta xiuit keman kimakixtiskej nochi.
41 Nejon xiuit mitskauas. Yejua uan ikoneuan mokepaskej iniuan ichankauan, uan oksepa kikepiliskej tal tein kikauilijteujkej iuejkaujtatuan.
42 Porin yejuan notakeualuan, akin nikinkixtij de Egipto. Yejuan amo uelis monamakaskej kemej kinnamakaj takeualmej.
43 Amo xiktajyouilti mokniuj, uan moneki tikmojkatokas moDios.
44 Komo tikneki tikinpias takeualmej, moneki yeskij den altepemej tein mitsyoualojtokej, de ompa uelis tikinkouas takamej uan siuamej.
45 No uelis tikinkouas ininkoneuan akin sayoj mokaltalitoj kampa tinemi uan ininchankauan akin ompa yoliskej, uan yejuan yeskij motakeualuan.
46 Uelis tikinkauilijteuas mokoneuan, uan yejuan kisentokaskej yeskij inintakeualuan. Uelis tikintekitiltis. Sayoj ke amo xikintajyouilti mokniuan israelitas.
47 ”’Sayoj ke komo se akin amo israelita uan mouan nemi tominpia, uan se mokniuj israelita mokaua pobre uan kiluia akin amo israelita oso se ichankauj maj kikoua,
48 yejua uelis oksepa kikouaskej. Se iikniuj uelis kikouas.
49 No uelis kikouas itío, iprimo oso okse ichankauj.
”’Yejua no uelis mokouas komo satepan tominpia.
50 Moneki kiitas iuan akin kikouak kanachi xiuit panok desde ke monamakak, kanachi xiuit poliui para ajsis xiuit keman kimakixtiskej nochi uan kanachi ika monamakak. Ika nejon kiixejekoskej kanachi moneki taxtauas. Nochi nejon xiujmej yeski kemej se tetekitilijkej.
51 Komo poliuiok miak xiujmej, moneki taxtauas por xiujmej tein poliuiok.
52 Sayoj ke komo amo miak xiujmejok poliui, moneki kiixejekos kanachi kitemakas uan sayoj taxtauas tein poliuis.
53 Yejua moneki kitekitilis akin kikouak nochi xiujmej kemej se akin tetekitilia, uan tejua moneki tikitas maj amo kitajyouilti.
54 Sayoj ke komo amo ueli mokoua ijkon kemej nikan moixtalia, yejua uan ikoneuan kinmajkauaskej itech xiuit keman kimakixtiskej nochi.
55 ”’Porin israelitas notakeualuan, akin nikinkixtij de Egipto. Nejua namoDios Jehová.
Tajtolmelaualismej
^ Itech hebreo, “sábado”.
^ Itech hebreo, “chikometika metsti”. Axkan nejin metsti uetsi itajkotian septiembre hasta itajkotian octubre. Xikonita etanim.
^ Itech hebreo, “tikpitsas kuaomit”.
