Levítico 27:1-34
27 Jehová oksepa iuan tajtoj Moisés uan kiluij:
2 “Xikinilui israelitas: ‘Akin motenkauas kimaktilis Jehová ipatiuj aksa,* moneki kitemakas tomin tein moixtalis.
3 Komo taxtauati por se takat akin kipia 20 hasta 60 xiujmej, moneki kitemakas tajko kilo* plata. Kitamachiuaskej plata ika pesa tein kikuij kampa Dios taxeloj.
4 Sayoj ke komo taxtauati por se siuat, moneki kitemakas 342 gramos.*
5 Komo okichpil uan kipia 5 hasta 20 xiujmej, moneki kitemakas 228 gramos,* uan komo siuapil, 114 gramos.*
6 Komo okichpilkonet uan kipia se metsti hasta makuil xiuit, moneki kitemakas 57 gramos* uan komo siuapilkonet, 34 gramos.*
7 ”’Komo taxtauati por se takat akin kipia 60 xiujmej oso kipanauijya, moneki kitemakas 171 gramos* de plata, uan komo siuat, 114 gramos.
8 Sayoj ke, komo akin motenkauak tel pobre uan amo ueli kitemaka tein moixtalia, moneki kiitatiuj tiopixkat uan yejua kiixtalis kanachi kitemakas ijkon kemej uelis taxtauas.
9 ”’Akin motenkauas kimakas Jehová se tapial, nejon tapial xeliujtos para Jehová.
10 Amo uelis kiixpatas; amo no uelis kiualkuis okse tein okachi kuali yetos oso se tein amo kuali yetos. Sayoj ke komo kiixpataskia nejon tapial, nochin ome tapialmej xeliujtoskej para Dios.
11 Komo Jehová kiita ke tapial amo chipauak uan yejua ika amo ueli kimaktiliaj, moneki kiuikiliskej tiopixkat.
12 Uan yejua kiixtalis ipatiuj nejon tapial satepan ke kuali kiitas keniuj yetok. Ipatiuj yeski tein kijtos tiopixkat.
13 Sayoj ke, komo akin motenkauak kitemakas in tapial satepan oksepa kineki kikouas, moneki kiixtauas ipatiuj uan kitemakas tepitsinok.*
14 ”’Uan akin kixelos ichan uan kimaktilis Jehová, tiopixkat kiixtalis ipatiuj nejon kali satepan ke kuali kiitas keniuj yetok. Ipatiuj yeski tein kijtos tiopixkat.
15 Sayoj ke, komo akin kitemaktij ichan satepan oksepa kineki kikouas, moneki kiixtauas ipatiuj uan kitemakas tepitsinok,* uan kali oksepa yeski iaxka.
16 ”’Akin kixelos se cacho ital para Jehová, ipatiuj moixtalis satepan ke kiitaskej kanachi xinach moneki para tatokaskej itech nejon tal: 130 kilos* de cebada ipatiuj yeski tajko kilo plata.
17 Komo kitemaka ital itech xiuit keman kimakixtiskej nochi, ipatiuj amo mopatas.
18 Komo kitemaka satepan ke panos nejon xiuit, tiopixkat kiitas kanachi xiuit poliui para ajsis xiuit keman kimakixtiskej nochi, uan ijkon kiixejekos ipatiuj nejon tal. Ipatiuj amo yeskiok kemej achto, ta tsinkisas.
19 Sayoj ke, komo akin kitemakak ital oksepa kineki kikouas, moneki kiixtauas ipatiuj uan kitemakas tepitsinok,* uan tal oksepa yeski iaxka.
20 Uan komo amo oksepa kikoua uan kinamakiltiaj okse takat, amo uelis oksepa kikouas ital.
21 Keman ajsis xiuit keman kimakixtiskej nochi, nejon tal yeski iaxka Dios, xeliujtos sayoj para Jehová uan ininaxka yeski tiopixkamej.
22 ”’Akin kixelos para Jehová se tal tein kikouak uan amo tein kikauilijteujkej itatuan,
23 tiopixkat kiitas kanachi xiuit poliui para ajsis xiuit keman kimakixtiskej nochi. Ijkon kiixejekos ipatiuj nejon tal, uan akin kixeloj ital taxtauas nejon tonal. Nejon xeliujtos para Jehová.
24 Itech xiuit keman kimakixtiskej nochi, nejon tal kikepiliskej akin kikouilijkaj, akin ipa iaxka katka.
25 ”’Nochi maj motamachiua ika pesa tein kikuij kampa Dios taxeloj. Veinte pesitas* moneki kipias 12 gramos.*
26 ”’Maj amo akin kimaktili Jehová se tapial tein achto yoli, porin tein yekinika yoli ipa iaxka. Yeski kuakouej oso ichkat* ipa iaxka Jehová.
27 Komo tapial amo chipauak porin Dios ijkon kiita uan akin iaxka tapial taxtaua para kimakixtis, moneki kitemakas tein moixtalis uan tepitsinok.* Sayoj ke, komo amo oksepa kikoua, kinamakaskej ika ipatiuj tein moixtalij.
28 ”’Sayoj ke, amo uelis kinamakaskej nion oksepa kikouaskej teisa tein kimaktiliaj Jehová para maj nochipa iaxka. Yeski aksa, se tapial oso se tal. Nochi tein kimaktiliaj Jehová, xeliujtos sayoj para yejua.
29 Uan amo uelis kimakixtiskej akin ixyetokya maj kimiktikan. Moneki mikis.
30 ”’Se parte* de nochi tein mochiuas itech namotal uan koujtakilot tein takis, iaxka Jehová. Xeliujtok para Jehová.
31 Uan komo aksa oksepa kineki kikouas tein kitemakak, moneki kiixtauas ipatiuj uan kitemakas tepitsinok.*
32 Moneki nankimakaskej Dios seki* namotapialuan: kuakuejmej, ichkamej uan chivos. Keman ichkatajpixkej kinpoujtias majmajtak itapialuan uan panotiaskej tatampa de ikouj, se kixelos para Jehová. Kixelos tein majtaktika.
33 Amo moneki nankiitaskej ox tapial kuali yetok oso amo; amo no uelis nankiixpataskej. Sayoj ke komo nankinekiskiaj nankiixpataskej ika okse tapial, nochin ome tapialmej xeliujtoskej para Dios. Amo uelis oksepa nankinkouaskej’”.
34 Yejua nejin tanauatilmej tein Jehová kimakak Moisés itech tepet Sinaí para maj kinmatilti israelitas.
Tajtolmelaualismej
^ Oso “akin”, “akaj”.
^ Itech hebreo, “50 siclos”. Xikonita B14.
^ Itech hebreo, “30 siclos”.
^ Itech hebreo, “20 siclos”.
^ Itech hebreo, “majtakti siclo”.
^ Itech hebreo, “makuil siclo”.
^ Itech hebreo, “eyi siclo”.
^ Itech hebreo, “15 siclos”.
^ Oso “veinte por ciento”. Nejin kijtosneki ke komo tapial ipatiuj makuil platajtomin, moneki kitemakas se platajtominok.
^ Oso “veinte por ciento”. Nejin kijtosneki ke komo kali ipatiuj makuil platajtomin, moneki kitemakas se platajtominok.
^ Itech hebreo, “se homer”. Xikonita B14.
^ Oso “veinte por ciento”. Nejin kijtosneki ke komo tal ipatiuj makuil platajtomin, moneki kitemakas se platajtominok.
^ Itech hebreo, “20 guerás”. Xikonita B14.
^ Itech hebreo, “se siclo”.
^ Oso “borrego”.
^ Oso “veinte por ciento”. Nejin kijtosneki ke komo tapial ipatiuj makuil platajtomin, moneki kitemakas se platajtominok.
^ Oso “Diez por ciento”. Nejin kijtosneki ke komo kisentilia majtakti chikiuit moneki kitemakas se. Xikonita diezmo.
^ Oso “veinte por ciento”. Nejin kijtosneki ke komo tein kitemakak ipatiuj makuil platajtomin, moneki kitemakas se platajtominok.
^ Oso “diez por ciento”. Nejin kijtosneki ke komo kipia majtakti tapialmej moneki kitemakas se.
