Levítico 5:1-19
5 ”’Akin kiita oso kimati ke aksa* kichiuak teisa tein amo kuali uan kikaki ke tanotstokej* para maj kijtokan tein panok, uan amo teyi kijtoua, nejon se tajtakol uan moneki taxtauas.
2 ”’Oso takan aksa kikitskia* tein amo chipauak, maski nion kimatis, mopitsotilia. Nejon se tajtakol. Uelis yeski por se tapial miket tein Dios kiita ke amo chipauak, kemej se koujtajtapial, se tapial tein momati kalijtik oso semej okuiltsitsin tein olochnemij.
3 Oso komo mokuiltia akin amo chipauak oso kikitskia teisa tein uelis kichiuas maj mopitsotili uan nion kimati, uan satepan momaka cuenta, nejon se tajtakol.
4 ”’Oso akin kijtojtiuetsi ke kichiuas teisa, yeski kuali oso amo, uan satepan momaka cuenta ke amo uelis kichiuas, nejon se tajtakol.*
5 ”’Akin kichiuas se taman kemej nejin, moneki kijtos toni tajtakol kichiuak.
6 No kiuikilis Jehová se tapial tein tsikitsinok para maj kitapojpolui porin kichiuak tein amo kuali. Uelis yeski se ichkalamat oso se chivojlamat. Uan tiopixkat kimaktilis Dios nejon para maj kiixpolo itajtakol akin kichiuak tein amo kuali.
7 ”’Sayoj ke komo amo kiajsi tomin para kikouas se ichkat,* moneki kiuikilis Jehová ome palomas oso ome palomajkonemej porin kichiuak tein amo kuali. Se paloma kimaktilis Dios para maj kitapojpolui uan okse para kichichinouiliskej.
8 Moneki kiuikilis tiopixkat nejon palomas. Tiopixkat achto kimaktilis Dios in paloma tein kiuikak para maj kitapojpolui. Ika iisti kikechtekis, sayoj ke amo kikechkotonas.
9 Uan tepitsin iesyo nejon paloma kipijpisuis ikespan altar. Uan tein mokauas kichiuas maj ijxika itsintan altar.
10 Uan okse paloma kichichinouilis Dios, kemej ipa kichichinouiliaj okseki taman. Tiopixkat kichiuas nejin para maj Dios kiixpolo itajtakol uan yejua kitapojpoluis.
11 ”’Sayoj ke komo amo kiajsi tomin para kikouas ome palomas oso ome palomajkonemej, moneki kiuikilis Dios se kilo harina tein okachi kuali para maj kitapojpolui. Maj amo kitekili aceite nion maj kitalili istak kopal, porin kitemaktia nejon para maj Dios kitapojpolui.
12 Kiuikilis tiopixkat uan tiopixkat kikuis se tamatsol harina uan kichichinos itech altar para maj popoka. Tamatsol tein kikuis kiixnextis nochi tein kimaktiliti Dios. Kitalis tapani den tapial tein kichichinouilijtoskej Jehová itech altar.
13 Uan tiopixkat kichiuas nejin para maj Dios kiixpolo itajtakol akin kichiuak semej nejon tajtakolmej, uan yejua kitapojpoluis. Uan harina tein mokauas iaxka yeski tiopixkat, ijkon kemej mokauilia keman kimaktiliaj Dios teisa tachijchiuj ika harina’”.
14 Jehová no kiluij Moisés:
15 “Akin amo kikuis kemej moneki tein xeliujtok para Jehová maski amo kinekia, nejon se tajtakol. Yejua ika moneki kiuikilis Jehová se ichkaueuet tein kuali yetos porin kichiuak tein amo kuali. Tiopixkat kijtos kanachi plata yeski ipatiuj ichkaueuet. Yejua kitamachiuas plata ika pesa tein kikuij kampa Dios taxeloj.
16 Akin tajtakoj moneki taxtauas porin amo kikuik kemej moneki tein xeliujtok para Dios, uan no moneki kitemakas tepitsinok.* Nochi nejon kimakas tiopixkat. Uan tiopixkat kimaktilis Dios in ichkaueuet para maj kiixpolo itajtakol uan yejua kitapojpoluis.
17 ”Takan aksa kichiua tein Jehová kijtoua ke amo kuali, maski amo kimatik, nejon se tajtakol uan moneki taxtauas.
18 Moneki kiuikilis tiopixkat se ichkaueuet tein kuali yetos porin kichiuak tein amo kuali maski amo kinekia uan nion kimatik. Tiopixkat kiixtalis ipatiuj ichkaueuet. Uan yejua kimaktilis Dios para maj kiixpolo itajtakol, uan Dios kitapojpoluis.
19 Kimaktilis Jehová para maj kitapojpolui porin kiixnamikik”.
Tajtolmelaualismej
^ Oso “akin”, “akaj”.
^ Keman tanotsayaj, xa kijtouayaj maj kipano tein amo kuali akin kichiuak se tajtakol oso akin kimati uan amo teyi kijtoua.
^ Oso “mokuiltia”.
^ Nejin tajtakol xa porin amo kichiuak tein kijtoj.
^ Oso “borrego”.
^ Oso “veinte por ciento”. Nejin kijtosneki ke komo tein kikuik ipatiuj makuil platajtomin, moneki kitemakas se platajtominok.
