Levítico 6:1-30
6 Uan Jehová kiluij Moisés:
2 “Akin kichiua nejin tajtakolmej, amo kitakamati Jehová: akin amo kikepilia aksa* tein kikauilij maj kipiali uan kikajkayaua, akin kitachtekia okse oso kikajkayaua para kikuilis tein iaxka,
3 oso akin kiajsi tein aksa kipoloj sayoj ke amo kikepa uan takajkayaua, uan kiyekijtoua ke amo teyi kichiujtok maski amo melauj.
4 Akin kichiuak semej nejon tajtakolmej, moneki kikepas tein kiichtekik, tein tekuilij, tein kikauilijkaj maj tepiali, tein kiajsik,
5 oso tein iaxka okse uan yejua kiyekijtojka ke amo kipia. Moneki kikepas oso kiixtauas ipatiuj, uan temakas tepitsinok* keman kimatililiskej tein kichiuak.
6 Uan kiuikilis Jehová se ichkaueuet* tein kuali yetos porin kichiuak tein amo kuali. Nejon ichkaueuet kiuikilis tiopixkat, akin kiixtalis ipatiuj nejon tapial.
7 Tiopixkat kimaktilis Jehová nejin tapial para maj kiixpolo itajtakol, uan yejua kitapojpoluis komo kichiuak semej nejin tajtakolmej”.
8 Jehová no kiluij Moisés:
9 “Xikinnauati Aarón uan ikoneuan: ‘Yejua nejin tein moneki mochiuas keman kichichinouiliskej Dios se tapial. Moneki yetos itech altar nochi youal hasta ke tanesis, uan maj amo tiseui.
10 Keman tanesis, tiopixkat motalilis itasal* tachijchiuj ika lino. No motalilis itatampa calzon tein tachijchiuj ika lino. Satepan kikixtis koujnex* tein mosentilis itech altar uan kitalis tanakastan den altar.
11 Motapatilis uan kiuikas koujnex kampa tachipaujkan, uejka den kaltsitsin.*
12 Nochipa maj xotato kouit itech altar. Maj amo seui. Mostaj kualkan tiopixkat moneki kitalis kouit, uan ompa kitalis tein kichichinouiliskej Dios. Ompa no kitalis imantecayo tapial tein kimaktiliskej Dios para iuan sentakuaskej* uan kichichinos para maj popoka.
13 Nochipa maj xotato kouit itech altar. Maj amo seui.
14 ”’Yejua nejin tein moneki mochiuas keman kimaktiliskej Dios teisa tachijchiuj ika harina. Ikoneuan Aarón kiuikaskej itech altar, iixpan Jehová.
15 Se ikoneuj Aarón kikuis se tamatsol harina tein okachi kuali tein kipia aceite uan kikuis nochi istak kopal. Tamatsol tein kikuis kiixnextis nochi tein kimaktilitij Dios. Kichichinos nejon itech altar para maj popoka uan Jehová semi kiajuiyakmatis.
16 Uan ika tein mokauas, Aarón uan ikoneuan mochijchiuiliskej seki pantsitsin tein amo kipias levadura. Kikuaskej kampa Dios taxeloj, taixpan den kaltsin kampa kiueyichiuaj.*
17 Maj amo kichijchiuakan ika levadura. Nochi tein nechualkuiliaj para nechchichinouiliskej, no nikinxelouilia yejuan. Nikxeloua sayoj para yejuan, ijkon kemej nikinxelouilia keman aksa nechmaktilia se tapial para maj niktapojpolui, oso nechmaktilia teisa porin kichiuak tein amo kuali.
18 Kikuaskej nochin iokichpipiluan Aarón. Desde axkan, tein kitemakaj para kichichinouiliskej Jehová, kixeloskej tepitsin para yejuan uan nochin ininokichpipiluan akin yoltiaskej. Nochi tein mokuis keman kimaktiliskej Dios teisa, moneki kiitaskej ke xeliujtok sayoj para yejua’”.
19 Jehová no kiluij Moisés:
20 “Yejua nejin tein Aarón uan iokichpipiluan nochipa kimaktiliskej Jehová keman kinixtaliskej kemej tayekankatiopixkamej: kimaktiliskej se kilo harina tein okachi kuali, tajko kilo kualkan uan tajko kilo tiotak.
21 Kichijchiuaskej ika aceite itech se komal. Kuali tiktalilis aceite, tiktajtapanas uan tikchichinouilis Jehová uan yejua semi kiajuiyakmatis.
22 Kitemaktis akin kiixpatas Aarón. Akin kiixpatas yeski se iokichpil. Desde axkan moneki mochiuas nejin: tein kimaktiliaj Jehová, moneki kitamichichinouiliskej.
23 Keman se tiopixkat motemakilis teisa tachijchiuj ika harina, moneki kitamichichinoskej. Maj amo akin kikua, porin nejon kimaktiliaj Dios”.
24 Jehová oksepa iuan tajtoj Moisés uan kiluij:
25 “Xikinilui Aarón uan ikoneuan: ‘Yejua nejin tein moneki mochiuas keman aksa kimaktilis Dios se tapial porin tajtakolej. Kimiktiskej in tapial iixpan Jehová kampa kinmiktiaj tapialmej tein kichichinouiliaj. Dios kixeloj nejon.
26 Tiopixkat akin kitemaktis nejon tapial, kikuas tein xeliujtok para yejua. Maj kikuakan kampa Dios taxeloj, taixpan den kaltsin.
27 ”’Nochi tein mokuis keman kimaktiliskej Dios nejon tapial, moneki kiitaskej ke xeliujtok sayoj para yejua. Uan komo iesyo mopisuia itech itasal aksa, moneki kipakaskej kampa Dios taxeloj nochi tein moejesuis.
28 Komo nakat kimolontijkej* itech se sokikomit, moneki kitapanaskej. Sayoj ke komo kimolontijkej itech se komit de cobre, moneki kuali kipajpakaskej.
29 ”’Nochin tiopixkamej kikuaskej nejon nakat. Dios kixeloj sayoj para yejuan.
30 Sayoj ke keman kikalakiskej itech kaltsin iesyo se tapial tein aksa kitemaktia para maj Dios kiixpolo itajtakol, inakayo nejon tapial amo akin uelis kikuas. Moneki kichichinoskej.
Tajtolmelaualismej
^ Oso “akin”, “akaj”.
^ Oso “veinte por ciento”. Nejin kijtosneki ke komo tein kikuik ipatiuj makuil platajtomin, moneki kitemakas se platajtominok.
^ Oso “borrego”.
^ Oso “itilmaj”.
^ Oso “koujnex tein chiauak”.
^ Nejin kaltsitsin chijchiujtoyaj ika tasal (tilmaj).
^ Xikonita ikaltsin Dios.
^ Oso “kiposonijkej”.
