Levítico 8:1-36
-
Kinixtaliaj kemej tiopixkamej Aarón uan ikoneuan (1-36)
8 Jehová no kiluij Moisés:
2 “Xikinuika Aarón uan ikoneuan ikalakyan kaltsin kampa nechueyichiuaj,* xikuika inintasal,* aceite tein ika tikinixtalis, kuakouej tein tiktemaktis porin tajtakolejkej, ome ichkaueuetkej* uan chikiuit kampa yetokej pantsitsin tein amo kipiaj levadura.
3 Uan xikinilui nochin israelitas maj mosentilikan ikalakyan kaltsin”.
4 Yejua ika Moisés kichiuak nochi tein Jehová kinauatijka, uan israelitas mosentilijkej ikalakyan kaltsin.
5 Uan kiniluij: “Yejua nejin tein Jehová technauatij”.
6 Moisés kiniluij Aarón uan ikoneuan maj motokikan, uan kinpajpakak.
7 Kitalilij Aarón tasal tein maueueyak uan kitajkoilpij.* No kitalilij tasal tein makojkotoltik, koton tein kiluiaj efod,* uan kitajkotilintij ika cinturón* tein tajkitil.
8 No kitalilij iyolixpankopa bolsita uan ompa kinkalakij Urim uan Tumim.*
9 Uan kikuayoualouilij se tasal, uan itech nejon tasal kiixkuatalilij tepos kanauak tachijchiuj ika oro tein miliktik. Nejon tepos kinextiaya ke Dios kixeloj. Moisés kichiuak nochi nejin ijkon kemej Jehová kinauatijka.
10 Uan Moisés kikuik aceite tein ika kixelouaj tein iaxka Dios, uan kipijpisuilij in kaltsin uan nochi tein ompa yetoya. Ijkon kixeloj para Dios nochi nejon.
11 Satepan chikome viaje kipijpisuilij aceite in altar uan nochi tein ompa mokuia, uan no kipijpisuilij paila uan kampa ijkatoya. Ijkon kinxeloj para Dios.
12 Uan satepan, kikuatekilij Aarón tepitsin de nejon aceite uan ijkon kixeloj para Dios.
13 Uan Moisés kiniluij ikoneuan Aarón maj motokikan, kintalilij tasal tein maueueyak, kintajkoilpij* uan kinkuayoualouilij se tasal, ijkon kemej Jehová kinauatijka.
14 Moisés tanauatij maj kiuikilikan kuakouej tein kitemaktiskia porin tajtakolejkej, uan Aarón uan ikoneuan kitalijkej ininmay ikuako nejon kuakouej.
15 Moisés kimiktij, uan ika imajpil kikuik tepitsin iesyo uan kitalilij nochin cuernos tein kipiaya altar. Ijkon kikixtilij tajtakol in altar. Uan esti tein mokauak kitoyauak itsintan altar. Ijkon kikuiskiaj sayoj para kiueyichiuaskej Dios uan ompa kimaktiliskiaj tein ika kitajtaniskiaj maj kiixpolo inintajtakol.
16 Satepan kikuik imantecayo in kuakouej: tein kipiaya ipoxko uan tein kipiaya itech ieltapach. No kikuik ome iriñones uan imantecayo. Nochi nejin kichichinoj itech altar para maj popoka.
17 Uan ipankuetaxyo kuakouej, inakayo uan ikuit kitatijkej* uejka de kampa yetoyaj kaltsitsin,* ijkon kemej Jehová kinauatijka Moisés.
18 No tanauatij maj kiuikilikan ichkaueuet tein kichichinouiliskia Dios. Uan Aarón uan ikoneuan kitalijkej ininmay ikuako ichkaueuet.
19 Uan Moisés kimiktij tapial uan iesyo kipijpisuij ikejkespan altar.
20 Kikojkotonkej, uan Moisés kichichinoj nochi nejon iuan itsontekon uan imantecayo.*
21 Uan kipajpakkej ikuitaxkol* uan imetsuan, uan Moisés kitamichichinoj ichkaueuet itech altar para maj popoka. Nejin kitamichichinouilij Jehová uan yejua semi kiajuiyakmatik. Moisés kichiuak ijkon kemej Jehová kinauatijka.
22 Moisés no tanauatij maj kiuikilikan okse ichkaueuet, tein kitemakaskia para kinixtalis tiopixkamej, uan Aarón uan ikoneuan kitalijkej ininmay ikuako ichkaueuet.
23 Moisés kimiktij uan kitalilij tepitsin iesyo inakasko Aarón. Kitalilij itech inakas tein yetok iyekmakopa. No kitalilij tepitsin esti itech imajpil uan iikxipil tein okachi tomauak tein kipia iyekmakopa.
24 Uan Moisés kiniluij ikoneuan Aarón maj motokikan uan kintalilij tepitsin iesyo ichkaueuet ininnakasko. Kintalilij itech ininnakas tein yetok ininyekmakopa. No kintalilij tepitsin esti itech ininmajpil uan ininikxipil tein okachi tomauak tein kipiaj ininyekmakopa. Uan esti tein mokauak, Moisés kipijpisuij ikejkespan altar.
25 Uan kikuik nochi imantecayo tapial, manteca tein kipiaya itech ikuitapil, ipoxko uan ieltapach, ome iriñones uan imantecayo, uan iyekmets.
26 Uan den chikiuit tein yetoya iixpan Jehová kikuik se pantsin tein ijtikoyoktik, se pantsin tein ijtikoyoktik tachijchiuj ika aceite uan se taxkaltsin tein kanauak, tein amo kipiayaj levadura. Nochi nejon kitalij itech imantecayo uan iyekmets tapial.
27 Satepan kinmatalilij Aarón uan ikoneuan nochi nejin, uan peuak kimauiuika iixpan Jehová para kimaktilis.
28 Oksepa kikuik nochi tein kinmatalilijka uan kichichinoj itech altar, kampa yetoya okse tapial tein chichinaujtoya. Kimaktilij Dios nochi nejon para kinixtalis tiopixkamej. Kichichinouilij Jehová para maj popoka uan maj kiajuiyakmati.
29 Satepan, den ichkaueuet tein kitemakak para kinixtalis tiopixkamej, kikuik iyolixpan uan kimauiuikak iixpan Jehová para kimaktilis. Nejin katka para Moisés, ijkon kemej Jehová kinauatijka Moisés.
30 Uan kikuik tepitsin aceite tein ika kixelouaj tein iaxka Dios uan tepitsin esti tein yetoya itech altar, uan kipijpisuilij Aarón uan ikoneuan uan inintasal. Ijkon, Aarón uan ikoneuan xeliujtoyajya para Dios uan ika nejon tasal ueliskia kitekitiliskej.
31 Uan Moisés kiniluij Aarón uan ikoneuan: “Xikmolontikan* nakat ikalakyan kaltsin. Ompa nankikuaskej iuan pantsin tein yetok itech chikiuit, ijkon kemej nechnauatijkej: ‘Aarón uan ikoneuan kikuaskej’.
32 Uan komo mokauaok tepitsin nakat uan pantsin, nankitatiskej* nochi.
33 Moneki nanyetoskej ikalakyan kaltsin chikome tonal, hasta maj tami tonalmej keman namechixtaliskej kemej tiopixkamej, porin uejkauas chikome tonal.
34 Jehová tanauatij maj tikchiuakan tein tikchiujkejya axkan para kiixpolos namotajtakol.
35 Uan namejuan namokauaskej chikome tonal ikalakyan kaltsin nochin tonal uan nochi youal, uan nankichiuaskej nochi tein Jehová tanauatij xikchiuakan, para amo namikiskej; porin ijkon nechnauatijkej”.
36 Uan Aarón uan ikoneuan kichiujkej nochi tein Jehová tanauatijka itechkopa Moisés.
Tajtolmelaualismej
^ Xikonita ikaltsin Dios.
^ Oso “inintilmaj”.
^ Oso “borregos”.
^ Oso “kitajkotsikoj”.
^ Oso “paxa”, “ilpikat”.
^ Xikonita Urim uan Tumim.
^ Oso “kintajkotsikoj”.
^ Oso “kichichinojkej”.
^ Nejin kaltsitsin chijchiujtoyaj ika tasal (tilmaj).
^ Oso “ichiauakyo tein kipachojtok riñones”.
^ Oso “iijtikyo”.
^ Oso “Xikposonikan”.
^ Oso “nankichichinoskej”.
