Levítico 9:1-24
-
Aarón kimaktilia Dios seki tapialmej (1-24)
9 Itech chikueyitika tonal, Moisés kinnotsak Aarón uan ikoneuan uan taixyekananij israelitas.
2 Uan kiluij Aarón nejin: “Xikui se kuakuejkonet para tiktemaktis porin nantajtakolejkej uan se ichkaueuet* para tikchichinos, uan xikinuika iixpan Jehová. Nejon tapialmej moneki kuali yetoskej.
3 Sayoj ke xikinilui israelitas: ‘Xikuikan se chivo para nankimaktiliskej Dios porin nantajtakolejkej, uan se kuakouej uan se ichkaueuet tein kuali yetoskej uan kipiaskej se xiuit para nankinchichinoskej.
4 No xikuikan se kuakouej uan se ichkaueuet tein nankimaktiliskej para iuan nansentakuaskej.* Nochi nejin tapialmej nankimaktiliskej Jehová. No xikmaktilikan harina tamanelol ika aceite, porin axkan Jehová monextis namoixpan’”.
5 Yejua ika kiuikakej nochi nejin itech kaltsin kampa kiueyichiuayaj Dios,* ijkon kemej Moisés tanauatijka. Satepan nochin motokijkej uan moketskej iixpan Jehová.
6 Uan Moisés kijtoj: “Yejua nejin tein Jehová tanauatij xikchiuakan para maj Jehová namechnextili iueyi chikaualis”.
7 Uan Moisés kiluij Aarón: “Ximotoki itech altar uan xikmaktili Dios in tapial porin nantajtakolejkej uan tein tikchichinouiliti para maj kiixpolo motajtakoluan tejua uan mochankauan; no xiktemakti tein israelitas kiuikilijkej Dios para maj kiixpolo inintajtakoluan, ijkon kemej Jehová tanauatij”.
8 Aarón niman motokij itech altar uan kimiktij kuakuejkonet tein kimaktiliskia Dios porin tajtakolej.
9 Uan ikoneuan kiuikilijkej esti, uan ika imajpil kikuik tepitsin uan kitalilij cuernos tein kipiaya altar. Uan esti tein mokauak kitoyauak itsintan altar.
10 Satepan kichichinoj itech altar imantecayo kuakuejkonet, iriñones uan imantecayo tein kipiaya itech ieltapach para maj popoka, ijkon kemej Jehová kinauatijka Moisés.
11 Uan inakayo uan ipankuetaxyo tapial kitamitatij* uejka de kampa yetoyaj kaltsitsin.*
12 Satepan Aarón kimiktij tapial tein kichichinouiliskiaj Dios. Uan ikoneuan kimakakej iesyo uan yejua kipijpisuij ikejkespan altar.
13 Yejuan no kimakakej nakat tein kikojkotonkaj iuan itsontekon, uan yejua kichichinoj itech altar para maj popoka.
14 Uan no, kipajpakak ikuitaxkol* uan imetsuan, uan no kitalij itech altar, kampa yetoya tapial tein chichinaujtoya.
15 No kitemaktij tein israelitas kiuikilijkaj Dios. Achto kikuik chivo, kimiktij uan kimaktilij Dios porin tajtakolejkej. Kichiuak ijkon kemej kitemaktijka kuakuejkonet.
16 No kitemaktij tein israelitas kiuikakaj para kichichinouiliskej Dios. Kichiuak kemej ipa kichichinouiliayaj okseki taman.
17 Uan no kitemaktij harina: kikuik se tamatsol uan kichichinoj itech altar para maj popoka, iuan tapial tein kitemaktijkaj kualkan.
18 Uan Aarón kimiktij kuakouej uan ichkaueuet tein israelitas kitemakakej para sentakuaskej iuan Dios. Uan ikoneuan kimakakej esti uan yejua kipijpisuij ikejkespan altar.
19 Kikuikej imantecayo kuakouej, ikuitapil ichkaueuet tein tel mantecayoj, manteca tein kipiayaj ininpoxko, riñones uan manteca tein kipiayaj itech inineltapach.
20 Uan nochi nejon kitalijkej ininyolixpan tapialmej, uan satepan yejua kichichinoj ininmantecayo itech altar para maj popoka.
21 Sayoj ke ininyolixpan tapialmej uan ininyekmets, Aarón kimauiuikak iixpan Jehová para kimaktilis, ijkon kemej Moisés tanauatijka.
22 Satepan ke Aarón kitemaktij tapialmej porin tajtakolejkej, para kichichinouiliskej Dios uan para iuan sentakuaskej, momaajokuik ininixpan israelitas, kintiochiuak uan temok.
23 Satepan, Moisés uan Aarón kalakkej itech kaltsin, uan keman kiskej kintiochiujkej israelitas.
Uan iueyi chikaualis Jehová monextij ininixpan nochin,
24 uan Jehová kiualtitanik se tit* uan kitamij nochi nakat uan ininmantecayo tapialmej tein yetoya itech altar. Keman nochin israelitas kiitakej, tel yolpakkej, motankuaketskej uan moixpilojkej hasta talpan.
Tajtolmelaualismej
^ Oso “borrego”.
^ Xikonita ikaltsin Dios.
^ Oso “kitamichichinoj”.
^ Nejin kaltsitsin chijchiujtoyaj ika tasal (tilmaj).
^ Oso “iijtikyo”.
^ Oso “tekol”.
