Apocalipsis 16:1-21
16 Nikakik ke aksa* chikauak ualtajtouaya de kampa okachi yektik uan kiniluiaya chikome ángeles: “Xiakan uan xiktoyauakan itech taltikpak iueyi kualanyo Dios tein yetok itech chikome kaxit”.
2 Yekinika ángel yajki uan kipantoyauak talixko tein kipiaya kaxit. Uan akin kinneskayotijkaj ika itokay koujtajtapial uan kiueyichiuayaj itaixkopin tamachijchiuj, kinkuik se ueyi tetsaujkakokot tein semi kinkokoj uan semi kintajyouiltij.
3 Ojpatika ángel kipantoyauak itech ueyiat tein kipiaya kaxit. Uan ueyiat mokepak esti kemej iesyo se miket uan mikik nochi tein nemia itech ueyiat.
4 Expatika ángel kipantoyauak tein kipiaya kaxit itech amej tein motalojtokej uan itech ameyalmej.* Uan at mokepak esti.
5 Uan nikakik ángel tein kipia tanauatil itech at, kijtoj: “Tejua, akin axkan tinemi uan akin achto ipa tinemia, akin amo titekaua, tiyolmelauak porin tikixtalij nejin.
6 Kemej yejuan kinmiktijkej akin Dios moinxelouilij* uan tanauatianij,* tejua tikintayiltij esti porin motemolijkej”.
7 Uan nikakik ke aksa ualtajtoj den altar uan kijtoj: “Kemaj, Jehová* Dios, akin tikpia nochi chikaualis, tein tikixtalia melauak uan kuali yetok”.
8 Naujpatika ángel kipantoyauilij tonaltsin tein kipiaya kaxit. Uan kikaujkej tonaltsin maj kinchichino akin nemij nikan taltikpak.
9 Uan yejuan tonaltatakej. Maski ijkon, kiuijuikaltijkej* itokay Dios, akin ueli kichiua maj onka nejin tetsaujmej, uan amo moyolpatakej nion kiueyitalijkej.
10 Makuiltika ángel kipantoyauilij tein kipiaya kaxit iueyi silla koujtajtapial. Uan nochi kampa taixyekana tayouayantiak. Akin nemij nikan taltikpak peuak monenepilkejtsomaj porin amo kixikouayaj tein kinkokouaya.
11 Maski ijkon, amo kikaujkej tein amo kuali tein kichiuayaj uan kiuijuikaltijkej Dios akin yetok ne iluikak porin semi tajyouiayaj uan porin kipiayaj kokomej.
12 Chikuasentika ángel kipantoyauilij ueyiat Éufrates tein kipiaya kaxit. Uan ueyiat uakik uan motapoj se ojti kampa panoskej tekiuanij akin uitsej de kampa ualkisa tonaltsin.
13 Uan nikitak ueyi kouat tamouilil, koujtajtapial uan tanauatijkej tein amo melauak. Uan sejse kijtoj se taman* tein pitsotik tein tamatia kemej kalamej tein ualkisayaj inintenoj.
14 Tein melauj, amokuali ejekamej kichiuaj maj kijtokan nejon uan nejon tajtolmej kichiuaj milagros; kinmatiltiaj akin tekiuajtij itech nochi taltikpak uan ijkon kinsentiliskej para maj moteuikan itech iueyi tonal Dios, akin kipia nochi chikaualis.
15 “¡Xikaki! Niualas kemej se tachtekkej. Yolpaki akin ijsatok* uan takentok, para maj amo xipetsnentinemi* uan mopinaujtis keman kiitaskej”.
16 Uan kinsentilijkej tekiuanij kampa motanotsa Armagedón* itech tajtol hebreo.
17 Chikometika ángel kipantoyauak ejekaixko tein kipiaya kaxit. Uan aksa chikauak ualtajtoj de kampa okachi yektik, kampa yetok ueyi silla uan kijtoj: “¡Motamichiuakya!”.
18 Uan tapepetanik, mokakik ke tajtouayaj, tatitikuinik uan chikauak talolinik kemej amo keman ijkon mochiujtoya desde ijkuak Dios kichijchiuak yekinika takat. Noyan* talolinik uan semi chikauak momachilij.
19 Ueyi xolal exkan moxeloj uan ixpoliujkej uejueyi xolalmej tein pouij itech nochin altepemej; uan Dios kielnamikik Ueyi Babilonia uan kimakak copa tein kipia vino tein pexontok* ika iueyi kualanyo.
20 Uan no, nochin talmej tein youaliujtokej ika ueyiat cholojkej uan tepemej ixpoliujkej.
21 Uan akin nemij nikan taltikpak inintech uetsik uejueyi tet kemej tesiuit. Sejse tet etik katka kemej 20 kilos.* Uan yejuan kiuijuikaltijkej* Dios porin tesiuit semi tauejueloj, porin semi ueyi katka nejon tetsauit.
Tajtolmelaualismej
^ Oso “akin”, “akaj”.
^ Oso “amelmej”.
^ Oso “chipaujkej iixpan Dios”.
^ Xikonita tanauatijkej.
^ Oso “kitejtelchiujkej”.
^ Tajtol griego, pnéuma. Xikonita chikaualis.
^ Oso “tachixtok”, “ixpetantok”.
^ Oso “amo xitatsnentinemi”.
^ Tajtol griego, Har Maguedṓn. Itech tajtol hebreo kijtosneki ‘tepet Meguidó’.
^ Oso “Nochkan”.
^ Oso “temitok”.
^ Itamachiuj se talento tein kikuiaj griegos katka 20.4 kilos.
^ Oso “kitejtelchiujkej”.
