Apocalipsis 5:1-14
5 Nikitak ke akin tokotsyetoya itech ueyi silla kikitskijtoya ika iyekmay se amatajkuilol* tein ojkan* ijkuiliujtoya. Kuali pepechiujtoya ika chikome sellos.
2 Uan nikitak se chikauak ángel. Yejua chikauak kijtouaya: “¿Akoni kinamiki kitapos amatajkuilol uan kiejkeuas sellos?”.
3 Sayoj ke amo onkaya nion akin ne iluikak nion nikan taltikpak nion taltampa akin ueliskia kitapos amatajkuilol uan kiitas tein ompa ijkuiliujtoya.
4 Peuak semi nichoka porin amo akin kinamikia kitapos amatajkuilol uan kiitas tein ompa ijkuiliujtoya.
5 Sayoj ke semej tayekananij nechiluij: “Amo xichokaok. Xikita, Tekuani akin iuejkauj ixuiuj Judá, ichankauj* David, tatanikya. Yejua ika ueli kitapoua amatajkuilol uan chikueyi sellos”.
6 Tatajkoyampa, kampa yetoya ueyi silla uan naui ángeles* uan kampa yetoyaj tayekananij, nikitak se ichkatsin* tein moitaya ke kimiktijkaj. Kipiaya chikome ikuaomiyouan uan chikome iixtololouan. (Iixtololouan kiixnextiaj chikome chikaualismej tein ualeuaj imako Dios, tein yejua kintitanik itech nochi taltikpak).
7 Ichkatsin nimantsin motokij uan kikuik amatajkuilol tein kipiaya iyekmakopa akin tokotsyetoya itech ueyi silla.
8 Keman kikuik amatajkuilol, naui ángeles uan 24 tayekananij motankuaketskej iixpan Ichkatsin. Sejse tayekankej kipiaya se arpa uan uejueyi kaxit tachijchiuj ika oro uan pexontoyaj* ika kopal. (Kopal tein kichichinouaj kiixnextia netataujtil tein kichiuaj akin Dios moinxelouilij).*
9 Uan mokuikatiaj* se yankuik tatsotson tein kijtoua ijkuin: “Tejua mitsnamiki tikuis amatajkuilol uan tikixtilis sellos, porin mitsmiktijkej uan ika moesyo tikinkouak akin pouij itech tataman uejueyi kalyetonij, akin tajtouaj tataman tajtolmej, tataman ininxolal uan tataman ininaltepeuj uan tikchiuak maj iaxkauan Dios.
10 Tikchiuak maj taixyekanakan kemej tekiuanij uan tiopixkamej para kitekitiliskej toDios. Uan yejuan ualtaixyekanaskej kemej tekiuanij nikan taltikpak”.
11 Nitachiak, uan nikakik tein kijtouayaj miakej ángeles tein kiyoualouayaj ueyi silla, naui ángeles uan tayekananij. Katkaj tel miak millones,
12 uan chikauak kijtouayaj: “Ichkatsin tein kimiktijkej kinamiki kimakaskej chikaualis, tatiochiualismej, tamatilis, tanauatil, maj kitakachiuakan,* maj kiueyitalikan uan maj kitiochiuakan”.
13 Uan nikakik ke nochin akin Dios kinchijchiuak akin yetokej ne iluikak, nikan taltikpak, taltampa uan itech ueyiat, nochin yejuan kijtouayaj: “Akin tokotsyetok itech ueyi silla uan Ichkatsin kinnamiki maj kintasojkamatilikan, maj kintakachiuakan,* maj kinueyitalikan uan maj kipiakan chikaualis nochipaya”.
14 Naui ángeles kijtouayaj: “¡Maj ijkon mochiua!”.* Uan tayekananij motankuaketskej uan taueyichiujkej.
Tajtolmelaualismej
^ Itech griego, “amatatetekuinol”. Xikonita amatatetekuinol. Nejin mokuis itech nochi capítulo.
^ Oso “taijtik uan ipanko”.
^ Itech griego, “inaluayo”.
^ Oso “querubines”. Querubines seki ángeles tein kipiaj ueyi tanauatil.
^ Oso “borrego”.
^ Oso “temitoyaj”.
^ Oso “chipaujkej iixpan Dios”.
^ Oso “cantarouaj”.
^ Oso “kipoujkaitakan”.
^ Oso “kinpoujkaitakan”.
^ Oso “¡Amén!”.
