Colosenses 1:1-29
1 Nejua Pablo, niitatitanil Cristo Jesús porin Dios ijkon kinekik, uan nouan yetok tokniuj Timoteo.
2 Namechtitanilia nejin amatajkuilol namejuan tokniuan akin nanyetokej Colosas, namejuan akin Dios namechxeloj* uan amo nankikauaj Cristo:
Maj toTajtsin Dios namechmaka tatiochiualis tein amo technamiki uan maj namechpaleui kuali ximouikakan iuan Dios.
3 Keman namoka timotataujtiaj, nochipa tiktasojkamatiliaj Dios, iTajtsin toTekotsin Jesucristo,
4 porin tikakinij keniuj nantakuaujtamatij iuan Cristo Jesús uan keniuj nankintasojtaj nochin akin Dios moinxelouilij*
5 porin nankichixtokej* tatiochiualis tein Dios namechmakas ne iluikak. Namejuan namechixmatiltijkej nejin tatiochiualis keman ika namechnojnotskej tamachtilis tein melauak, kuali tanauatilmej*
6 tein nankikakkej. Ijkon kemej kiteixmatiltijtokej itech nochi taltikpak uan miakej kineltokatokej kuali tanauatilmej, no ijkon mochiujtok kampa nanyetokej desde keman nankikakkej uan senkis nankimatkej keniuj Dios yekmelauj kinextia itatiochiualis tein amo technamiki.
7 Yejua nejon tein namechmachtij Epafras, totakeualiknitsin akin nochipa kitekitilia Cristo, akin kichiua tein tejuan tikchiuaskiaj komo namouan tietoskiaj.
8 Yejua no techiluij ke ichikaualis Dios namechpaleuia xitetasojtakan.
9 Yejua ika, desde ke tikmatkej nejon, tiksentokaj namoka timotataujtiaj uan titajtanij maj kuali xikixmatikan tein Dios kineki, yekmelauj xitamattokan uan maj ichikaualis namechpaleui xikajsikamatikan nochi.
10 Ijkon uelis nanemiskej kemej moneki nemiskej akin kitekitiliaj Jehová* uan nankiyolpaktiskej itech nochi. No nankichiuaskej tein kuali uan nankisentokaskej okachi kuali nankiixmatiskej Dios.
11 No titajtanij maj Dios ika iueyi chikaualis semi namechchikaua para nankixikojtiaskej nochi ika nejmachkayot uan nanyolpakiskej.
12 Uan xiktasojkamatilikan toTajtsin, porin namechpaleuij xikchiuakan tein moneki para nankiseliskej tein kinmakas akin moinxelouilij* uan yetokej kampa tanestok.
13 Dios techkixtij kampa tayouayan,* uan techuikak itech itaixyekanalis itasojKonetsin,
14 akin taxtauak para techmakixtis uan para maj techtapojpoluilikan totajtakoluan.
15 Yejua tamati kemej Dios akin amo ueli tikitaj. Yejua tayekankakonet de nochi tein Dios kichijchiuak;
16 porin itechkopa, Dios kichijchiuak nochi okseki taman ne iluikak uan nikan taltikpak, tein moita uan tein amo moita, taixyekanalis, tanauatil, tekiuanij oso taixyekananij. Nochi okseki taman Dios kichijchiuak itechkopa uan para yejua.
17 Uan no, yejua nemi desde achto ke nochi okseki taman, uan itechkopa, Dios kichiuak maj onka nochi okseki taman,
18 uan yejua taixyekana itech* nechikol, oso inakayo. Yejua akin itech peuak nochi, akin achto oksepa nemik. Ijkon yejua tayekantoskia itech nochi;
19 porin Dios kinekik maj itech iKoneuj yeto nochi tein kuali
20 uan itechkopa Cristo, oso itechkopa iesyo tein mimilauik itech kouit,* Dios kichiua maj nochi okseki taman tein onkak nikan taltikpak uan ne iluikak oksepa kuali mouikakan iuan.
21 Tein melauj, namejuan achto amo nanpouiaj iuan Dios uan nankiixnamikiaj porin sayoj nantanemiliayaj itech tein amo kuali.
22 Sayoj ke itechkopa inakayo akin momikilij, axkan yejua kichiuak oksepa kuali ximouikakan iuan, ijkon iixpan Dios nanyeskij nanchipaujkej, amo nankipiaskej tein amo kuali uan amo teyi ika uelis namechteluiliskej.
23 Sayoj ke moneki xiksentokakan xitakuaujtamatikan, kuali ximotakitskilikan itech tatsineualoni uan amo ximotsinkixtikan, amo xikauakan tatiochiualismej tein nankichiaj porin nankikakkej kuali tanauatilmej tein moteixmatiltijkejya itech nochi taltikpak. Nejua Pablo, nechixtalijkej maj nikteixmatilti nejin kuali tanauatilmej.
24 Axkan niyolpaki namoka nitajyouijtos, uan nitajyouijtok kemej Cristo, sayoj ke poliuiok nitajyouis uan nejon kipaleuis inakayo Cristo, oso inechikol.
25 Peuak nitekiti itech nejin nechikol porin Dios nechixtalij, uan nejon namechpaleuia. Yejua ika nikteixmatiltia itajtol Dios nochi tein niueli,
26 nikteixmatiltia tein Dios amo kitematiltijtoya* nochi nejin tonalmej* nion kinmatiltij akin nenkej ne uejkauj. Sayoj ke axkan Dios kinmatiltij akin moinxelouilij.*
27 Uan no Dios kinekik kinmatiltis akin amo judíos uejueyi tatiochiualismej tein poui itech tein amo kitematiltijtoya.* Nejin tein amo kitematiltijtoya yejua Cristo akin poui namouan, tein kijtosneki ke nankichiaj maj iuan namechueyitalikan.
28 Tikteixmatiltijtokej, titanejmachtijtokej uan kemej yekmelauj titamattokej tikinmachtijtokej oksekin para maj kiixmatikan Cristo, uan ijkon tikinuikaskej iixpan Dios kemej itatojtokakauan Cristo akin semi takuaujtamatij.
29 Yejua ika chikauak nitekititok uan nimochikaujtok, nitakuaujtamati itech ichikaualis tein notech tekiti.
Tajtolmelaualismej
^ Oso “nanchipaujkej iixpan Dios”.
^ Oso “chipaujkej iixpan Dios”.
^ Oso “nankichatokej”.
^ Oso “tajtolmej”.
^ Oso “chipaujkej iixpan”.
^ Itech griego, “techmakixtij imako itanauatil tayouayanilot”.
^ Itech griego, “yejua itsontekon”.
^ Xikonita kouit kampa tetajyouiltiaj.
^ Xikonita tein Dios amo kitematiltijtoya.
^ Xikonita tonalmej; tein mochiujtok.
^ Oso “chipaujkej iixpan”.
^ Xikonita tein Dios amo kitematiltijtoya.
