Efesios 3:1-21
3 Yejua ika, nejua Pablo, akin nitsaktok porin nipoui iuan Cristo Jesús uan porin namechpaleuijtok namejuan akin amo nanjudíos…*
2 Xa nankimatkejya ke nechixtalijkej maj namechpaleui xikselikan itatiochiualis Dios tein amo technamiki.
3 Kemaj, Dios nechmatiltij tein amo kitematiltijtoya;* achto ipa tepitsin ika nitajtojkaya nejin keman namechtajkuilouilij.
4 Yejua ika, keman nankiixtajtoltiskej* nejin, nankiitaskej ke kuali nikajsikamati tein Dios amo kitematiltijtoya* tein ika tajtoua Cristo.
5 Ne uejkauj, nejin amo akin kiyekmatiltijtoyaj kemej axkan Dios ika ichikaualis kinmatiltij tatitanilmej uan tanauatianij:*
6 ke akin amo judíos uan pouij iuan Cristo Jesús kiseliskej tein Cristo kiselia uan senpouiskej. Yejuan no kiseliskej tein Dios motenkauak touan porin kineltokakej kuali tanauatilmej.*
7 Nechixtalijkej kemej se tekitikej akin uelis namechpaleuis xikajsikamatikan tein Dios amo kitematiltijtoya* porin nechnextilij itatiochiualis tein amo technamiki. Yejua kinextij ichikaualis keman nechtayokolij nejin tatiochiualis.
8 Nejua okachi amo teyi nichiujkej ke nochin oksekin akin Dios moinxelouilij.* Nikselij nejin tatiochiualis tein amo technamiki para nikinixmatiltis akin amo judíos kuali tanauatilmej tein ika tajtoua itatiochiualisuan Cristo tein amo ueli se kinpoua.
9 No nikselij nejin tatiochiualis para nikchiuas maj nochin kiitakan keniuj Dios, akin kichijchiuak nochi, kichiujtok tein tel miak xiujmej amo kitematiltijtoya.*
10 Nejin mochiuak para maj axkan Dios, itechkopa nechikol, kinnextiliani taixyekananij uan tekiuanij akin yetokej ne iluikak ke yejua semi tamatkej, uan nejin monextia itech miak taman.
11 Nejin no yejua tein Dios kiixtalij uan amo keman tami, tein yejua kichiuas itechkopa Cristo, toTekotsin Jesús.
12 Itechkopa amo teyi techtsakuilia maj titajtokan uan tikyekmatij ke ueli timotokiaj iuan Dios porin titakuaujtamatij iuan Cristo.*
13 Yejua ika, namechiluia amo ximosenkauakan porin nitajyouijtok para namechpaleuis, porin nejin kichiua maj Dios namechueyitali.
14 Yejua ika nimotankuaketsa iixpan toTajtsin,
15 akin kichiuak maj yetokan nochi tataman kalyetonij ne iluikak uan nikan taltikpak.
16 Nimotataujtia para maj Dios akin semi ueyi, namechyolchikaua ika ichikaualis
17 uan maj Cristo yeto itech namoyolo uan xitetasojtakan porin nantakuaujtamatij. No nimotataujtia para maj kuali ximotakitskilijtokan itech tatsineualoni, ijkon kemej inaluayo se kouit tein kuali toktok,
18 para maj iniuan nochin akin Dios moinxelouilij* senkis xiuelikan xikajsikamatikan keniuj patauak, ueyak, uejkapan uan uejkatan tamachtilis tein melauak,
19 uan xikajsikamatikan keniuj Cristo namechtasojta, nejin okachi tayekantok ke nochi tein uelis tikixmatiskej. Ijkon nankitelpiaskej nochi tein kuali tein Dios kitemaka.
20 Ika ichikaualis tein totech tekititok, Dios yekmelauj ueli kichiua okachi miak ke nochi tein tiktajtaniaj oso tiknemiliaj,
21 yejua ika kinamiki maj kiueyitalikan itechkopa nechikol uan itechkopa Cristo Jesús nochipaya. Maj ijkon mochiua.*
Tajtolmelaualismej
^ Nejin eyi punto kinextia ke Pablo amo kitamiijtoj tein kijtojtoya, uan nesi ke oksepa ika tajtoj hasta versículo 14.
^ Xikonita tein Dios amo kitematiltijtoya.
^ Oso “nankileroskej”.
^ Xikonita tein Dios amo kitematiltijtoya.
^ Xikonita tanauatijkej.
^ Oso “tajtolmej”.
^ Xikonita tein Dios amo kitematiltijtoya.
^ Oso “chipaujkej iixpan Dios”.
^ Xikonita tein Dios amo kitematiltijtoya.
^ Oso “titakuaujtamatij iuan”.
^ Oso “chipaujkej iixpan Dios”.
^ Oso “Amén”.
