Hebreos 12:1-29
12 Nochin akin ika namechnojnotsak tel miakej uan tamatij kemej se ueyi mixti tein techyoualoua, uan yejuan kiteixmatiltiaj tein kiitanij uan kikakinij. Yejua ika, maj tejuan no timokixtilikan tein techetilia uan tajtakol tein ijsiujka techijilpia,* uan maj titsikuinikan itech ojti tein yetok toixpan uan maj amo timosenkauakan,
2 uan maj tikitstiakan Jesús, akin techixyekana uan akin kichiua maj ajsitok titakuaujtamatikan. Kemej kimatia ke semi yolpakiskia satepan, kixikoj momikilis itech kouit* uan amo mopinaujmatik, uan motalij iyekmakopa Dios.
3 Kemaj, kuali xikitakan akin kixikoj nochi tein kijtouilijkej tajtakolchiuanij akin ininselti moijtakojkej, ijkon amo nansiouiskej nion namosenkauaskej.
4 Maski nankiixnamiktokej nejon tajtakol, nantaxikojtokej uan ayamo namechmiktia.
5 Uan senkis nankielkaujkejya tein Dios namechyolmajxitij kemej yeskia nanikoneuan: “Nokonetsin, amo xikauilmati keman Jehová* mitsmachtia xikchiua tein moneki nion ximosenkaua keman mitstakaualtis,
6 porin Jehová* kintakaualtia akin kintasojta. Tein melauj, kitatsakuiltia* akin kiita kemej ikoneuj”.
7 Xikxikokan tein nankijyouiaj uan xikitakan ke nejon se taman tein Dios ika namechmachtia xikpatakan tein moneki. Dios namechita kemej nanikoneuan. Porin nochin tetatmej kinmachtiaj ininkoneuan maj kichiuakan tein moneki.
8 Sayoj ke komo Dios amo namechmachtia ijkon kemej kinmachtiani oksekin, amo yekmelauj nanyeskiaj nanikoneuan, ta nanikoneuan okse.
9 Uan no, totatuan techmachtiayaj maj tikchiuakan tein moneki uan tejuan tikintakachiuayaj.* ¿Amo monekiskia okachi timokauaskej maj toTajtsin techyekana ika ichikaualis uan maj tiyoltokan?
10 Porin seki tonalmej totatuan techmachtijkej maj tikchiuakan tein moneki ijkon kemej kiixejekouayaj ke kuali yetoya. Sayoj ke toTajtsin techmachtia para techpaleuis, uan ijkon tiyeskij tichipaujkej kemej yejua.
11 Tein melauj, keman techtakaualtiaj amo tiyolpakij, ta timoyolkokouaj.* Sayoj ke nejin semi uelis kinpaleuis akin takakij, uan satepan uelis kichiuaskej tein kuali yetok uan yolseujkanemiskej.
12 Yejua ika xikchikauakan ininmay uan inintankuay akin amo chikaujkej,
13 uan xiksentokakan xikmelauakan ojti kampa nametsnejnemij para maj pajti omit tein nekuiliujtok uan maj amo kopini.
14 Xiktemokan kuali namouikaskej iniuan nochin uan xichipaujkanemikan, porin komo aksa* amo chipaujkanemi amo kiitas toTekotsin.
15 Kuali ximotachilikan para maj nochin xikselikan itatiochiualis Dios tein amo technamiki, uan maj amo ixua nion se naluat tein tapajuia tein takuejmolchiuas uan kinpajuis* miakej;
16 uan no kuali xikitakan maj amo namouan poui se auilnenkej* nion se akin kiixtopeua tein iaxka Dios, kemej Esaú akin kiixpatak tein kinamikia kiselis kemej tayekankakonet ika sayoj se tapalol.
17 Porin namejuan nankimatij ke satepan, keman kinekik maj no kitiochiuakan, kiixtopeujkej. Maski tel chokak uan kitemoj maj itat motanemililpata, sayoj nenkaj tein kichiuak.
18 Porin namejuan amo namotokijtokej itech se tepet tein uelis se kimatokas* uan tein xotatok, kampa tatileujtok, tayouayan uan kampa tetsaujkaejeka,
19 nion kampa kipitstokej trompeta nion kampa mokaktok se tajtol. Keman israelitas kikakkej nejon tajtol, kitataujtijkej Moisés maj amo teyi kiniluikanok.
20 Porin momoujtijkej keman kinnauatijkej nejin: “Hasta komo se tapial taksa itech tepet, moneki nankitetemaskej”.*
21 Kemej tein kiitayaj semi kinmoujtij, Moisés kijtoj: “Nimojkauiuiyokatok”.
22 Sayoj ke namejuan namotokijkej itech tepet Sion uan itech iueyi xolal Dios akin nochipa yoltok, nejin yejua Jerusalén tein yetok ne iluikak, namotokijkej kampa yetokej tel miakej ángeles
23 akin mosentilijtokej, namotokijkej itech ininnechikol itayekankakoneuan Dios akin inintokay ijkuiliujtok ne iluikak, namotokijkej iuan Dios, akin ininJuez nochin, namotokijkej iniuan yolmelaujkej akin moyekanaj ika ichikaualis Dios uan amo kipiajok tajtakol.
24 No namotokijkej iuan Jesús akin tetajtouia itech se yankuik taman tein Dios motenkauak uan namotokijkej itech esti tein yejua techajtseluilij, tein okachi kuali ke iesyo Abel.
25 Nochipa kuali xikakikan* akin tajtojtok. Porin komo kintatsakuiltijkej akin ne uejkauj amo kinekkej kikakiskej tein Dios kitematiltij nikan taltikpak, ¡okachi techtatsakuiltiskej komo amo tikakij akin ualtajtoua ne iluikak!
26 Itech nejon tonal, itajtol kitsetseloj tal, sayoj ke axkan motenkaua: “Oksepa nikchiuas maj amo sayoj motsetselo tal, ta no iluikak”.
27 Keman kijtoua “oksepa”, kinextia ke Dios kiixpoloti tein ueli kitsetselouaj, nejin yejua tein Dios amo kichijchiuak, para maj mokaua tein amo ueli kitsetselouaj.
28 Yejua ika, kemej techmakatij se Taixyekanalis tein amo ueli kitsetselouaj, maj tiksentokakan tikselikan tatiochiualis tein amo technamiki, uan ika nejon maj tiuelikan tiktekitilikan Dios kemej yejua kiyolpaktia, maj tikmojkatokakan uan maj semi tiktakachiuakan.*
29 Porin toDios kemej se tit* tein nochi kiixpoloua.
Tajtolmelaualismej
^ Oso “techtsijtsikoua”.
^ Xikonita kouit kampa tetajyouiltiaj.
^ Oso “kiuijuiteki”.
^ Oso “tikinpoujkaitayaj”.
^ Oso “titayokoyaj”.
^ Oso “akin”, “akaj”.
^ Oso “kinpitsotilis”.
^ Xikonita auilnemilis.
^ Oso “kimachilis”.
^ Oso “nankitepoxoniskej”, “nankimojmotaskej ika tet”.
^ Oso “Amo xikixtopeuakan”.
^ Oso “tikpoujkaitakan”.
^ Oso “tekol”.
