Hebreos 3:1-19
3 Yejua ika, nokniuan akin Dios namechijitak* uan namechnotsak* para xiakan iluikak, semi itech xitanemilikan akin tikitaj kemej tatitanil uan tayekankatiopixkat: Jesús.
2 Yejua kitakamatik Dios akin kiixtalij, ijkon kemej Moisés no tatakamatik keman tekitik ichan Dios.
3 Porin Jesús kinamiki maj okachi kiueyitalikan ke Moisés, porin akin kichijchiua se kali okachi kitakachiuaj yejua uan amo kali.
4 Tikmatij ke se kali kichijchiuak aksa,* sayoj ke akin kichijchiuak nochi yejua Dios.
5 Moisés tatakamatik keman tekitik ichan Dios uan nejin kinextij tein motematiltiskia satepan,
6 sayoj ke Cristo, iKoneuj Dios, tatakamatik keman kiyekpiak ichan Dios. Uan tejuan yekmelauj tikixnextiaj nejon kali komo tiksentokaj amo tikauaj maj teisa techtsakuili maj titajtokan, uan no tiksentokaj tikchiaj tein techyolpaktia hasta keman tatamis.
7 Yejua ika, Dios ika ichikaualis kichiuak maj moijto: “Komo axkan namejuan nankitajtolkakij,
8 amo xiyoltakuaujkej. Amo xikchiuakan kemej ijkuak namouejkaujtatuan semi takualantijkej itech tonal keman nechyejyekojkej ompa taluakyan.
9 Ompa nechyejyekojkej uan nechixnamikkej maski 40 xiujmej kiitakej tein nikchiuak.
10 Yejua ika, akin nemiaj itech nejon tonalmej, nechyolajxitijkej uan nikijtoj: ‘Nochipa amo kinekij nechtakamatiskej ika nochi ininyolo, uan amo nechixmatij’.
11 Yejua ika, keman semi nikualantoya nimotenkauak: ‘Amo nikinkauas maj nouan moseuikan’”.
12 Nokniuan, ximoyekpiakan, amokan nansemej peuak namoyoltakuauaj uan amo nantakuaujtamatijok porin nankikaujkej Dios akin nochipa yoltok.
13 Okachi kuali, xiksentokakan mojmostaj ximoyolchikauakan se iuan okse, keman tinentoskejok itech nejon tonal tein tikiluiaj “axkan”, para maj tajtakol amo namechkajkayaua porin nejon uelis namechyoltakuaualtis.
14 Porin tein melauj, tikpiaskej tein Cristo kimakakejya sayoj komo tiksentokaj titakuaujtamatij hasta keman tatamis, ijkon kemej ijkuak peuak itech titaneltokaj.
15 Ijkuiliujtok: “Komo axkan namejuan nankitajtolkakij, amo xiyoltakuaujkej. Amo xikchiuakan kemej ijkuak namouejkaujtatuan semi takualantijkej”.
16 Porin ¿akonimej kikakkej tein Dios kijtoj uan maski ijkon semi kikualantijkej? ¿Melauj ke nochin akin kiskej Egipto akin Moisés kinixyekanak?
17 Uan no, ¿akonimej kiyolajxitijkej Dios 40 xiujmej? ¿Melauj ke akin tajtakojkej, akin mikkej ompa taluakyan?
18 ¿Uan akonimej Dios kinyekiluij ke amo kinkauaskia maj iuan moseuikan? ¿Melauj ke akin amo kitakamatkej?
19 Yejua ika, tikitaj ke amo kinkauak maj iuan moseuikan porin amo takuaujtamatiaj.
Tajtolmelaualismej
^ Oso “akin nanchipaujkej iixpan Dios”.
^ Oso “namechyoleuak”.
^ Oso “akin”, “akaj”.
