Hebreos 6:1-20
6 Yejua ika, axkan ke tikneltokakejya tein yekinika timomachtijkej de Cristo, maj amo ompa timokauakan, ta maj okachi titakuaujtamatikan. Maj amo sayoj timokekeptokan itech tein yekinika timomachtijkej, kemej tiknekiskej maj oksepa techmachtikan ke moneki timoyolpataskej uan tikauaskej tein amo kipia ipatiuj, ke moneki titakuaujtamatiskej iuan Dios,
2 ke moneki se moauis, toni kijtosneki keman tokniuan kitaliaj ininmauan itech aksa,* ke mikemej oksepa nemiskej uan ke tein Dios kiixtalia amo keman mopata.
3 Yejua nejin tein tikchiuaskej, komo Dios kineki.
4 Moajsij sekin akin Dios kintauilijkaya, kiselijkaj tein yejua kintayokolijka,* kinmakaka ichikaualis,
5 kiitakaj keniuj itajtol Dios semi tapaleuia uan kiitanijya tatiochiualismej* tein onkas satepan,*
6 sayoj ke kiixtopeujkej tamachtilis tein melauak. Yejua ika amo uelisok se kinpaleuis maj moyolpatakan porin oksepa kikoujpampilouaj iKoneuj Dios uan kichiuaj maj kipinaujtikan sentaixpan.
7 Porin Dios kitatiochiuia tal keman miakpa kioui uan kichichina kiouat uan satepan mochiua tatok tein kikuaj akin tatokaj.
8 Sayoj ke, komo itech nejon tal moskaltia sayoj uitsti, amo ompa tatokajok uan Dios amo uejkaua kiixtalis maj amo motachiuaok, uan satepan kitatiskej.*
9 Sayoj ke nokniuantsitsin, maski ijkon titajtouaj, tikyekmatij ke namejuan amo kemej akin kiixtopeujkej tamachtilis tein melauak uan nankichiujtokej tein namechpaleuis maj Dios namechmakixti.
10 Porin Dios yolmelauak uan amo kielkauas tein nankichiuaj nion keniuj nankitasojtakej itokay keman nankinpaleuijkej* tokniuan* uan nankisentokaj nankinpaleuiaj.
11 Sayoj ke tiknekij maj nansejsemej ijkon xiksentokakan xitekitikan ika nochi namoyolo hasta keman tatamis, para nankiyekmatiskej ke mochiuas tein nankichiaj.
12 Amo xitatsiuikan, ta xikchiuakan ijkon kemej akin takuaujtamatkej uan amo yolijsiujkej, uan nejon kinpaleuij maj kiselikan tein Dios motenkauak.
13 Porin keman Dios motenkauak iuan Abrahán ke kitatiochiuis, moyektenkauak itokaykopa, porin amo uelia motenkauaya itokaykopa se akin okachi ueyichiujkej ke yejua.
14 Kiluij: “Yekmelauj nimitstatiochiuis uan yekmelauj nikchiuas maj semi momiakilikan mokoneuan”.
15 Yejua ika, kemej Abrahán amo yolijsiuik, kiselij nejin tein Dios motenkauak.
16 Porin nikan taltikpak motenkauaj itokaykopa aksa akin okachi ueyichiujkej. Nejin kichiua maj amo motajtolteuikan porin ijkon kiyeknextiaj ke melauak tein kijtouaj.
17 No ijkon, Dios kinyeknextilij akin kiseliskej tein motenkauak ke tein kiixtalia amo mopata. Yejua ika kiyekijtoj ke yekmelauj kichiuaskia.
18 Tein Dios motenkauak uan tein kiyekijtoj amo keman mopatas, uan Dios amo keman takajkayaua; uan nejin semi techyolchikaua tejuan akin timopaleuijtokej iuan Dios para senkis titakuaujtamatiskej itech tein tikchiaj.
19 Tein tikchiaj techpaleuia itech tonemilis* kemej se tepos tein ika motsikoua barco. Nejin semi chikauak uan amo teyi kiolinia uan techkalakia hasta maj tikpanauikan ueyi tasal,*
20 kampa Jesús nalpanok achto ke tejuan uan kitapoj ojti kampa tiaskej. Yejua mochiuako tayekankatiopixkat kemej Melquisedec, uan ijkon tekitis nochipaya.
Tajtolmelaualismej
^ Oso “akin”, “akaj”.
^ Itech griego, “tetayokolil tein ualeua ne iluikak”.
^ Oso “chikaualismej”.
^ Xikonita tonalmej; tein mochiujtok.
^ Oso “kichichinoskej”.
^ Oso “nankintekitilijkej”.
^ Oso “akin chipaujkej iixpan”.
^ Nejin ueyi tasal kixelouaya ome cuartos tein kipiaya tabernáculo.
